سواليف – رصد
نجت #طبيبة تعمل في قسم التوليد بمستشفى #البشير، بعد تعرضها لحادث سير، أدى لانقلاب مركبتها.
ونشر الطبيب الناشط عبر مواقع التواصل الاجتماعي، بهاء الرضاونة، قصة الطبيبة وصورة سيرتها اليوم السبت.
وقال: إن الصورة لطبيبة مقيمة في قسم التوليد في #مستشفى_البشير أمس بعد عملها في يوم واحد ٣٥ ساعة.
وأضاف: “يعني اجت على الدوام الساعه ٨ الصبح روحت ثاني يوم الساعه ٦ المساء (٣٥ ساعه ) وهالشي يتكرر في الاسبوع ٣ مرات
فاهمين علي انتو؟؟؟ يعني بتداوم السبت مثلاً الساعه ٨ بتروح على البيت الساعه ٦ المساء يوم الاحد بعدين بتداوم يوم الاثنين الساعه ٨ للساعه ٤ العصر عادي بعدين بترجع يوم الثلاثاء بتداوم من ٨ الصبح ل يوم الاربعاء الساعه ٦ المساء ويسمى هذا نظام ال everyother on call”.
وتابع: “كانت راح تخسر حياتها لما عملت حادث نتيجة #التعب والارهاق ولكن الله نجاها باعجوبة”.
وأشار إلى أن والدة الطبيبة تعرضت لـ”جلطة” بعد رؤيتها لصورة الحادث.
وتاليا نص المنشور كاملا :
تعالو بدي احكيلكو هالقصه بعدين راح احكيلكو قصة الحادث اللي في الصوره المرفقه..
هذا في بداية شغلي في امريكا بتذكر اجى علي احد المقيمين صباحاً بطلب مني انه لازم يطلع من المستشفى حالاً ويبصم انه طلع.
ف انا بحكيله يعني لساه النهار بأوله كيف بدك ترّوح هلا؟
ف بحكيلي انه رئيس القسم program director طلب منه هيك لانه اكتشف انه الشب داوم ساعات اكثر من المطلوبه منه واللي هي تقريباً 70 ساعه في الاسبوع فقط وهالشي يخالف قانون العمل الطبي للاطباء في امريكا واذا عرفو عنه راح يسكرو البرنامج التعليمي في المستشفى ويتبهدلو ٦٠٠ بهدله من المنظمة المسؤوله عن المستشفيات في امريكا
الرقم هذا 70 او 80 ساعه في الاسبوع من وين جاي؟
هذا جاي بعد ما الامريكان عملو دراسه وقارنو ب كمية الانتاجيه الايجابيه للاطباء المقيمين وبين اي كوارث طبيه ممكن تصير اذا الطبيب داوم اكثر من اللازم وطلعو برقم ٨٠ ساعه .يعني الطبيب في امريكا ممنوع يشتغل في الاسبوع اكثر من ٨٠ ساعه
نيجي الان لصورة الحادث اللي تحت وهي صورة ل طبيبة مقيمة في قسم التوليد في مستشفى البشير مبارح بعد ماداومت في يوم واحد ٣٥ ساعه يعني نص اللي بداوموه بأسبوع كامل في امريكا
يعني اجت على الدوام الساعه ٨ الصبح روحت ثاني يوم الساعه ٦ المساء (٣٥ ساعه ) وهالشي يتكرر في الاسبوع ٣ مرات
فاهمين علي انتو؟؟؟
يعني بتداوم السبت مثلاً الساعه ٨ بتروح على البيت الساعه ٦ المساء يوم الاحد بعدين بتداوم يوم الاثنين الساعه ٨ للساعه ٤ العصر عادي بعدين بترجع يوم الثلاثاء بتداوم من ٨ الصبح ل يوم الاربعاء الساعه ٦ المساء ويسمى هذا نظام ال everyother on call
فالدكتوره المسكينه مروحه معمي ضوها من الشغل وبتعرفو قسم الولاده تحديدا في البشير اكثر انفجار مواليد في الاردن عنا
فالدكتوره روحت مش شايفه الضو وهالشي انه كانت راح تخسر حياتها لما عملت حادث نتيجة التعب والارهاق ولكن الله نجاها باعجوبه
لدرجة امها لما شافت صورة السياره صابتها جلطه
طبعا هذا الكلام مش جديد وكثير تخصصات نفس الشي وكثير مستشفيات غير وزارة الصحه كمان نفس الشي بحرثو حراثه على الاطباء بساعات عمل اكثر من ١٠٠ ساعه في الاسبوع
ولو راح تسألني ليش ما يزيدو الكادر حتى يقللو ساعات العمل ف للاسف راح ترد عليك المستشفيات تقولك ماعنديش ميزانيه اعيّن اطباء
وهالشي طبعا بنعكس سلبي وراح تشوف اخطاء طبيه كثيره وارهاق للاطباء يصيرو معرضين لحوادث سير وسكتات قلبيه
وعشان هيك المفروض يعني لازم نستنى مصيبه لتصير مع احد الاطباء المقيمين عشان يصير وقتها في ميزانيه لوزاره الصحه..
اه ماهو احنا عنا هون في البلد بنخطط بعد ما تصير المصيبه retrospective planning
نهاية الكلام هاي صورة السياره المفعصة
نسخه منها ل مكتب وزير الصحه
ونسخه منها لمكتب الامين العام للمجلس الطبي عشان قبل ما تقرو قانون المسائلة الطبيه اللي فخورين انتو فيه انكم جبتوه من امريكا…روحو بالأول شوفو بيئة العمل هناك وعدد ساعات عمل الاطباء بعدين تعالو حاسبوهم
وسلامتكو
