نظرية داروين والاولاد في رمضان
كنت زمان مش مقتنع بداروين ولا بنظريته “نظرية النشوء والارتقاء” اللي بقول فيها “ان الانسان اصله قرد وهيكا”………..بس بصراحة بلّشت اقتنع شوية بكلام داروين هاي الايام، خاصة بعد ما صرت اشوف الاولاد اللي مثل القرود اللي بظلهم يلعبوا بالمساجد وبطخّوا فتاش وبصيروا يتهاوشوا ويتباطحوا ويجّاحشوا ويصيحوا وينطّوا والناس بتصلي التراويح…….. والمصلين ببطلوا يجمعوا واصلا همو يا دوب يخشعوا بدون اولاد بتفقع فتّيش، كيف عاد واولاد بتفقع فتّيش وبتنط فوق روسهم
وبعد ما يسلّم الامام بين كل ركعتين ما بتلاقي ولا واحد منهم، كلهم بفلّوا، وبس يرجعوا المصلين يصلّوا بردّوا يرجعوا مرة ثانية، يعني عارفين انه شغلهم غلط !!!
واخر شغلة عملوها سرقوا كندرة محافظ جرش وفلّوا والزلمه طلع يلاخم …….ولكو الله لا يعوّضكو ما لقيتوا غير المحافظ تسرقوا كندرته ؟؟…يعني الزلمه بجوز يكون جديد لنج على الصنعة “يعني من المؤلفة قلوبهم” ويمكن كانت امتحان اله، وبجوز ما يرجع مرة ثانية بسببكوا، بعد ما سرقتوا كندرته وخليته حافي وروّح على مرته بزنّوبه خربانه لقاها بباب الجامع، ان شاء الله بس ما يرسب بالامتحان بعد هالعملة العاطلة ..طيب ما فكرتوا بموقفه قدام مرته وهو مروح عليها ومدلّي اذانه ولابس زنّوبه مقطعة ؟؟؟
الله يخرب شيطانكو ولكو فضحتوا هالزلمه…والله ابليس ما قدر عليها !!!!!!!!!!!
