جعل لا حدا حوش
من زمان وانا احاول ان اعمل موازنة بيتية لكن مش زابطة …راتب محدود يعني لا يتجاوز 450 دينار واجمالي عدد الافراد 7 …
حاولت ان اعمل موازنة شهرية بالأول كتجربة… اقتطعت مبلغ 50 دينار وحكيت لام العيال تخبيهن وكل شهر بدنا نوفر 50 ليرة عشان العيال لما يكبروا ويروحوا الجامعات.. وتبقى من الراتب 400 ليرة.
150 اجار بيت. 40 ليرة كهرباء ومية. 10 ليرات مكالمات تليفونية. 30 ليرة مواصلات… حكينا 170 ليرة تكفينا أكل وشرب لآخر الشهر… منظفات من هون… سكر وخبز ورز وخضار من هون … قولوا انها زبطت… لكن اجانا الولد يحكي بده ملابس… الملابس الي عليه صارت ضيقة… حكينا لام العيال هات هال50 ليرة وخلينا نشتري ملابس للعيال… هذا الي ما كنا حاسبين حسابه في الميزانية ( الملابس )
ومر الشهر الثاني وحسبنا حساب الملابس … وعند اخر الشهر مرضت البنت وأخذناها عند الدكتور واشترينا العلاج من صيدليه خاصة… وحكينا لازم كمان نضيف العلاج في الميزانية…
ومر الشهر الثالث وحسبنا ايضا حساب العلاج… وعند اخر الشهر زوجة جارنا خلفت ولازم ام العيال تزورها…
ومرت الشهور وكل شهر عم بتزيد المصروفات … زواج من هون …نجاح توجيهي… تخرج من الجامعة… وهكّذا دواليك…
وفوق كل هذا وذاك الاسعار بتزيد يوم بعد يوم… وبالأخير حكيت لام العيال لا بدنا ميزانية ولا بطيخ اصفر… خذي هالراتب بس اعطيني 30 ليرة للمواصلات … وبهيك طلقنا الموازنة
كنت افكر انه عمل موازنة بيتية سهلة… طلع الموضوع مش مثل ما كنت افكر… وصرت اقول الله يكون بعون وزير المالية… اذا انا راتبي محدود وعدد افراد عائلتي محدودة… وما قدرت اعمل ميزانية! كيف لما يكون معاليه يتعامل مع مليارات و عدد سكان ال8 مليون… !!!؟؟؟؟
بصراحة الله يكون بعونه… خاصة انه استطاع ان يحدد العجز بحدود 340 مليون وانه من خلال رفع الاسعار وزيادة الضرائب والاقتطاعات وتحديد سقف اعلى للرواتب رح يغطي العجز… وبالتالي لا زيادة على الدين العام …هل ممكن ان يمر هذا العام دون ارتفاع في المديونية..!!؟؟؟
علي الجيرة اذا انتهى هذا العام وما كان هنالك زيادة في المديونية , رح اذبح هالجاجات وبلاش من البيض البلدي – وماله بيض المزارع … متعود عالدلال … ما يوكل غير سنيكرز وكت كات – ورح اعمل عليهم مفتول بالجاج البلدي احتفالا بمرور عام بدون ارتفاع في المديونية, ورح اعزم عليهم الاصحاب والقرايب.
وجعل لا حدا حوش
