سواليف
كشفت شقيقة الشاب المرحوم #محمد_المخادمة سر الساعات الأخيرة قبل وفاته، وكتبت كلمات ترثيه بها أبكت الأردنيين ، حيث تم تداول رسالتها بشكل واسع عبر مواقع التواصل .
والمرحوم المخادمة توفي اثر #حادث #سير على طريق #الرمثا قبل أيام ، برفقة زميل آخر له طالب في جامعة اليرموك .
بلش الموضوع بكسر تلفونك وانت تشتري اواعي جديده!!
رنيتلي محموم بالك انه تلفونك انكسر ومن وين بدنا نصلحه و وعدتك انا ومجود نصلحه ي ضو عيوني.. رجعت ع البيت وكنت لأول مره بتجيب لبسه بلون ابيض اتاريك بتجهز كفنك يا عيوني بدون علمنا.. حكيتلناا بدي اداوم بكره دكتور الساعه ١١ بده يحرمني حكينالك انسى بس ما رديت علينا.. حكيتلك ناوي تداوم بتاخد تلفوني ومجود حكتلك كمان وحكيتلنا لاا..
الخميس 28/4/2022
طلع الصبح تحممت وكانت أول مره بعمرك بتتحمم قبل الدوام.. دايماً كنت بس تروح تتحمم.. جهزت حالك وطلبت تلفوني وحكيتلي والله لأرجعلك بألف صوره عليه وحكيتلك فداك يا عيوني…
لا انت رجعت ولا التلفون رجع بصور،، رجع مكسّر ي عيوني وبلا اي جدوى منه…
تأخرت عن موعد ترويحتك من الجامعه علينا يا ابو علي..
مسامحتك على التلفون دنيا وآخره يا ضي عيوني
فداك كل تلفونات العالم يا مهجة هالروح
بقول الآآآخ وما بتسمعني يا ابو علي
بناديك بأعلى الصوت يا حموده وما بتحكيلي نعم يا قلب..
الله يصبرنا ع فراقك يا ابو علي،، كسرت ظهورنا يا أبو علي،، هديت حيلي يا ابو علي يا وحيدي يا نور هالعيون..
إلى جنات النعيم يا شهيد، باب الريان مفتوحلك لأنك صايم،، باب الصلاة مفتوح لأنك مصلي الفجر ومن صلى الفجر في جماعة فهو في ذمة الله، صح هيك كنت دايما تحكيلنا…
الله يرحمك يا خييي،، الله يرحمك يا وحيدي..
تخيلتك خريج، عريس، ابو لأولادك، خال لأولادنا بس ولا مره تخيلتك شهيد..
احتسبناك لرب العالمين هو أكرم منا الك يا خيي..
إنّا لله وإنّا إليه راجعون.. الله معك يا عريس..
