بعيداً عن الوجع ” أبو لطفي وهيلاري” / عودة عياصرة

بعيداً عن الوجع ” أبو لطفي وهيلاري”

ذكرت صحيفة أمريكية أن هيلاري كلينتون تقدمت بدعوى طلاق من زوجها بيل كلينتون ، وقد اتفقا على الإنفصال بعد مشادة كلامية حدثت بينهما البارحة .

اذاً ما الذي حدث ؟

وصل بيل كلينتون من عمله وابنته تشيلسي في البيت لوحدها ، سألها والدها : وين أمك يا بنت ؟

مقالات ذات صلة

تشيلسي : حكت معها خالتي جيلاري لبست وطلعت معها والله ما بعرف وين

بيل كلينتون : اه مهو رخيت الحبل لأمك ولا كأنو فيه زلم بالدار

تشيلسي : حكتلي بس ييجي ابوكي سخنيله ملوخية هيها بالثلاجة

بيل كلينتون : بديش أتسمم

بقي بيل كلينتون مستيقضاً حتى صلت هيلاري
في ساعة متأخرة من الليل .

بيل كلينتون : وين كنتي ؟

هيلاري : رحت مع اختي على حفلة عيد ميلاد ابن سلفها.

بيل كلينتون : شوفي يا مره انا احترمتك ونزلتك للإنتخابات الامريكه وبدون فايدة ، من اليوم وطالع ممنوع تطلعي من الدار الا بس تطلبي اذن مني

هيلاري : والله ما حزرت ، حره أنا وقت ما بدي بطلع ووين ما بدي بروح .

بيل كلينتون : حكتلي امي الله يرحمها انك قوية وما بتنعطي عين ، الحق علي مش عليكي .

هيلاري : اه وما حكتلك حماتي انك فضحتنا مع الشرشوحه مونيكا لوينسكي وخليت اللي بيسوي واللي ما بيسوى يحكي علينا .

بيل كلينتون : وشو اللي بدك ياه يا مره ؟

هيلاري : بيل يا بتطلقني يا بخلعك أنا .

بيل كلينتون : انتي طالق طالق طالق مع مية مقلعه .

ابو لطفي المسكين من بعد ما توفت الحجة ام لطفي وهو يدور على عروس ، مريت عليه على الدكانه أشتري فريكه فسألني شو فيه اخبار عموه حكيتله هيك هيك انو الحكومة رفعت أجور النقل العام وانه هيلاري تطلقت ، طلب مني افرجيه صورتها وفعلاً فرجيته صورتها بالفستان النيلي ، بلع ريقه وفتحلي علبة سفن أب قزاز وأعطاني سيجارة هيشي بعدين حكالي قرّب شوي يا ولد : اسمع عموه من توفت أم لطفي وأنا بدور على عروس مش ملاقي ، اذا هيلاري بدها الستيره احكيلها وأنا بحكي للمختار وأبو محمود نروح نطلبها من خوالها بس بشرط انها تخبزلي على الصاج كل يوم وانو ممنوع تطلع على اهلها بموسم الزيتون لأنه عندي تنكة زيت أحسن من كل أمريكا .

الرجاء من الجالية الأردنية في الولايات المتحدة الأمريكيه أن توصل رسالة أبو لطفي الى الحزب الديموقراطي أو الى أحد أقارب هيلاري ونيّال من وفّق هيلاري وأبو لطفي بالحلال .

اظهر المزيد

اترك رداً

زر الذهاب إلى الأعلى