النواب والميزانيّة والكورونــــــا
نهيل الشقران
– مرحبا حجّه
– هلا حجّي
– شفتي؟ والله هالنواب ما قصّروا بهالحكومه، ما خلوا طلب إلا وطلبوه
– شوفتك الحكومه بتلبي هالطلبات كلها؟؟
– حجه مالك انتي مجنونه؟؟
– ليش حجي مالني؟؟ أني شو حكيت ؟؟ ترى ما كفرت
– والله إذا بدهم يلبوا ربع الطلبات بدهم ميزانية اميركا ما بتقديهم
– لعاد لويش دخلك بطالبوا ؟؟ وانبحّت اصواتهم وهم يحكوا؟؟ ويناقشوا
– يعني لويش دخلك؟؟ صحيح في منهم محترّين على الوضع الاقتصادي اللي احنا فيه، وبدهم وظايف للناس، ومشاريع انتاجيّه، بس كثير منهم عارف الحقيقة، وإنّه ميزانية الدولة ما بتكفّي مطالبات عشر نواب لحالهم، بس مجبورين قدّام اللي انتخبوهم بدهم يطردوا عذر ويبينوا انهم طالبولهم باللي كانوا يقولوه أيام الحملات الانتخابيّة.
– والله اني فكّرت انهم رح يقضوا على البطالة ويشغلوا هالشباب العاطل عن العمل.
– خليكي ظلي احلمي، والله في شباب حوينه فيهم الشغل، لأنهم اذا ما توفرتلهم وظيفة مكتبية ما بشتغلوا
– لا انت غلطان بهاي، والله في ناس مهي ملاقيه الخبز، ومستعدين يشتغلوا بالفاعل ( عمّال )
– يا حجه هي الكورونا خلّت شغل بكل لبلاد؟؟ خليها على الله بس، والظرف اللي بنمرّ فيه كلّ العالم بمرّ فيه مش بس عندنا.
– خليها على الله، الله يفتحها بوجه الجميع، ويفرجها عالجميع.
– آمين آمين يا رب العالمين.
