الوطن يمه
خيطت المخدات وشدت اللحف وحطتهن على المطوى ، غنت ورودت وهيجنت والفرح مخلوط بدمع الفقر والعازه وبتقول بقلبها كنت بدي اعملك عرس يمه تحكي فيه كل نسوان الحاره ، بنفسي يمه اذبح ذبايح واطبخ وأطعم كل الحبايب والقرايب ، وتكون الزفه من أبدع ما يكون بس يميمتي يلعن ابو الطفر والعازه بس الحمد لله يمه وضعنا أحسن من غيرنا والحديث كان بينها وبين حالها لانه ما بدها تأثر على معنويات إبنها الي ما خلا جمعيه ولا سلفه ولا بنك الا استدان منه ، الثلاجه تبرع فيها اخوه الكبير والغساله اخوه الثاني والحجي تبرعله بغرفة النوم وبعده ما دبر حاله بمصاريف الصاله .
بغيب عن البيت بالاسبوع والاسبوعين على الحدود ، برتوي من جرة المي ،بسطاره جزء من إجره وفوتيك الشرف جلده ، بستناه صحابه كأنه مسافر عشان يسهروا ، بيحكيلهم عن دوامه وصعوبته وعن الاحداث والمخاطر والحم والبرد وهمه صافنين وحلمهم يصيروا عسكر مثله ويحموا هالوطن ، وواحد منهم ما خلا بيت مسؤول غير دقه عشان يدبره بالجيش ويروح ع امه مستلم الراتب وبده يخطب ويشتري سياره لانه زهق النوم للظهر والسهر لوجه الصبح ونفسه يصير عنصر فعال زي غيره صح هنه ٣٥٠ ليره بس احسن من ولا اشي.
كوت اخته فوتيكه وعطرته وكانت تشم الفوتيك الي فيه عرق اخوها ، لمعة بسطاره ، حطت العده بشنتته وامها كل شوي لا تنسي اشي من غراض اخوكي مشواره بعيد يمه ، صلت الفجر صحته قوم يمه اتيسر لا تتاخر الله يرضى عليك وابريق الشاي بالميرميه جاهز والفطور جاهز ، صلي يمه هاي المي جاهزه وبدعواتها ودعته ، اجى رمضان وكل ما تحط الفطور وهوه مداوم تقول لو انك هون يا ميمتي بتحب الاكله هاي والدمعه مطرزه بعيونها وابوه يقول مشان يصبرها خيرات الله موجوده ، رنت عليه امه قبل السحور كالعاده تصحيه رد عليها وقللها صاحي يمه قلتله الله يرضى عليك يمه لا تنسى صلاة الفجر قللها ادعيلي يمه وديري بالك ع خطيبتي وكان قبل شوي مخلص مكالمه مع خطيبته بوعدها يسعدها وانه جهز كلشي عشان العرس ع العيد ، تسحر وصلى الفجر وشال سلاحه واستلم الوظيفه واستشهد ، تسحر بالارض والفطور بالجنه ، وامه بتعد بايام رمضان عشان تفرح فيه وبتابع الاخبار وزيادة الاسعار وطلت الحكومه الممكيجه وكل طله بزيادة سعار ، استشهد عامود البيت وفضيت الدار ووقعت المسبحه من ايد الحجه واحترق قلبها وانجرح فؤادها وودعت إبنها وزفته ع الجنه ورودت عالعريس .
اه يمه ع ولادنا زهرة حياتنا الي كل يوم بنودع واحد وكل ذنبه حب الوطن بس لا تنسي يمه انك قلتيلنا بيوم يمه هاض الوطن اهم من حياتنا هاض الوطن ما النا غيره ، نموت كلنا يمه وما يموت الوطن ، تدمع عيونا ولا يدمع الوطن ، طيب والفاسدين يمه الي نهبوا رزقتنا وتلاعبوا بلقمتنا وكل يوم ببلد وسرقوا خيراتنا وصرفوها ع السيارات والخمارات والسفرات واحتكروا المناصب قالت يمه هذول الهم الدنيا وحطامها واحنا النا الجنه ونعيمها لا تخاف يمه عند ربك ما بضيع اشي ، وانت يمه لا تخافي طول ما فيه نشامى بحبوا الوطن لانك وطن .
م مهند بني سعيد
