الشب المنحوس …
قبل ما تسأل اي سؤوال لحدا لازم تفكر ، ولكن مع عواد انا ما بفكر وبسأل بكل اريحية ، المهم اليوم سألتة ليش ما بتخطب وتتجوز وتستقر ؟؟!!! وقبل ما اقللكوا جوابة اللي ضحكني وجرح قلبي خلوني اعطيكوا نبذة بسطرين عن عواد .
عواد شب منحوس وطفران ومكتئب وشارب روح الخل على الريق ، مثل اي شب اردني باول مشوار حياتة الممتدة لمليار سنة من التعب والتركيض، كل يوم بوقف انا واياه تقريبا لانة بيشتغل بنفس المبنى اللي مكان شغلي فية …
المهم جوابة كان كالتالي:
يزم مهو صرت متقدم لالف واحدة وكلهن بدهن واحد غني وعاقل وحلو ، يزم كنت بدي اخطب زميلتي بالشغل ، بس انسيت احكيلها انه انا سكان منطقة شعبية باخر الدنيا ، وانة المي بتيجي مره بالشهر ، يعني اذا بدك تتحمم لازم تصلي صلاة الاستسقاء تحت الدش
طبعا بس رحنا عليهم اجت الوالدة باشا ، السلطانة ام العروس ، كانت بتشبة هند بنت عتبة ،ومساعداتها النجسات خوات العروس ، كانت ثنتين ،اللي على اليسار وظيفتها تتفحصنا واحد واحد ، واللي على اليمين تسجل كل كلمة بنحكيها ، اما انا وجها لوجه مع الكرنيبة الكبيره كنت انا شخصيا شغلتها وعملتها ، وكل سؤال تسالني اياه امر من اللي قبله ، وقلت مش مشكلة رح اعتبر هاي المعركة ليها ، بس فتح مكة بعدين يا ام لهب ، واطلعنا واحنا نستنى رد الخبر منهم ، واعطاها صفنة مع نفس عميييييق لدرجة تخيلت انة رح يشفط كل الاكسجين بالمنطقة كلها
قلتلة طيب وبعدين شو اجا فتح مكة ؟؟؟ ، يا خوفي طلعت من قتلى المشركين بمعركة بدر يا كبير …..تركني وراح على مكتبة بدون حتى ما يسلم ….معقول زعل؟
