ثالوله بوجه العروس / عودة عياصرة

ثالوله بوجه العروس
اليوم صحيت وما رتبت فراشي طبعاً مثل العاده ، بتحكيلي امي حط القاروره على الكولر حكيتلها ظهري بوجعني خلي مأمون بس للأمانه ظهري ما كان يوجعني ، اطلعت مع ابوي وعمي على عرس بعمان وما التزمت بالسرعه ابداً ، قبل الدورية احط حزام الأمان وبعدين اشيلو ، وقفت عند قهوة واعطيته خمسين دينار فبحكيلي معك فراطه حكيتله لا لكن كان معي خمس دنانير وكذبت عليه ، دخلنا الصاله فأجى شب سلم علي وبحكيلي وين هالغيبه حكيتله والله مشتاق ، انا والله مو مشتاق ابداً اله بالعكس لما أشوفه راسي بصير يوجعني .

وصلنا شارع مكه فبدي ألف وأرجع ، اتطلعت فيه يافطه انو ممنوع الدوران ، خالفت طبعاً وارجعت منها فختياره وراي بسيارتها صارت تزمر وتصرخ علي : شو حيوان انت مش عارف انو ممنوع ، وبدل ما أعتذر حكيتلها استحي على شيبتك يا حجه عيب هالحكي .

دخلنا على قهوة العميد فرع خلدا وقفت عالدور ، كان قدامي صبية حلوة ولابسه لبس ملفت للنظر ، أكلتها بعيوني بطريقه كثير وقحه ، ما بعرف كيف تجرأت وحكيتلها : أنا أول مره بشوف عيون فيهم هالقد تضاريس بتجنن ، ولا عبرتني بالعكس اتطلعت علي نظرة فوقيّة فحسيت انو انا انسان رجعي متخلف ، حاولت أبينلها انو عن جد انتي حلوه فحكتلي يا عمو اما بتخجل على حالك أو بلم عليك العالم ، دخلت السياره فبحكيلي عمي ليش تأخرت حكيتله شايف عموه هديك البنت قعدت ربع ساعه وتتطلع علي ، شكلها معجبه يا حرام بس انا اكبرت على هاي القصص .

بما أن السماء في الشرق الأوسط تُمطرُ مثاليّةً والأرضُ تُنبتُ انتقاداً والنساء تُنجبُ أجنّةً أفلاطونيّة ، بما أن كل شخص أُقابله هو شخص رائع وخلوق ومُهذّب ولطيف ، بما أن مرآة الفيس بوك تحكي عن مجتمع ملائكي ونفوس راقية ، كثيراً ما تسآءلتم أذاً أينَ السيئون ؟
وأنا أجيبكم أنني السيء رقم واحد في هذا المجتمع المثالي ، فمَثلي كمَثلِ ثالوله في وجنةِ عروسٍ جميلة .

عودة عياصرة