يا غيم بلادي شتّي سمن وزبادي
عملية الاستمطار التي قامت بها الحكومه قبل أيام أدلت بدلوها اليوم بعد ان اشتعلَ رأسُ الغيمةِ مطراً وسمنا ، مصادر غير رسميه أكدت أن تكلفة الاستمطار حوالي ١٧ مليون دينار ، وبحسبه بسيطه كل خمس قطرات من الماء كلفت الحكومه ربع دينار .
هذا الانجاز الحكومي دعاني للتبجّح أمام الشعوب الأوروبيّه فأمطار اسبانيا تتكون فقط من عنصري الهيدروجين والأكسجين وثلوج أستونيا لا يوجد بها فستق حلبي ، فلنشكر الحكومه جميعاً لأننا الشعب الوحيد في العالم الذي سيقلي البندوره صباحاً بنكهة المطر .
ومنذُ اليوم سوف يقوم طقس العرب بتفصيل الحاله الجويّه في المملكه كالتالي : غدا صباحاً سوف يطرأ انخفاض على درجات الحراره وسوف يتساقط السمن البلدي بمشيئة الله فوق المرتفعات الجبليّه ، هذا ويحذر طقس العرب من تدنّي مدى الرؤيه الأفقيه نتيجة ملامسة الغيوم المشبعه بالعناصر الغذائيه والزبده البلديّه لسطح الأرض .
يا الله شو انه الشعب جاحد لنعمه اسمها الحكومه ، يعني شو بدها تعمل اكثر من هيك ، تأمين صحي وعملولنا ، هاي وزير الصحه من شهر وقع لسانه من ثمه وهو يحكي : انجلط وقسطرتك بلديه مجانيه شو اكثر من هيك ، وزير الطاقه والثروه المعدنيه اله سنه بيحرث الأرض حراثه تيطلع أكم دلو نفط عشان تشرب سياراتنا بنزين بلدي ، وحتى المي اللي بنشربها من كثر ما الحكومه هاكله همنا بدها تشربنا ياها بطعم السمن البلدي .
انا عتبان على عمر العبداللات ومتعب الصقار ، وشو بتستنو قاعدين ، روحو ركاض غنولكو اغنيه وطنيه عن الأستمطار ، خلي عنوانها ” يا غيم بلادي شتّي سمن وزبادي ” وانا بلحنها بس لا تعزرو علينا، الله يسامحكم بس هاي فيروز لا الها دخل بالموضوع ولا عندهم اسمتطار اليوم غنّت الصبح ” تلج تلج عم بتشتي الدنيا سمن ” ، يا حيف عليكم شوفو وائل كفوري على التلفزيون الآن شو بغني ” تلج وسمن وزبده وريح الدنيا برا مجنونه ”
بسرعه حطوا على mtv وشوفو وائل كفوري كيف بحكي عن الزبده تبده .
