سعيد و #قهوة #العميد..
بقلم: د.فلاح العُريني.
توجهت إلى الدكان الساعة السادسة صباحاً، مثلي مثل أي مسؤول واصل في هالبلد، الكل بطلع يلقط رزقه، ناس بالحلال وناس بالحرام..
فتحت الدكان وتعوذت بالله من الظلم والفقر والقهر..
وما هي الا دقائق حتى حضر عندي سعيد المصري..
سعيد: صباح الخير دُكْتُر.
هلا وغلا سعيد، فوت جاي اشرب كاسة شاي على شيخ لايلحقك البرد (لازم ازبط حالي معه حتى اكسبه زبون).
سعيد: متشكرين ياباشا (طبعا كل الشعب عندنا صار معالي وباشا، وأنا اكيد بطلعلي باشا صيني).
أُؤمرني ياسعيد..
سعيد: باكيت قهوة العميد يافندم.. (مرة باشا ومرة افندم.. تصريحات سعيد متناقضة مثل وزير اعلامنا).
قمت وناولته الباكيت واعطاني خمس نيرات، ورجعتله نيرتين..
سعيد: شو دا ياباشا..
انا هاخذ الباكيت بدينارين ونص.
ليش ياسعيد شايفني وزير التنمية الاجتماعية ولا مكتوب على دكانتي صندوق المعونة الوطنية.
ياسعيد كرتونة قهوة العميد فيها ٢٠ باكيت، وحقها ستة وخمسين نيرة، يعني الباكيت بطلع نيرتين وثمانين قرش..
اشلون ابيعك اياه بنيرتين ونص؟
شو قصتك ياسعيد؟ هااااا؟
احكي ياسعيد، شو مفكرني؟
والك قول ياسعيد..
اسمعني ياسعيد..
انا خيوه ماببيع بخسارة، عارف ليش؟
انا مش الحكومة الأردنية اللي باعت ارض العبدلي بالناقص، وبارخص الاثمان.
انا مش الحكومة الأردنية اللي باعت الفوسفات بثمن لايساوي مرابح سنة واحدة.
انا مش الحكومة الأردنية اللي اخذت قروش الضمان الاجتماعي ومارجعتهم للان.
انتبه ياسعيد..
ترى الحكومة لاتمثلنا بهيك سوالف..
عندي قدرة اجوع واعرى واتحمل القهر والضيم بس ماببيعك بخسارة، ماعندي استعداد اخسر ثلاثين قرش في باكيت القهوة ياسعيد..
عارف ليش؟
لأن الدكان واللي فيها من بضاعة مش ملكي، هاظا اصول الأسرة وملك أولادي وأنا مجرد بائع مؤتمن..
إذا الحكومة باعت حقي ياسعيد أنا ماببيع حق اولادي..
افهمني ياسعيد وفرق بين البخيل والمؤتمن الله يرضى عليك عموه..
لو الحكومة كانت تتعامل معنا مثل ما أنا بتعامل معك الان كان مالقيت كل الدكاكين الوطنية محتلة من مستثمرين اجانب..
أنا ياسعيد بتعامل معك من باب المصلحة بحيث اني استفيد منك وتشتري مني، عكس مابتتعامل الحكومة الأردنية مع المستثمر..
أنا ديمقراطي وحريص عالدكانة لأني بسمع انتقاد اولادي بس ارجعلهم ويسالوني:
شو بعت؟ وقديش بعت؟ وقديش ربحت؟
لو الحكومة بتعرف ان وراها شعب ومجلس نواب يسألها كان عرفت كيف تتعامل مع اصول الدولة واموالها..
لكن ياسعيد يبدو ان الوطن اصبح في نظرهم دكان ببيع جملة ومفرق لصالح التاجر، وان التاجر عقيم لم ينجب..
ترى ياسعيد التاجر اللي ماخلف واللي ماوراه عيال مابهمه الربح والخسارة، واذا راحت الدكان بهاجر التاجر، وهذا حال حكومتنا ياسعيد امضت العمر عاقر لاحبلت ولاجابت..
واللي مثلي ياسعيد وين يهاجر؟ وكيف يترك وراه كوم لحم؟
والحين ياسعيد لسا بدك قهوة العميد؟
سعيد: اكيد يافندم وخذ السعر اللي انت عاوزه..
لا ياسعيد خذ القهوة وبالحرام إذا بوخذ حقها، بس أنا كنت بدي اعلمك ان بلاد العرب اوطاني والحال من بعضه..
على رأي اخوانا الكركية..
