أم عجاج …قائمة ..كتلة …حشوه ..!!! / يوسف الابراهيمي

أم عجاج …قائمة ..كتلة …حشوه ..!!!
تعرف يا أبو عجاج أني بحب أحكي معك با السياسة لأني بحس أنك بتفهم بكل شيء صلاة النبي عليك…وبس أسألك لأنك بتفهمني كل شيء… والله أنا بحسد حالي أني أخذتك ول عليك شو بتفهم يا حبيبي … إيه إيه …وطي صوتك يا مره شو ها ألحكي….حبيبي ما حبيبي ..هسع بسمعونا الأولاد…طيب بمناسبة ألحكي عن الفهم والشطارة تبعوني… شو كنتي بدك تسأليني ..؟؟؟ آه والله تذكرت ..كنت بدي أسال عن الانتخابات والقانون الجديد …والله مش فاهمة شي منه …قائمة وكتلة وحشوه ..شو قصتهم والله أنلخمت لخم من الفيس والأخبار….(أبو عجاج ) عمى العمى على هيك سؤال (بصوت خافت جداً) هو أنا فاهم شيء من قانون الانتخاب …والله أستاذ عواد أبو الرياضيات الله يرحمه لو يشوف ها القانون ما قدر يفهمه .
طيب طيب …أسكتي هسع بفهمك ..أول شيء جيبي مخدة صوف …وقلم خطاط كبير وأقعدي هون …أفرطي المخدة وطلعي الصوف إلي جواتها كله …إيه إيه …ليش …؟؟؟ خلص سوي مثل ما بحكيلك …ماشي خلصت .. هسع جيبي قلم الخطاط هسع أكتبي على وجه المخدة الفاضيه أسم مرشح أنتي متأكدة انه رح ينجح … هيني كتبت …أكتبي كمان ثلاث أسماء غير الأول ..هيني كتبت ثلاث أسماء غيره …ماشي هسع حطي وجه المخدة فوق الصوفات … هيني حيطتهم اها …هسع صار عندك قائمة أسماء وكتلة صوف …هسع أحشي الصوفات بالمخدة …هيني حشيتهم …هسع صار عندك قائمة وكتلة وحشوه…..صح …؟؟؟؟ اه والله صح …طيب يا أبو عجاج المخدة ما تغير عليها شيء بعدها مخدة …. ومجلس النواب ما رح يتغير عليه شيء …أحنا ألي عملناه انه نزلنا عدد مرشحين أكبر وقوائم وكتل وحشوات أكثر ومجلس النواب رح يرجع زي ما كان …فهمتي يا أم عجاج ..( صوت مذيعة على التلفزيون تقول ..ما لم نرتقي إلى المواطنة والمجتمع المدني الحقيقي …سنبقى مثل المخدة ) سمعت يا أبو عجاج المذيعة بتحكي عن مخدتك ..مش حكيتلك انك فهمان صلاة النبي عليك جايبين عن مخدتك بالتلفزيون.

اظهر المزيد

مقالات ذات صلة

اترك رداً

زر الذهاب إلى الأعلى