[review]الثلاثاء 18-8-2009لم يكمل «سيجارة الجلواز» التي أشعلها قبل قليل، فقد أعدمها في قلب المطفأة بطريقة تدل على الملل والقرف، وضع ”الريموت” فوق الوسادة القريبة ثم غادر ببطء من الصالون الى الغرفة الداخلية تاركا المذيعة المحلية تنقل للمشاهدين حالة الطقس في عواصم العالم ودرجات الحرارة المتوقعة ، بينما قلبه المشغول بالقادم لا تقل حرارته عن 50 درجة أبوية..كان يحيى.. يفرز أوراق ”الصيفي” عن مراجع الفصل الثاني..محاولا افساح رفوف”النملية” لكتب جديدة ستأتي في الفصل الجديد، وترحيل القديم منها الى ”السدة”…اقترب أبو يحيى من ابنه..وقف قليلا فوق رأسه..هم بالخروج – بعد أن حدثته نفسه ان الوقت غير مناسب – ثم عدل عن رأيه واتكأ على وسادة مقابلة وقرر فتح الموضوع المؤجل..* أبو يحيى- جبت لك بنطلون رياضة… قدرته؟!.* يحيى: لا والله بعدني..* أبو يحيى: قدره بس تخلص!!..سكت قليلا ثم قال : زي ما طلبت بــ 3 خطوط ، بدون سحاب جيبة مشان ما يوجع فخذك اذا قلبت على جنبك اليمين.* يحيى: يطول عمرك يابا…يلاحظ ابو يحيى انهماك ابنه في ترتيب الكتب و”الدوسيات”..وحبات عرقه نبتت على جبينه وهو محصور في الزاوية..فيقوم بفتح النافذة الغربية وارجاع الستارة الى خلف فردة الشباك..ثم يعود ويجلس ..هيك أبرد، يقول ابو يحيى …فيعلق يحيى بإيماءة تفيد التأكيد ..يحاول ابو يحيى النهوض ثانية وإشعال المروحة السقفية سائلا ابنه: ادير لك المروحة يابا..فيرفض يحيى كي لا تطير الأوراق المعزولة وتختلط بغيرها…فيهم ثانية بالجلوس ..* ابو يحيى: سمعت اشي عن ”قبولات” الجامعة!!* يحيى: يعني اسبوع 10ايام بالكثير بتكون طالعة..* ابو يحيى: يابا شو بدي أقول…* يحيى وهو يمزق ورقة أسئلة قديمة : قول يابا..* ابو يحيى: لو طلع لعايش مقعد ”بعيد الشر”..شلون بدنا نقريه؟…* يحيى وهو يحشو ”الدوسيات” في الطبقة السفلى من النملية : مش عارف!!انت عندك حل؟! * ابو يحيى: بقول يابا.. طول عمرك جمل المحامل، شو رايك تقرا فصل وتعطل فصل..واللي بتعطل فيه هو بقرا فيه، واللي بيعطل فيه انت بتقر ا فيه..وهيك ما بتمر 8 او 9 سنين الا وانتو متخرجين على خير وهداة بال..عندها تمتم يحيى بكلمات قصيرة و متزاحمة وغاضبة على الأرجح انه قال: ”هيك هيك للي مصع الجامعات.ahmedalzoubi@hotmail.comأحمد حسن الزعبي
