.الأول ع البكم

[review]

مقال يوم الأحد 15-1-2012

في اجواء احتفالية ، وزّعت بعض الكراسي البلاستيكية على سطح البيت..بينما تكفل شلاش وبعض أبناء الحي بتحطيب صناديق خضار خشبية كانت في المستودع ..ووضع حطامها في سطل مثقّب من جهاته الأربع  للتدفئة..ابو يحيى استغل وجوده على السطح لتفقد جاهزية المزراب ،بينما بقي عايش منشغلاً بتجريب  بعض الأشرطة على مسجله القديم فوق الخزّان ..وفجأة انطلق صوت حسين السلمان مدوياً بالحارة " تتتتتتتت.تير شرش..تيرشرش..وتتتتتتتتت..يا الله سوا يا شباب"..حتى التأمت دبكة متوسطة الطول والجاهزية  من ابناء الحي..كان يقودها شايش وبيده مفتاح "غاز 23 "..بعد دقائق خرج يحيى من بيت الدرج يرتدي بدلة رياضة ويحمل  طبق فلين عليه مكعبات هريسة صغيرة وحول معصمه "سوار مرصوص من جِلد الغاز "..كل من كان يتناول مكّعب حلوى كان يغدق عليه بامنيات التفوق..وان شاء الله من زايد لزايد…مبروك يا كبير…رفعت راسنا بين الحارات يا وحش…"عقبال ما نشوفك بمستودعات المصفاة يا رب"..
صوت الأورغ  المرفق لــ"الدق الألماني"  وخبط الأقدام فوق السطح..اثار فضول الجيران..مما دعا ابن تركية لفتح نافذته المطلة على سطح منزل ابي يحيى ليسأل:

- ابن تركية: الف مبروك..يا جار
- ابو يحيى: الله يبارك فيك!
- ابن تركية: خطبة ولا نجاح؟
- ابو يحيى:يضع يده على اذنه كناية عن عدم سماعه لسؤاله … ثم يؤشر لأبنائه لأن يخفضوا صوت المسجل قليلاً ليسمع صوت جاره
-  فيصيح ابن تركية باعلى صوته: خطبة ولا نجااااااح!!
- ابو يحيى: لا والله نجاح!!
- ابن تركية: لمين؟؟
- ابو يحيى: للبطل يحيى!
- ابن تركية: ..يعني طلع  الأول ع القسم؟؟؟..
- ابو يحيى: لا والله..طلع الأول ع البكم ..
- ابن تركية: مش فاهم؟؟
- ابو يحيى: زي ما انت عارف في أزمة غاز بالبلد.. فيحيى أول ما شاف بكم التوزيع ، زي النمر تعربش عليه ..وبدّل جرة الغاز ونزل…
- ابن تركية: يا الله الف مبروك..
- ابو يحيى: يبارك بعمرك ،وعقبال عند "جرّتك"..و"جرّة" كل مشتهي يا رب!!