مداقرة عالماشي !!
اليوم بالمجمع، شوفير ختيار بده يصف الباص، كنه في واحد جاي ضيق عليه وخرب عليه الصفة !! المهم الختيار كبست معه عدجارة، وسكر الطريق وما رضي يتزحزح صانطي !!
كلها قلبت بكمات غاز وهات يا زوامير، والختيار قاعد بالباص، ولمزيد من النكاية ولع سيجارة !! العالم نزلت من السيارات وهات يا صياح، ونزلوا الله وطلعوا الله حوالى خمس مرات، لا ورفعوا لربهم مسبات بذيئة (تبعة الأم والأخت).
أنا كنت ورا الختيار مباشرة، وبعد ما خلصوا كفرياتهم وعنترياتهم المصدية، نزلت عرواق وقلت للختيار: “بالله قطومة صغيرة لقدام خلني أطلع !! طلعولي جماعة “يااا ويل قلبي ماااا أروقك” وبلشوا مسخرة !!
بهيك لحظة دعيت بيني وبين حالي “الله يقويني بطولة البال” … الدعاء كان وليد لحظته، بس الظاهر إنه رح يصير يتردد على لساني بانتظام.
ملاحظة: لما تشوف حدا بسب ربنا، الأفضل تتركه وما توعظه بنفس اللحظة، لإنك رح تستفزه بزيادة ويجهز كفرية أقوى (بدخل عليها الأم والأخت).
استدراك: لا يروح فكرك لبعيد وتتخيل إنه الختيار الدجر فتح الطريق، وحكى لي: “لعيونك يااا راااايق” !!
#عبدالرحيم_الزعبي
#يوميات_سائق_تكسي
