غطيطة
غطيطة كلمة عامية نحكيها لما يكون الجو كله ضباب ومو قادر تشوف شي حواليك..يعني زي الاطرش بالزفة..او سارحة والرب راعيها…ما تقدر تتلفت يمين ولا يسار ولا حتى ترجع للخلف .. ولا حتى تقدر تتوقف … لانه اكيد الي جاي من وراك رح يصطدم فيك ويضربك..
بدكوا الصراحة حالنا هالفترة كانه عايشين في اجواء كلها غطيطة…
احيانا تمشي بالشارع واصلا مش عارف وين بدك تروح او شو بدك تعمل ولا لشو اصلا جابك لهذا الشارع…غطيطة.
تقرأ في الصحف او تطالع الاخبار وتسمع رجل قتل اخوه عشان 20 ليرة… سبعيني انتحر… شاب رمى حاله من فوق عمارة… شابه حاولت الانتحار… شاب احرق نفسه… مو شايفين شي… غطيطة.
تقرأ ايضا … ضبط كميات كبيرة من الجوكر … سطو مسلح على سوبرماركت… سرقة منازل … اعتداءات من قبل اشخاص ملثمين واطلاق نار على آخرين… كلها غطيطة…
تمسك صفحة من كتاب وتحاول ان تقرأها ولكن ما تفهم منها شي… تعيد قراءتها مرة اخرى…ولكن بدون جدوى….الفكر مسكر وافكار توديك وتجيبك ومش قادر تركز… غطيطة.
تدخل سوبرماركت… تطالع التسعيرات… وتمسك الجيزدان حتى تشوف اذا المبلغ يكفي تشتري حاجاتك ولا لا… غطيطة.
تسمع لشخصيات لها وزن وتحكي انه المقاطعة اسلوب حضاري … يدل على وعي الشعب … ومن جهة اخرى تسمع انه تم اعتقال منشأ صفحة مقاطعة … غطيطة.
حتى وانت نايم وتحلم… تحس انه الاحلام تداخل مع بعضها البعض… تحاول ان تركز بحلم واحد او بشي واحد لكنك لا تستطيع… غطيطة.
نصيحة في حالة الغطيطة ما الك غير انك تشغل الرباعي… وتغني
( سوق على مهلك سوق بكرة الدنيا تروق)
