ضريبة أخت فلّاتة
في دولة ضريب ستان تم عقد اجتماع طارىء والهدف منه فرض مزيداً من الضرائب , دولته يقول للوزراء بأن الوضع سيء وعلينا تدارك الوضع قبل أن يتفاقم . فيرد عليه معالي وزير المالية أبو خابور قائلاً : دولتك ما ظل اشي غير ورفعناه .
دولته : أنت متأكد يا أبو خابور ؟
معالي أبو خابور : دولتك مثل ما بقولك , سكّرت من جميع الجهات .
دولته : يا جماعة بدي حل عالسريع ؟
معالي أبو خابور: طيب شو رأيكو تتركوا لي الموضوع يومين أو ثلاثة خليني أفكر على رواق ؟
دولته : يومين بس يا أبو خابور, مش تعمل لي فيها أبو العُرّيف , يعني دراسات واستبانات , بدي أحط عبيت النار على طول فاهم ؟
بعد يومين دخل معالي وزير المالية على دولته والفرح يبدو على مُحياه وبيده ورقة . نهض دولته عن كرسيه متلهفاً وقال : ها ؟ بشّر إن شاء الله قمحة ؟
معالي أبو خابور: مش قمحة وبس , قول شوال قمح .
دولته : هات تا نشوف .
معالي أبو خابور: هسع يا سيدي الشعب أكثر أكله الفلافل . مزبوط ولا لأ ؟
دولته : مزبوط .
معالي أبو خابور: ها .. ها , وأكثر الناس عندها القولون مزبوط ولا لأ ؟
دولته : مزبوط . بس شو علاقة هالحكي بموضوع الضريبة ؟
معالي أبو خابور: تفضل دولتك شوف شو مكتوب بهالورقة .
يمسك دولته الورقة بكلتا يديه ويقرأ ما بها , وأثناء القراءة تبسم وأطلق زفيراً طويلاً وقال : أها هاظا الشغل ولا بلاش , وفوراً تناول قلم الحبر الأسود وكتب الملاحظة الأتية في ذيل الصفحة ( يُنشر في الجريدة الرسمية فوراً ويُعمل به من تاريخ النشر ) .
أكيد بدكوا تعرفوا شو مكتوب بالورقة ؟ مكتوب فيها الأتي
(( كل من يُخرج ريحاً بصوت أو غير صوت وبقصد أو غير قصد , يدفع ما مقداره عشرة قروس لكل مرة , ومن يُخرج ريحاً أكثر من مرة وبنفس اللحظة “أي على شكل صلية أتوماتيك” يدفع ديناراً واحداً لكل صلية , وذلك تحت مسمى ضريبة المحافظة على البيئة . بلدنا جميل وهواؤه أجمل فلنحافظ عليه )) .
