لعنة الطفوله تلاحقني .. / محمد بني يونس

لعنة الطفوله تلاحقني ..

قديما و ايام زمان … كنا نصفر لبعض على السطوح و نلتم من التسعه الصبح عشان نلعب فطبول بالشارع … و من اول صوت ننكحش من الشارع عشان البصل المزروع لجارنا … نشيل حجارة المرمى و نغير المكان … كمان بننكحش عشان البصلات المزروعات عند الزلمه الثانيه ….

و اخيرا عملنا ملعب بنصه رجم حجار( احجار فوق بعض على شكل تل صغير) ولأنه لازم النكد يلاحقنا … بيطلعلك صاحب الفطبول … ذلك الشخص الاكثر سيطره في العالم .. الأكثر استفزازا و الاكثر تعجرفا … اكثر شخص ممكن تترجاه بعمرك … مش لازم تخالف رأيه … فمثلا شات الفطبول و مرت من فوق الغيوم و مرت على دار ابو المنذر و حكى هاي هدف … عندها يجب ان ترمي رأسك بالارض و تعترف بالضعف و تقول نعم هدف … لأنه لو ما عملت هيك رح يشيل الفطبول تحت ابطه و يروح و اذا الحقته تترجى بيحكيلك : “برجع بشرط انه الهدف عن هدفين” … انها لعنة طفوله
اذا البوت الصيني ابو الشرايط انمحى من تحت و صرت تمشي و تزحلق لحالك لدرجة انه العالم بتفكر معك شلل اطفال او خلع ولاده … اعرف انك من نواتج لعنة الطفوله …

بعد اكثر من 15 سنه على طفولتي … بتمشى بالمول و طفل بيلعب ب فطبول خفيف … شافني و ابتسم و طبعا حبيت العب دور الشب الظريف و الكيوت و العبت معه … و اثناء مرور الطابه لعندي و قبل ما المسها … بتفاجأ برجل أمن المول بيحكيلي : “لو سمحت العب برى … انته كبير و بتعرف انه هون ما بيصير لعب …” عندها يجب ان ترحب ب “لعنة الطفوله”

ايها الامن العزيز … صاحب المول مش زارع بصل بالمول … ثم انه مش صاحب الفطبول …
لكنها .. #لعنة_الطفوله !!

عندما تزرع الحكومه #بصل … و الوطن يتعبى #رجوم … و الشعب مش عارف وين #يلعب …
اعرف انه لازم تترجى #صاحب_الفطبول

ملاحظه: كل المعلومات الوارده واقعيه و صحيحه

اظهر المزيد

اترك رداً

زر الذهاب إلى الأعلى