زامور طوط .. أو .. طاط
#رائد_عبدالرحمن_حجازي
وهو في حالة عصبية مخاطباً صاحب محل لبيع قطع السيارات
مثقال : خيوه هاي ثاني مرة بنّحرق #الزامور إللي اشتريته من عندك ، شكلك مستهبلني وبتبيعني بضاعة ناكتة؟
صاحب المحل : له يا عمي الله يسامحك ! خير شو صاير معاك ؟
مثقال : صرت مشتري من عندك زامورين وثنيناتهم ما قعدوش عالسيارة يالله يومين
صاحب المحل : معقول هالحكي!
مثقال : معقول ونص وبالعلامة هاي الزامور الخربان والكيس مكتوب عليه أسم محلك ، ويوميتها صرت تحتشي(تحكي) لي بدك الزامور صوته (طوط ) أو ( طاط ) أو (بيب) ؟
صاحب المحل : غريب والله عاد هاظ أحسن نوع بالسوق ، طيب ممكن تحتشي(تحكي) لي شلون بخربن معاك ؟!
مثقال : الزامور الأصلي إللي أجا عالسيارة من بلادها انحرق معي وأني بزمر بفاردة #عرس ، والزامور الثاني اللي اشتريته من عندك كمان انحرق بفاردة عرس وهاظ التيلاني اللي بين ايديك انحرق ليلة امسات .
صاحب المحل : شكلهم أصحاب الأعراس بهمك أمرهم ؟
مثقال : لا والله لكن محسوبك بحب الانبساط وكل ما أشوف فاردة بطريقي بزُق حالي بين هالسيارات وأُخذ زوامير وطويطيات تا تشبع .
صاحب المحل : وهاظ الزامور الأخير كمان انحرق بفاردة ؟
مثقال : مشان الحلال والحرام لأ ما انحرق بفاردة لكن محسوبك ليلة أمسات شفت شوية شباب عاملين هُليلة بسياراتهم فقمت دحشت حالي بيناتهم واعطيتها #زوامير لأبو موزة ، وعقب التالي هالمخسوف انحرق .
صاحب المحل : ولا يهمك عمي هسع بحل لك المشكلة من أساسها .
غاب صاحب المحل لمدة بسيطة داخل المحل وعاد للكاونتر ومعه مجموعة من الأشياء ووضعها أمام مثقال وراح يشرح له عن ما هية هذه الأشياء وقال له : عموه خلي ذهنك عندي ، هاي أربع زوامير الأول (طاط) والثاني (طوط) والثالث (بيب) والرابع (بيانو) وهاي معاهن أربع فقسات (كبسات) بتخلي الكهربجي يركب لك اياهن عالسيارة وكل زامور فقسته لحالها وهيك بصير عندك أربع زوامير وإن شاء الله مشكلتك مع الزوامير بتنتهي .
