أبو قنوه …..وهلوسة تغيير حكومي !!!!
أبو قنوه …….مساء الخير يا استاذ ……قوك او كيف حالك هههههه!!!!
اهلا ابو قنوه ……صارلك يومين غايب وين غايب هات خبرني ……!!!!
أبو قنوه ……اسكت ولا تجيب سيره لحدى صار لي يومين بروح على العاصمه عمان !!!!
ههههههه خير ان شاء الله اللهم اجعله خير فيه الك معامله او مراجعه بموضوع معين !!!
لايروح بدك تتوظف او رايح ادور على حقك او دورك بديوان الخدمه المدنيه يا مسخم !!!
او بدك تعمل الك مشروع ومخبيه عني ولك يا ابو قنوه ………!!!!
صاير عندك أسرار ……..من وراي يابو قنوه …….!!!!
أبو قنوه …..الله اكافينا شر هاليوم الاستاذ ما هو مصدق او يمسك علي ممسك شو قصتك يا أستاذ أصحى او صحصح معاي لا ارقعك بهالقنوه بنص راسك !!!!!
طيب هاي انا صحصحت ….هات وشو فيه عندك ….خبرني ياطير !!!!
أبو قنوه ….والله يا استاذ رحت اتقصقص واستطلع واتلصلص عن أخبار التغيير الحكومي الجديد …..أتشمشم أخبار !!!!
هههههههههههه الله يخرب بيتك يابوقنوه ….صاير صحفي استقصائي والله مانت قليل يابو قنوه !!!!
أبو قنوه ….ولا ياعم بدي اصير اشطر منك …..بدي اصير صحفي !!!!
هات لشوف وشو اللي وصلت اله من أخبار او معلومات هات لنسمع منك !!!!
أبو قنوه ….والله يا استاذ اني شفت العجب كل كبار عمان كل واحد بقولك والله اني انا اللي خدمت البلد او وقفتها على حيلها !!!!
الله اسقط حيلك او حيلهم ….هذا كيف لو ماهما اللي نهبوها واتهربو من الضرايب هذا شو بسولفوا !!!
أبو قنوه …..يارجل مهووسين الكل بده كرسي من هالشعب المسكين او بده احوز واكوش اله ولاولاده او حبايبه !!!!!
والتغيير شو بتتوقع انت كيف راح اصير ……..!!!!
أبو قنوه …….ههههههههههههه ماهي معروفه عنزاتك يا جحا واحده قايمه او واحده قاعده !!!!!
ما فهمت كيف يعني وا شو دخل جحا بالموضع تبع التغيير يا بو قنوه افهم كلامي او خلينا بصلب الموضوع بلاش اتضيعنا بسوالفك الهامله مثلك يابو قنوه !!!!
أبو قنوه ……انا هامل يا استاذ طيب رايح افرجيك ………!!!!
روح بلط البحر …….ايوه زعلتني يابو قنوه خلينا بالتغيير بس انا بدي أقولك كيف التغيير …….تغيير طواقي بس مثل طواقي الكذاب …..غوار الطوشه !!!!
أبو قنوه …..هسه انت ليش قلت عني هامل …….اسحبها احسن الك والا بخلي دمك يتعفر بهالقنوه !!!!
أنا بقولك ليش هامل أشي ما بخصك لويش داس مناخيرك فيه هذول ربع عمان دوله لحالها مش من الشعب الشعب بس عليه اصفق وادحي دحيه….. أو رايح تتشمشم !!!
اخخخخخخخخخخخخخخخخخخ ايييييييييهههه الله لا يجبر عليك او على قنوتك يابو قنوه هذا طلع واحد ثور !!!!!!!
الكاتب والشاعر نايف السليم
nayef_alslayem@yahoo.com
