المشهد الأول
أبو كركوب يجلس في المقهى على طاولة واحدة مع ابو مركوب بشكل متقابل، ابو كركوب يدخن النارجيلة وأبو مركوب يدخن سيجارة … كاسات شاي فارغة امامهما، يبدو عليهما الملل الشديد وهما ينظران الى بعضهما.
أبو كركوب يخاطب ابومركوب:
– ليش بتجحر فيي!!
– أنا ما بجحر فيك انته اللي بتجحر فيي.
– كيف عرفت إني بجحر فيك لو ما كنت بتجحر فيي؟
– وانته كيف عرفت إني بجحر فيك لو ما كنت بتجحر فيي؟
– انته إلي حجرت الأول
– لا انته اللي جحرت الأول
– طيب كيف عرفت إني جحرتك بالأول لو ما كنت بتجحر فيي.
المشهد الثاني
ابو كركوب وأبو مركوب يتجادلان بذات الطريقة.
يقترب منهما رجل ويخاطبهما:
– يا جماعة الخير روقوا وروقوها شو القصة ؟؟
(ابو مركوب وأبو كركوب يتحدثان بشكل متداخل كل واحد منهما يحاول إثبات وجهة نظرة وتتداخل الكلمات والأصوات):
– لو ما كان جحرني بالأول كيف عرف إني بجحر فيه؟
– هوة جحرني بالأول
– لا انته اللي جحرت الأول
– كيف عرفت إني الأول لو ما كنت جاحرني قبل ما اجحرك
يجتمع عدد من الرجال يؤيدون موقف ابو كركوب، وعدد اخر يؤيدون أبومركوب.
جماعة ابو مركوب تتناقش مع جماعة ابو كركوب بشكل أكثر حدة
– لا أكيد هوه اللي جحره بالأول
– طيب كيف عرف انه حجره لو ما كان بجحر فيه قبله؟
يشتبك واحد من جماعة ابو مركوب مع واحد من جماعة ابو كركوب، ثم يشتبك اثنان آخران حتى يشتبك الجميع مع بعضهم بالأيدي والكراسي والعقال (المرير)… أحدهم يسحب خنجرا ويشتبك مع آخر يحمل سكينا.
المعركة ما تزال مستمرة مع إنهاك واضح على المتقاتلين.
ابو كركوب وأبو مركوب يجلسان على طاولة بعيدة وينظران الى المتقاتلين.
– ليش هذول داقين ببعضهم؟
– وإحنا شو دخلنا دوشونا!!
(رجل مصاب بسكين يقترب منهما رويدا رويدا ثم يقع …
ابو كركوب يضع بربيش نارجيلته في هدوء ويقول لأبي مركوب:
– قوم يا زلمه خلينا نشوفنا مكان أهدا من هالمكان… شو هاظ صارت طعة وقايمة؟؟
ابو كركوب وابو مركوب يتأبطان ذراع بعضهما البعض ويخرجان بهدوء
والمعركة ما تزال مستمرة بين جمهوريهما.
