خربطة بالحساب..
د. ماجد العبلي
حدثني صديق قال: في أحد مشاويري بسيارتي إلى إربد، وبعد جسر جابر بقليل، أشَّرَ لي رجل كبير، فخجلت، وتوقفت له وأركبته معي، فقال إنه يريد النزول عند جسر مستشفى الملك المؤسس. فقلت: حياك الله يا حجي..
ودار بيننا حديث قصير ثم سألني: كم الأجرة؟ فقلت له: أنا لا أعمل بالأجرة، ولكني حملتُك معي لوجه لله أولا، واحتراما لسنك ثانيا.
ولما تأكد من مصداقية كلامي، قال: أنت شخص محترم، فشكرته..
لكنه استدرك قائلا: أنا دايماً أدفع نص ليرة لهذا المشوار، ولكن كونك ما بتوخذ أجرة، فبِدّي أكافئك بخمس نصايح من أم البريزة بدل النص ليرة..
فتبسمت ضاحكا بدهشة، فقال: قريت كتاب قبل فترة لواحد أجنبي كله نصايح من أوله لآخره، واستفدت منه كثير، وبدي أفيدك. قلت مندهشا: تفضل، فقال:
لازم تعرف يا ابني إن الناس يِجهدوا بلاك على طول حتى تصير ملعون والدين؛ ولكن شو ما سوّوا، شو ما سوّوا، خليك محمود والدين.
والناس يْدِزّوك دَزّ حتى تصير ابن حرام؛ ولكن شو ما سوّوا، شو ما سوّوا، خليك ابن حلال.
والناس يجرّوك جرّ حتى تصير وسخ؛ ولكن شو ما سوّوا، شو ما سوّوا، خليك نظيف.
والناس يدحشوا إيديهم بحلقك حتى تغلط عليهم؛ ولكن شو ما سوّوا، شو ما سوّوا، خليك صبور.
والناس يْقَنّوا لك تْقِنّي حتى تصير بارد وجه؛ ولكن شو ما سوّوا، شو ما سوّوا، خليك محترم.
والناس يحاولوا يورطوك حتى تصير حيوان؛ ولكن شو ما سوّوا، شو ما سووا، خليك إنسان.
ثم اضطرب قليلا لمّا شعر أنه زاد عن الخمسة؛ فبادرته بالسؤال، فقال: والله يا بنيّي شكلي خربطت بالحساب. قلت له: ما في مشكلة: زيادة فائدة. فقال: ما فهمت عليّ يا بنيي؛ فقلت له: كيف؟ قال: النصايح الخمسة الأولى من أم البريزة، ولكن النصيحة السادسة من أم النص ليرة؛ فتبسمت قائلا: والمقصود؟ قال: ناولني نص ليرة: نطلع خالصين!
