ساحر البيت الأسود
زمان لما كانت تطلع كذبه كبيرة
كانت امي الله يطول بعمرها تقول:
ابصر مين اللي عامليتلها عمل
وبدها تثبته بالكذبه
طبعا شو دخل!!!!
انا ما بعرف… هيك راي الحجه استنادا
على أقاويل ختيارات زمان
يعني مثلا وحده بدها تفرق بين جارتها وجوزها ودار عمها بالمعيّة
بتصلخها حجاب
وبتتبع الحجاب بكذبه ولا في الف ليله وليله
مثلا انه جد ابوها كان عنده بقره
بتحلب خطين واحد حليب والثاني قهوه
واذا بدها تكبرها شوي
بتصير تحلب اربع خطوط
نسكافيه وكباتشينو بالاضافه للخطين اللي فوق
وقياسا على خبرة الختيارات
ربطت الخبر اللي تناقلته وسائل التواصل الاجتماعي
قبل اسبوع او اسبوعين
انو في عاصفه ثلجية رح تضرب بلاد الشام والجزيرة العربية
بيني وبينكو الفار لعب بعبي
عاصفه ثلجية بآخر آب !!!!!!!!!
مبينه كذبه
فقلت خليني استشير الحجه
هون الحجه قالت يا ميمتي
هاي الكذبه كبيره
هاظ اكيد مشان تخريب بين مجموعه كبيرة
يعني بفوق قدرة هالحجّابين والدجّالين اللي حوالينا
مش مشان زوجين او جارة او قرابة
هذا العمل على مستوى اقليمي
فقلت خليني اقصقص عن الموضوع
ووصلني من مصادر موثوقه انو صار فيه اجتماع سري بالبيت الابيض
بين ابليس شخصيا واوباما
ومشان ما تقولوا الزلمه بهرف
المصدر من معلم الاراجيل تبع البيت الابيض شخصيا
هو الوحيد اللي كان مصرحله يفوت
لانه هيك قعده بدها مخمخه
وتحديدا معسّل نخلة
ودار بينهم الحديث التالي:
اوباما: شو معلم بدنا نجدد الحجاب مشان المسلمين شو رايك؟
ابليس: بيني وبينك طولتو علي ،كنت مستني حد يراجعني لانه اخر حجاب اله فتره منتهي،العمل الاخير كان سايكس بيكو أيام ما كان جد ابوك بلعب قلول بأفريقيا، والمره الماضية وديت صبياني وطلعوا قدها وقاموا باللازم، وخربوا بين المسلمين ١٠٠ سنه
( صراحه مستحيل هالتخطيط تم بدون طقوس شيطانية)
اوباما:طيب خلينا نجدده كمان ١٠٠ سنه
ابليس: شوف يا اوباما انته زلمه غالي علي لانك اشطر من العرصات اللي قبليك ، بكفي انك دمرت سوريا بدون ما تخسر ولا جندي واحد وانا بدي اصدق معك وهيك بتكون اول واحد من بني ادم بصدق معه ، الوضع صعب جدا لهيك انا حبيت أحضر هالعمل شخصيا
اوباما:يزلمه قول وغيّر ،ابليس بكل خبثه ولئامته ما بقدر يضمنلي كمان ١٠٠ سنه، يزم تلاميذك بكفلو شغلهم وانته ما بتقدر!!!!
ابليس:يا قرابتي بكفلك شغلي ل١٠ سنين ماكسمم، غير هيك لا تحلم
اوباما:ليش طيب شو اللي اختلف عالمسلمين،بعدهم مثل ما همه نايمين وغايبين فيله
ابليس: (سحب سحبه عالارجيلة شرق معها نص الميّات،وطلّع سحابة دخان تشكلت فيها خارطة بلدان المسلمين ممزقة ومشتتة، وتنهد تنهيده طويله) يزم البني ادم بضله بني ادم،اميت بدك تتعلم، ولك زمان كان المسلمين بفكروا انكو اصدقائهم وبنظروا الكو عاساس انو انتو حل المشكله، اما هسا صحيوا وعرفوا انو انتو سبب المشكله،صحيح ما بإيدهم اشي يعملوه، بس صحوتهم بتخوف.
(وهون خِلص النَفَس وبطّل لزلمتي لزوم فطلع)
بعد ما بعثلي معلم الاراجيل المعلومه هاي بمسج مشفر عالواتس اب كبرت براسي القصه
وبلشت افكر فيها من منطلق حجاب وعمل وهيك
بيني وبينكو اللي صار بين المسلمين مش طبيعي
يعني مستحيل تتفسر الا انه يكون في عمل
وتدخّل شيطاني
يعني بتلاقي المسلم بقتل اخوه المسلم
ولو يصحله يقطعه قطع ما بوفر
اتقول ماكلين مخ حمار ولّا راس حربايه
بس ان شالله ما رح تطول هالقصه
همه عارفين هالحكي
وابليس صدق هالمره اللي قال ما رح تطول
نسأل الله ما تتجاوز البضع سنوات
ونشهد هلاك الطغاة اللي دمروا بلاد المسلمين
وبتمنى من الصفحات الاخبارية ما يتداولو خبر مش متاكدين منه
ولا هيك بصيروا بساعدوا على تثبيت العمل
