|
حسب الظروف
21/7/2010
 منذ زمن وتغيير المهنة يراودني ..لكن بدأت الفكرة تنمو بشكل "هرموني" عندما صرت أجلس عند صديق "المعثرين" حسن ابو علي في كشكه الملاصق للبنك العربي ولحلويات حبيبه..
طوال فترات جلوسي كانت الناس "تدب" على الكنافة وتدير ظهرها للثقافة بشكل مثير للرعب ..و لم يكونوا ليقتربوا من الكتب والمجلدات والمراجع الا لرمي الصحون الفارغة والمحارم المشبعة بالقطر في دلو القمامة القريب..
***
لا بل كان يتضاعف هاجسي بضرورة تغيير المهنة كلما جاءت سيدة لشراء كتاب منال العالم لتعليم الطبخ بــ"30" دينار تدفعها عدا ونقداً ..بينما انظر الى كتابيّ سواليف والممعوط بــ 3 دنانير..وقد اصبحا "حمّام عمومي " للذباب وللحشرات الطائرة والزاحفة ..مما دعاني ذات مرة أن أطلب من "ابي علي" أن يعطي كتابي هدية +جوز جرابات+ معجون حلاقة مع كل كتاب يباع لمنال العالم ،لعلّ وعسى ان يقرانا أحد.
**
مقال أول امس الخاص بطريقة تحضير "الراحة" لاقى استحساناً غريبا عجيباً من جل الأوساط لا سيما ربات البيوت ، فوردتني عشرات الرسائل التي تطالبني في الاستمرار بصنع الحلوى وترك مهنة النقد المرّ..كما وصلني بعض "الايميلات" التي تسألني عن "طريقة تحضير اللزانيا" و"ام علي" ..و"ليالي لبنان"..و"اصابع زينب" ، وليسمح لي رئيس التحرير ان اجيب بعض الأخوات اللاتي استفسرن عن بعض الطبخات كون المقال هو الطريقة الوحيدة للتواصل معهن :
الأخت فزة من اربد: شكراً على ثقتك ، يبدو ان مقدار الماء في "عمل الراحة" التي حضرتها كانت اكثر من اللازم ..حاولي مرة اخرى.
الآنسة نوال دندرمة من ليبيا: في مقالات قادمة سنشرح صناعة البرما بالفستق الحلبي .
ام سلطان من الامارات العربية: شكرا على المتابعة وطلبك ملبى ان شاء الله، سلامنا لأهل الامارات .
الأخت ميثاء من البحرين: قريبا جدا سنشرح طريقة عمل البقلاوة ومدلوقة القشطة.
**
والآن مع تحضير العوامة او لقمة "الشو اسمه":
المقادير: 2 كأس من طحين "زيرو"،2كأس سكر ، 4 كؤوس من الماء،ملعقة كبيرة من الخميرة سريعة التخمير،رشة ملح، وزيت قلي.
طريقة التحضير:
يتم تحضير القطر من خلال تحريك مغلي الماء والسكر والليمون حتى يصبح لزجا وكثيفا ثم يترك ليبرد..يعجن الدقيق بالماء ويضاف اليه رشة ملح وملعقة كبيرة من الخميرة ثم يترك في مكان دافىء..بعد ان يتخمر العجين ، تبل اليد اليمنى بالماء كي لا يلتصق العجين ، ثم يؤخذ من بين الأصابع بالملعقة مقدار من على شكل كرات وينزل في زيت القلي الحار..الى ان يشقرّ لونها..احياناً يقوم البعض بقليها مرتين لتصبح "تفغش فغش"..ثم تغطس بالقطر ..وصحتين وعافية.
المقال القادم عن "كول واشكور" او "كول واسكوت"..حسب الظروف.
احمد حسن الزعبي
ahmedalzoubi@hotmil.com
|
1- لويش؟؟؟
بواسطة
دبل آر
22/7/2010 12:24:03 AM
حاولت جاهدا بعد أن قرأت مقالك مثنى وثلاث ورباع أن أفك طلاسم منع المقال من النشر فلم أصل لنتيجة.. سايق عليكو الله ..اللي بعرف يحكيلي ويوخذ صحن العوامة اللي بالصورة .
|
2- رائع
بواسطة
رولا
22/7/2010 12:26:54 AM
من كل الجريدة ما بقرا غير مقالك... الى الامام
|
3- كل شي بتكتبوا رائع
بواسطة
منى أحمد
22/7/2010 12:27:44 AM
أستاذ أحمد أنت مبدع للكلمة والفكرة في كل مقالاتك وفي كل شيء تكتبه فكلماتك غذاء للعقل وهذا ما ينقصنا...
لك مني كل الشكر والتقدير
|
4- 4/5 ممنوع
بواسطة
أبو إيثار
22/7/2010 12:28:08 AM
الله يسعد أوقاتك أخي أحمد
حتى طريقة عمل العوامة منعت من النشر؟ يمكن لأنه المواطن لازم ما يتعلم العوم؟!!!
أو يمكن المحرر راوده الشك ب ("تفغش فغش") فدرءاللشبهات ومنعا للظن منع المقال
|
5- ما جاوبتني
بواسطة
العنقاء
22/7/2010 12:28:53 AM
معلم احمد
سألتك عن الدندرما ما جاوبتني
اذا ممكن طريقة عملها وتغليفها وتقديمها واكلها
لقمة"الشو اسمه" الله يبعدنا عن بيوته وسراديبه
لازم الخلطة معها ملعقة نشا علشان"تئرش أرش" مش "تفغش فغش"
وكويس انك بالأخير ما نسيت تحطها بالقطر
مش قلتلك لازم توخد راينا احنا شيفات البيوت
يللا مو مشكلة مرة على مرة بتتعلم
المرة الجاية ما عرفنا
شو اللي راح نوكله ونشكر
وشو اللي راح نوكله ونسكت
ترى الاحتمالات اللي بقافية كثيرة
معلم أحمد
وصفة اليوم انت مظلوم فيها
ما لازم دمغولك اياها بالختم الأحمر
مع انه حلبت معهم صافي.
|
6- لا كول واشكور ولا غيره!
بواسطة
عبد الله سمارة الزعبي
22/7/2010 12:30:24 AM
شكله ما في غير كول وإنته ساكت لأنه ممنوع من النشُر..
شكله هاي المرة كان فيه مع رئيس التحرير مجموعة من الشباب الطيبة للتحليل والتنبيش والتفتيش عن ما يمكن أن يعني شيء في حال لو فهم أحد من الأمر شيء!
عجيب غريب ووالله ما هو الواحد داري عن إشي..
خليها المرة الجاية عن الكرابيج أحسن؛ إلها أكثر من معنى ابن العم..
|
7- ما جاوبتني
بواسطة
العنقاء
22/7/2010 12:31:18 AM
معلم احمد
سألتك عن الدندرما ما جاوبتني
اذا ممكن طريقة عملها وتغليفها وتقديمها واكلها
لقمة"الشو اسمه" الله يبعدنا عن بيوته وسراديبه
لازم الخلطة معها ملعقة نشا علشان"تئرش أرش" مش "تفغش فغش"
وكويس انك بالأخير ما نسيت تحطها بالقطر
مش قلتلك لازم توخد راينا احنا شيفات البيوت
يللا مو مشكلة مرة على مرة بتتعلم
المرة الجاية ما عرفنا
شو اللي راح نوكله ونشكر
وشو اللي راح نوكله ونسكت
ترى الاحتمالات اللي بقافية كثيرة
معلم أحمد
وصفة اليوم انت مظلوم فيها
ما لازم دمغولك اياها بالختم الأحمر
مع انه حلبت معهم صافي.
|
8- شيش برك
بواسطة
ابو عرب
22/7/2010 12:32:44 AM
شو صار بوصفة الشيش برك الي طلبتها منك الحجة !!!
|
9- صباحكم سكر
بواسطة
ام احمد
22/7/2010 12:33:18 AM
أصبحكم الله بأحلى الأوقات وأسعدها ، شكراً على وصفاتك الحلوة ،وللتصحيح لا داعي لتحريك الماء مع السكر واتركه يغلي لحد ما بِدّه. المهم بالآخر رجعت للمشاكسة...
هل تعلم أن هنالك أكلة اسمها ( سَد الحَنَك ) آه والله أكلة مصرية بس بتلزم برضه.
أخي.. بالنسبة لكتابيك الجميلين ، واله اننا نسهر سوياً ونتذكر أيام زمان ونضحك إلى أن تسيل دموعنا على هذيك الأيام ، أصدقك القول أنك في كتاب سواليف تأخذ القاريء في رحلة عبر الزمن الماضي الجميل بكل تفاصيله... أدامك الله وتحلى أيامك إن شاء الله .
|
10- اذا طريقة العوامه ما نشروها!!!!!!!!!
بواسطة
معاذ
22/7/2010 12:39:58 AM
شكرا يا استاذ احمد بس مش عارف كيف رح يصيروا ينشروا كتاباتك السياسيه لانه حتى طريقة تحضير العوامه منعوها من النشر.... خليها مبلوله عمرهم لاينشروا
|
11- الحكومة ربة البيت .. تصب الخل على الزيت
بواسطة
الطائر الحر
22/7/2010 12:40:33 AM
هههههههههههه والله رهيب يا الزعبي .. والله ما انت ناوي تجيبها عا خير الله يستر منك ... طيب فرصة اتغير اسمك لما اتغير المهنة ولازم يكون موديرن ... والله عشنا وشوفنا احمد الزعبي بكتب بالطبيخ شو صاير بالدنيا .. ومع هيك ما نشروووووووه هع هع هع :)
|
12- زلابيه
بواسطة
شجراوي
22/7/2010 12:46:41 AM
تحياتي أحمد حسن الزعبي بدنا طرقة عمل الزلابيه بد اذنك وطبخة اذان الشايب اذا ما في مانع
|
13- شو اسمو هاض
بواسطة
بنت البلد
22/7/2010 12:54:38 AM
عالعافية خيوه موتشدني اني من زمان ما طليت عليكو بس والله عالبال واني بقرا كل اشي بس ما بعلق لاني بكون مستعجلة
ويعدين شو هاي السواليف تغير ما تغير ول هيك بدك تقطع بينا الحبل بنص البير
اني عندي اقتراح انك الصبح صحفي وتالي تهار حلواني ولا بدك تصير تنافس منال العالم
وانت ناسي شو امك دايمن بتقلك اني بذكرك ( الله ستر عليك بالكتابة والا تشان زمانك متت من الجوع ) واصلا انت ما بتعرف تكون غير صحفي ومبدع كمان اي اذا انت بدك تغير شو نقول عن اللي ملزقين بكلراسيهم واللي اذا فك اللزق عنهم بيمسك بولادهم
|
14- غربة المثقف عن قضاياه
بواسطة
الــجــمــووح
22/7/2010 1:03:03 AM
لا عجب أن يعيش المثقف الممنوع من التفكير غربة حقيقية عن قضاياه ..
ولا عجب اذا رأينا الادباء في المطبخ او في مقهى يلعبون النرد والورق
وينتظرون الفرج من السماء ليسمح لهم بحرية رأي او ليمسكوا قلم .
يقال : إذا جف الحبر فالجهل آت .
|
15- اصابع زينب
بواسطة
الراعي الصغير
22/7/2010 1:07:06 AM
بعد اذنك يا ابو عبد الله انا
اشريت اصابع زينب جاهزة من مخابز الايمان في صويلح
يعني فتحت نفسي على الحلو
وسلامي الخاص الى ام سلطان وفزة وميثاء وجارتنا ام سعود في جدة
بس يا اخي شكلو رئيس التحرير تبعك معاه سكري
مشان هيك بمنع نشر مقالات طرق تصنيع الحلوى
فلهذا اسأله اذا كان ليس معاه ضغط اكتب طرق صناعة المعجنات والجبنة البلدية
والمخللات وشككوان
اما اذا معاه ضغط اكتب عن الطرق المثلى في وضع مسحوق الغسيل في الغسالة وطرق النشر الامثل والاوقات المناسبة للنشر في الصيف والشتاء
واوقات الذروة
|
16- مش حكتلك
بواسطة
حازم بريكة
22/7/2010 1:08:47 AM
مسائك سعيد يااجمل كاتب بالعالم
والله حكتلك ياابوزعبي وانشالله ترد علي.خليك بالحلويات والطبايخ.وصدقني غير تصير اشهر من هاي الي اسمها (منال العالم) ورح تحطها بجيبتك الصغيرة ويصير كتابك ينباع بخمسين ليره ومن عند صاحبك.وخلال ستة اشهر رح تصير مليونير.
وخلي حكومة سمير تطبخ زي مابدها
|
17- القالك حل
بواسطة
ابو الحسبان
22/7/2010 1:10:05 AM
ابو عبدالله
بصراحة كثير قلبي موجعني عليك عشان هيك لازم
تشمط الحكومة مقال كل مدح
والا تبطل تكتب وتشوفلك بسطة هرايسس
|
18- ضريبة التياسة
بواسطة
معاذ بدوان
22/7/2010 1:20:00 AM
عزيزي وصديقي أحمد
الجماعة مش بس مش طايقينك هاليومين , يبدو أنهم اكتشفوا الوعي الذي يسببه أمثالك !! يعني ببساطة لا تفكر تغير مهنتك ولا ما يحزنون بكل بساطة استمر استمر!! هكذا ببساطة لأن الشمس ما بتتغطى بغربال.
صديقي يبدو أن أمثالك يريدون ويحبون دفع ضريبة اسمها على اسم عنوان التعليق
بس الحلو بهالضريبة أنها بتخلّي أعصابك محروقة وضميرك مرتاح ولّا شو رأيك؟؟
أحمد وفقك الله...!!!
|
19- بس والله كنافة حبيبة كمان ما بتتعوظ
بواسطة
مشتهي كنافة حبيبة من السعودية
22/7/2010 1:25:02 AM
قرابة.. الثقافة على عيني وراسي والله يكثر من المثقفين وما يضل ولانسخة مش مبيوعة من سواليف؛؛؛
بس لاتزعل مني والله كنافة حبيبة اللي بدخلة البنك العربي ما بتتعوظ كمان؛؛ مابتلاقيها بكل الدنيا؛؛
قرابة الله يسامحك صدقني شطت ريالتي من آخر الدنيا على ذكر الكنافة
|
20- no comments
بواسطة
adnan
22/7/2010 1:51:40 AM
مقال حريقة يعني من الاخر . الله بيعين يا قرابة
|
21- سلاح نووي
بواسطة
بسام
22/7/2010 1:56:25 AM
هي صنع العوامة صار من الاسلحة البيلوجية اشي؟؟!
|
22- حتــــــــــــــــــــــــــــــى العوامة
بواسطة
هديل العجاوي
22/7/2010 1:58:20 AM
حتى العوامة يا أستاذ أحمد مُنعت معلش جرب طبق ثاني يمكن مكونات طبق الحلو مثل الخميرة فيها إنا .
زمان ما غطتينا يا كُرمة العلي .
|
23- الحل موجود بس كله مشاكل
بواسطة
مغترب في اخر الدنيا
22/7/2010 2:03:54 AM
كلو طبيخ.. بذكر عمل فني اليك استاذ احمد و الفنان موسى حجازين عن طبخت النيابه و كيف النائب بطبخ الناس... مهما حاولت تعمل ما راح يزلط معك الطبيخ لا هون و لى مع موسى حجازين. عندي اليك حل شو رايك اتصير تمدح في الحكومه بلكي مشية الامور.... بس المشكلة ما في شي تمدحه يعني هاي مشكله تانيه
الله يوفقك و الله يقويك
|
24- تفغش فغش
بواسطة
طلال الخطاطبه
22/7/2010 2:09:40 AM
أحسن تعليق على العوامة ورجني مرة من صديق يحب الحلو كثير فقال لي والله أكلنا عوامات بس تفغش الواحد بطلع القطر من أذانك. أنا لحد الآن مش عارف كيف بده يطلع.المهم خلينا بالموضوع وسؤالي هو هل هذا هو فقط ما وصلك بالأيميلات عن موضوع الحلو؟ أم أن هناك ملا يسمح به الرقيب.
مقالاتك عن الحلو ممتازة بس والله صدقني هظلاك المقالات أحسن من قرط التشعتشبان,مقالات النقد البنّاء المر.
تسلم ويسلم قلمك
بس عندي رغبة جارفة أن أرى صورة جوز فزه. نحنا شفتا أبو يحيى أسم الله على عيونه, بس جوز فزة أكيد شواربه مهودلات.
|
25- ليالي لبنان
بواسطة
محمد الخطاطبة
22/7/2010 2:13:03 AM
استاذ احمد لو سمحت طريقة عمل ليالي لبنان محسوبكم قاعد بلا شغل خلي الواحد يتسلى
الله يعطيك العافية يا مبدع
حاب احكي لاصدقائي اني لسا ما روحت عالاردن
دمتم سااااااااااااالمين
|
26- الى الخلف سر ؟
بواسطة
ايمن الغنانيم
22/7/2010 2:24:17 AM
مررت وقرأت ولم أجد ما أقوله سوى لا حول ولا قوة إلا بالله !!!
ما تتوقع للثقافة من أمة صار شعارها " إلى الخلف سر ؟؟
إذا كان هذا زمن السنين الخداعات حيث يُصدّق الكاذب ويكذَّب الصادق ويؤتمن الخائن ويخوّن الأمين فليس المثقف والمتثقف في عيون الناس إلا مجانين أو دروايش !!
ذو العقل يشقى في النعيم بعقله وأخو الجهالة في الشقاوة ينعم
وغطيني .......... يا كرمة العليييييييييييييييييييييييي ....... آبيش فايدة !!!!
|
27- لا حول و لا قوة الا بالله
بواسطة
خلينا عـ النقاط ..
22/7/2010 2:29:54 AM
احنا متفقين انه همه كانوا يمنعوا مقالاتك السابقة لأسباب " بتنهضم "
طيب الحين شـ السبب مابدهم حد يتعلم العوامة او ال " شـ سمو " ؟
مابدهم نحلي حياتنا لو بالاكل !!!
اسئلة كثير و مابدنا اجوبتها لانه واضحة للصاحي و ال ..
يسلموو عــ الوصفة
بوقتها إجت ،، .
|
28- صباح الخير للكاتب
بواسطة
ابو العباس
22/7/2010 2:59:27 AM
لا والله خليها (كول واشكر - واحكي) مش (كول واسكت) مهي على جميع الأحوال ممنوعة من النشر . سولافة غريبة عجيبة حتى الرقابة على كتاب المواقع الالكترونية فيها (خيار ..و.. وفقوس) ، من كام يوم نشر مقال بسواليف مأخوذ من موقع آخر يعني لو انه كاتب غير هضاك الكاتب كان صارت عليه قضايا ومحاكم وسجون والكاتب دايما بيقول (كلهم ضدي) ومتخوف من الحبس ، يا اخي اذا كان على هضاك المقال ما حدا حبسه فعلى أي مقال بدهم يحبسوه ؟ يا اخي من حق القارئ يستفهم ، ما فيش قارئ مغفل هاي الأيام .
|
29- العدالة الالكترونية
بواسطة
ابو العباس
22/7/2010 3:12:37 AM
كاتب بيكتب مقال حلو وبيزيد عليه عيار القطر المخلوط بشوية عسل أصلي فيمنع المقال من النشر وتفتح العيون الحمرا بوجهه . وكاتب آخر بيخلط الرز بالبصل بالسكر والملح مع التراب وبحط عليه خمسه كيلو فليفلة حارة وبخلطهن بعدس مجروش مع شوية عرق سوس وتمر هندي وبيقدمهن للحكومة وللناس على انهن وجبة دسمة تصلح لإفطار رمضان وما بشوف لا عين حمرا ولا عين زرقا .
لو دريد لحام موجود بسواليف كان سألناه هي هاي العدالة الالكترونية اللي سمعنا عنها قبل ثلاثين سنة بمسرحياتك ؟
|
30- مالهم عليك
بواسطة
أحمد عبد النبي الحموري
22/7/2010 3:13:29 AM
والله يا أستاذ أحمد إني مستغرب لويش بمنعوا مقالاتك من النشر ..يعني هو هاظ اللي بمنعهن بفكر حاله بحب الأردن أكثر منّك أو من أي واحد فينا... هو مش داري إنه الواحد بفش غلّه بالمقال من قهره وشوفة عينه ..ولأنه الواحد حاب يشوف وطنه خالي من الكثير من الظواهر الغير مرغوبه ..وإلا الحكومه قطف حامض فيش غير الوحامى يلقطن منّه!!!!!
|
31- بفغش فغش
بواسطة
Abu Sohaib Sawalha USA
22/7/2010 3:23:05 AM
تحياتي استاذنا ، يمكن والعلم عند الله لحتى موعد الانتخابات لاتكون مزبط الكنافه علوجهين وعلى نار هاديه ، وصدقني غير الحكومه تصير تعمل طلبات هاذ غير المرشحين ولحق يا ابوعبدالله ، واذااحتجت الى معاون جارك وحبيبك ......جاهز ، ومنها كمان بتمشي سمنات فايز...... ، وبتشغل ....... يعمل دليفري يعني حط زيتاتك على طحيناتك . مبدع استاذ احمد تحياتنا .
|
32- صحتين وعافية على قد ما مشت الجاجة حافية
بواسطة
تغريدو
22/7/2010 6:40:07 AM
طيب هسا سؤال ..ليش انمنع من النشر
شكلك ما استخدمت صابون غسيل منيح .. وضل الغسيل بدون تنظيف ^_^
المره الجاية حط كلور وخلي الصفحة بيضا عموو
والي بده بيفهم من غير كلام .. بتتذكرو هاللعبة ؟؟؟؟
على قولة جدتي"الله يخليلي اياها" الي مالو حظ لا يشقى ولا يتعب
|
33- هيك عالم بدها هيك مقالات
بواسطة
جديتا
22/7/2010 6:53:41 AM
السلام عليكم
يا خوف قلبي يابو الزعبي تروح فيك وتنسى الصحافة.
طيب شو ذنبنا نصير زي النسوان؟ولا هاي هي رسالتك للبمنعوا المقال من النشر؟
|
34- من سنتين اول تعليق
بواسطة
جهاد كلوب
22/7/2010 7:02:08 AM
ههههههههههههههه
يعني قلبتني على ظهري من الضحك
|
35- ؟؟؟؟؟؟؟؟؟؟؟؟؟
بواسطة
الماسة وحساسة
22/7/2010 7:22:21 AM
صباح الخير
استاذ احمد الزعبي
مقال حزين جد"ا.
الاسى واضح
كتابتك بهذة الطريقة.اكبر دليل على مجموعة احزان.
للبعض ربما المقال فية سخرية.وممكن للبعض .وصفات سهلة ومجربة من الحلويات
لكن بالنسبة لي حزن واضح.
لسبب ما والله اعلم
يسعد صباحكم جميعا"
|
36- "كول واسكوت"
بواسطة
شيء
22/7/2010 7:40:23 AM
طالما ان الحديث عن "العوامه" وبما ان الأمور "عايمة" لا رقيب ولا حسيب -إلا على كلمة الحق- سأنتهز فرصة هذا "التعويم" و "ألطش" فكرة الكاتب وهي طريقة عمل "كول واسكوت".. عزيزي المواطن: ان تكاليف هذه الحلوى باهظة جدا وأنت "منتوف" كما هو معروف.. وحتى لو حصلت على هذه التكاليف عن طريق "إيدك وما تعطي" الدارجة الآن فإنك لن تتقن صنع هذه الحلوى وستلقي بها في الزبالة في نهاية الأمر اي انك لن تجد النصف الأول من هذه الحلوى وهو "كول" لتأكله وسيتبقى لك النصف الثاني وهو "اسكوت" فابلعه هنيئا مريئا واشكر واحمد وبسمل وحوقل واسترجع واحتسب وأطعم أهلك وقرايبك وجيرانك ومعارفك.. ملاحظة: الكمية تكفي ل 6 ملايين "ساكت" وصحتين وعافية.
|
37- قانون العقوبات
بواسطة
فادز
22/7/2010 7:40:29 AM
المتعارف عليه ان اذا الموظف "زادها شوي" وصار ما يلتزم بأي بند من قانون العمل يبدأ يستلم انذارات شفهية وبعدها اخطارات مكتوبة وثم خصم كم يوم ثم تفنيش، الله يبعده عنا وعنكم!!! انت عقابك الظاهر مش زي عقابنا.. ممكن تشرحلنا الآلية المعمول بها بالنسبة لقانون العقوبات الك، اقصد لوظيفتك؟ يعني المسئول عن منع النشر بينذرك خطيا والا شفهيا؟ ام بدأ معك بالخصم على طول؟ ارجو الأفادة
|
38- مشكور يا ابو الزعبي
بواسطة
اردني
22/7/2010 7:41:04 AM
بارك الله فيك يا ابو الزعبي
|
39- تشجيع على البهوره
بواسطة
ابو رامي
22/7/2010 7:57:52 AM
اعتقد ان سبب المنع هو تشجيع المعزب الشعب على البهوره الزائده في صنع
الحلويات والدندرما ( هي كلمه تركيه معناها البوظه او الايس كريم ) بدل التوجيه
في كيفية الاستفاده من الخبز الزائد وبقايا الرز وكيفية عمل النقانق من بقايا اللحم
والدجاج والمهم تغيير المهنه الى وضع وصف الطبايخ لن تفيد كثيرا والاجدى هو دفع خلو رجل او ايد او اي جزء آخر للمعاطه اللي تحت وتحويلها الى محل حلويات بالفعل ودخيلك استعن بمعلم حلويات ولا تحاول صنعها في البيت ولحينه لا ازال انتظر وصفة عمل الشوكلاطا السويسريه المحايده
|
40- دائماً رائع
بواسطة
22/7/2010 8:11:16 AM
يعني الشيف رمزي أحسن منك بشو؟؟ لك تكرم عينك حبيب قلبي... خي على التبولة ما أطبيا من دياتك... بدي عزبك معي.. فيك تعطيني وصفة الجاتوه بالشوكولاه؟؟
زعبي .... كول وأسكت أحسنلك وبعدين احمد الله وأشكره انك قادر تاكل.... ههههه خليتني أموت من الضحك.. الله يسعدك صباحك
ــــــــــــــــــــ
المحرر :
نؤكد دائما على ضرورة كتابة الإسم . وشكرا
|
41- بحبك
بواسطة
محمود
22/7/2010 8:27:16 AM
صباح المقالات الممنوعة من النشر
لو تذكر استاذ احمد حذرتك من ذكر الكنافة و هيهم منعوه...انتظرت طويلا مثل هذا المقال لانتقاد سلبياتنا نحن الشعب و لمست الالم في بعض كلماتك يقيني يقول ما بنقرأ الا لحتى نشبع واذا قرأنا ما بنفهم و اذا فهمنا ما بنتحرك
شكلهم جد جابو رقابة مستوردة و من اللخمة بطلو يعرفو ايش ينشرو و ايش لا
الله يقويك و ظل انجر فينا بمقالاتك حتى لو ما نشروها
و على سيرة الاكل اوجه خطاب الى صديق:كل و اشبع اليوم هاد منسف مو حيالله
احترامي للجميع
|
42- بدي نحكي شوي على الانتخابات جد استاذي!!!!
بواسطة
هبه العواملة
22/7/2010 8:27:22 AM
يمكن ما في علاقة واضحة ، لكن الخفايا بين السطور تقشعها العيون "زرقاء اليمامة" ويمكن أن نطرح موضوع "زرقاء الأردن" فيما لو تصيب الهدف وتقشع ما تخفيه الجماعات أكرر الجماعات ، العوامة: تسلم إيديك، طيبه لكن عوّامتنا أطيب عوّامة الحكومة ممممممم "تفغش فغش".. يعني بتصيب وما بتخيب، على فكرة المقال معهم حق يمنعوا من النشر ففي صلب الموضوع يكمن الألم من الواقع المرير.
|
43- اكتب اكتب ما عليك وعلينا النشر
بواسطة
reem albawadi
22/7/2010 8:36:31 AM
الله اصبح الوطن واهله بخير استاذنا الغالي بدي اعرف اذا انشرتطريقة عمل العوامه اللي راح يقرؤها اكثر من رواد سوليف هاظا منع النشر دقه قديمه مع عصر النت. وانته انسى السالفه لا تهتتشلش هم النشر عندى ولازم ذمة جاراتنا كلهن امي الحجه بتمون عليهن بخليهن ينشرن على حبال غسيلهن بقريتنا والقريه الي بجنبنا حتي عحبال بيوت الشعر كل الي بدك اياه وكل اشي بمنعوه وهم اللي خسرانين دشرك منهم ماعليك بس اخوي اخوي انتبه لكتابتك وعمر لا حدا نشر . والله وابوك يالموزر محلى الطعطعه بيك وامنعوا ولا تمنعوا ها ها عيالي جاي
|
44- اموت واعرف
بواسطة
اكرم نمر بدوية
22/7/2010 8:41:39 AM
اولا تحياتي للأستاذ احمد الزعبي وللموقع والقراء
قرأت مقال البارحة ومقال اليوم ... ولم ارَ او اسمع ما يستحق المنع
يا اخوان بحياة اللي ميتيّنلكوا ... نفسي اموت واعرف ليش منعتوا المقال ولاّ واقفين للزلمة ع نقرة
استاذ احمد .. احكيلي شو طريقة عمل كول واخراااااس .. لأنها أزكى
غطيني يا كرمة بالفستق الحلبي . بدي أصير كنافة
|
45- الله يعينك
بواسطة
سرين
22/7/2010 8:49:19 AM
والله معك حق يا أستاز احمد في تفكيرك بتغيير المهنه مو بس لأنهم بمنعوا مقالاتك من النشر كمان لأنه نحنا شعب لا يقرأ وإزا بنقرأ ما بنفهم شي وبنعمل حالنا فاهمين ومثقفين
الألم باد في مقالك اليوم وفعلا الله يعينك لكن لا يرمى بالحجر إلا الشجر المثمر ولأنك شجره ما بتطرح إلا الثمار الجيدة ترمى بحجر منع النشر
غلى الإخوه والأخوات القراء والمعلقين: حاولوا أن تتعمقوا في المقالات وتستوعبوها لأن الموضوع أكبر من السخريه فما أصعبها تلك السخريه النابعه من الألم
إلى من يهمني أمره:بالنسبه للمنسف لاتوصي حريص،تفضل
|
46- قبل ما يوقفو موقع سواليف
بواسطة
عواودة
22/7/2010 8:49:36 AM
استاذ احمد قبل ما يوقف موقع سواليف بدنا طريقة عمل بين ناريين
دخيلك الواحد ولع من الحر
|
47- مشان الله
بواسطة
محمود
22/7/2010 8:50:39 AM
والله انو طاير عقلي
لو بإيدي انزل هسا عالاردن واجيب كرسي و(احيح)علي باب الجريدة و اكتب على بلوزتي"لا لمنع مقالات" و اكمل على بنطلوني"الاستاذ احمد الزعبي" ما بقصر
كثير هيك والله بدنا من الكلام القوي (الدبش) والمباشر اللي بريحنا و بسم بدن غيرنا و حتى لو ما كان بريحنا اكيد بفيدنا
استاذ احمد "مشان الله" سيبك من الطبخ انت شفت بس الناس اللي بترمي محارم (بتشرشر) قطر على كتبك بس ما شفت المغتربين هون وين حاطينهم
دقيت في البنغالي كمان مرة.. والله ليموت بين ادي هاظ
سلامي
|
48- بدي عوامه
بواسطة
رمثاوي من دبي
22/7/2010 8:51:46 AM
صباح الخير
يا زعبي سايق عليك الله لا تشهينا اكثر من هيك ،،،،، من وين بدي الاقي بدبي محمود ببيع عوامه ؟؟؟
*** بس اللي ما بيعرف محمود هو اشهر واحد بالشمال اذا مش بالمملكه بالعوامه، لانه ما في حدا بيعمل عوامه تفغش فغش الا هو
|
49- سبب منع النشر
بواسطة
نورس
22/7/2010 8:57:27 AM
سبب المنع حتى لا تثار ضجة بتحول كاتب سياسي ساخر الى الكتابة عن وصفات الطعام نظراً للقيود المفروضة على الصحفيين.
|
50- لا لمنع النشر
بواسطة
سرين
22/7/2010 9:03:52 AM
انا مع محمود وبحكيله:حطلي كرسي جنبك وما عليك من الكتابه بكتبها ع لوحة
أستاز أحمد الله يقويك ويخليك شوكة بحلق يلي مو عاجبه...
قال ممنوع من النشر قال .... أستازي لا تهتم، الله يخليلنا سواليف يلي بتنشر كل مقالاتك ولا كان حرمنا رئيس التحرير من شوفة هالإبداع
والله لو بتعمل منشورات وبتوزعها ع الشعب كان أسهل بس شو بدك تعمل حرب مصالح
محمود...ارحم البنغالي مهوه متغرب كمان
|
51- أخيرا عرفت السبب
بواسطة
دبــل آر
22/7/2010 9:18:01 AM
سألت في تعليقي الأول عن سبب هذا الختم الأحمر على المقال ومع احترامي لكل الآراء المطروحة من الأخوة المعلقين الا أنني لم أقتنع بما أوروده من أسباب؛ وصلت للسبب بنفسي وأقتنعت به. السبب هو أن المقال يحمل اسم احمد حسن الزعبي؛ لم يقرأوا المقال؛ فقط أبصروا اسم الكاتب فمنعوه من النشر؛ يتعاملون بالأسماء دون النظر لفحوى أو محتوى المقال؛ ليتهم يقبلون أو يسمحون بالنشر بأسماء رمزية مثلما هو الحال في مواقع النت؛ اذن فيكفي أن يحمل المقال اسم الزعبي ليمنع من النشر؛ عموما هم يعملون لصالحك من حيث لا يعلمون.
|
52- لم أفهم .. وشكراً لـ شيء على التّعليق الجميل
بواسطة
بيبو
22/7/2010 9:22:21 AM
أستاذ أحمد: قرأت وجعك مع أوّل فقرتين فقط ..
وبعدها اعتبرت نفسي لم أقرأ شيئاً إذ لم أفهم شيئاً ولم أجد هدفاً ممّا أقرأ !!
فهل تنوي دراسة أثر هذا التّحوّل في تعليقات معجبيك ؟
تقلقني طريقتك الجديدة بشدّة وأرى أنّ الرّاحة والعوّامة لم تؤتِ ثمارها في نقلِ ما يدور بذهنك (وذلك للمرّة الأولى منذ قراءتي لحضرتك) حتّى وإن حاول بعضنا تفسير كلّ كلمة على حدة ووضغ كافّة الاحتمالات التي تقصدها بهذه العبارة أو ذلك التّعبير ..
يا إخوان اللي فهم إشي ينوّرنا..
سلمت يداك يا "شيء" على التّعليق 36 الرّائع جدّاً..
|
53- الحب يا استاذ احمد
بواسطة
عمر العودات
22/7/2010 9:36:59 AM
لماذا لا تكتب يا معلم عن الحب والغزل الذي نفتقده في حياتنا اليومية وين الغزل في مقالاتك اطلع من لب التينة وكتب عن
اليكِ يا زنبقة الربيع
اليكِ يا من تعصرين دمي
بوجهك القاتم البائس
احبك منذ فجر التاريخ
وقبل التاريخ
احبك لانك التاريخ نفسه
احبك لانني والاحزان واشرعة السفينة
نطارد نورس عينك
اه لو تعلمي يا صغيرتي
كم انا محتاج لك
كم انا عالق في ذكريات الوطن الاسود
...خلينا ضربة على الحافر وضربة على هالمسمار مرة حلويات ومرة طبايخ ومرة سياسة والف مرة عن الحب
ــــــــــــــــــ
المحرر :
مع إحترامي ما سبب إقحامك للقصيدة بالتعليق ؟
|
54- amman
بواسطة
دحدوح
22/7/2010 9:38:12 AM
بدنا طريقة عمل اللزاقيات يا شيف احمد
|
55- لو كان ................
بواسطة
بعض الحقيقية
22/7/2010 9:52:20 AM
لو كان موقع سواليف يثير قلق الجهات الرسمية لتم اغلاقه منذ فترة طويلة .
"منع من النشر " قد تكون الخميرة لطبخة قادمة
هذا رأيي وأنا لست ضد الابداع
|
56- كول و اسكوت
بواسطة
سحر
22/7/2010 10:00:47 AM
المقال رائع كالمعتاد لكنه المقال الأكثر ايلاما
|
57- شو اسمه
بواسطة
سمعة ابولمعة
22/7/2010 10:05:43 AM
فك طلاسم المقال بعبارة لقمة "شو اسمه" اليس كذلك ؟؟
|
58- اكثر من رائع
بواسطة
ندى
22/7/2010 10:10:15 AM
الله يقويك يا استاذنا الكبير , ولا يهمك . والله ان كتاباتك دائما على الوجع . لهذا السبب تمنع من النشر , استمر هكذا . ادامك الله
|
59- المطبخ السياسي
بواسطة
جحا
22/7/2010 10:12:25 AM
تحية من القُرنة للقُرنة
يعني أفهم من هيك أنه هاظ هو المطبخ السياسي، الي بيطبخوا فييه سياساتهم.؟!
طيب والصالونات السياسية كيف بتكون؟! معقول تكون زي صالون للسيدات، ؟
أرجو من معزبنا في مقاله القادم ان يعلمنا كيفية صنع الشلاليط الخُظر لأني حاسس انه رح نوكل شلاليط تا نقول بكرى العيد من تحت راس سوالفك يا خالي.
|
60- الى محمود مشان الله
بواسطة
جحا
22/7/2010 10:42:42 AM
تحية من الزوزو للزوزو
الاخ محمود : طنيب عليك قلي شو قصة البنغالي قظيت علي من كثر الضحك.
|
61- بعرظك لأ!!!!
بواسطة
صريحي
22/7/2010 10:42:45 AM
أخوي أحمد الزعبي خلي كل إشي لأهله وخيليني نتصبح بمقالاتك الرائعة والله يخليلنا قصك للحكومة والله يسدد خطاك .
|
62- بعين الله
بواسطة
ايمان
22/7/2010 10:53:03 AM
بالفعل ولا ما فتح على جريدة الرأي غير بس عشان اقرا مقالك
|
63- كلام صريح بدون مكياج
بواسطة
الراعي الإلكتروني
22/7/2010 11:03:36 AM
من زمان وأنا اشتري جريدة الرأي بربع دينار من أجل مقالك فيها، وكنت مقنع نفسي بشراء الجريدة على النحو الآتي: 20 قرش لمقال الزعبي، وشلن لصفحة الأموات، وكان مقالك في آخر الجريدة شفاء من الحزن والغم الذي تثيره في النفس، وبما أن الجريدة صارت تراودك عن إبداعك، والسجن أحب إلينا مما يدعونك إليه، فإنهم بذلك سيوفروا علينا الربع دينار، أما أحمد الزعبي فسنقرأ مقاله في وجه كل مواطن أردني شريف، أقسم على نفسه من الآن أنه لن يصل صندوق اقتراع ولا يشتري الجريدة بدون الزعبي.
|
64- حب
بواسطة
زنبقه الربيع
22/7/2010 11:06:03 AM
المحرر :
من شروط النشر المعلنة عدم تمرير رسائل عبر التعليقات . إيميل الشخص هو الوسيلة لنقلها . تحياتي
|
65- الراعي الالكتروني
بواسطة
ابو العباس
22/7/2010 11:15:18 AM
الأخ الراعي الالكتروني ،
تعليقك متميز ، لك مني الف تحية .
|
66- اذا عرف السبب بطل العجب
بواسطة
غالب شرايحه
22/7/2010 11:58:42 AM
اخي أعدت قراءة مقالك الحالي
أكثر من مرّة وبالصوت العالي
مستفلا وجودي في البيت لحالي
لعلني أعرف سبب المنع
الّا ان عقلي قفل وامتنع عن الاقتناع حسب المستطاع
ثم قرأت المقال من فوق لتحت ومن تحت لفوق ولم أجد فيه اخلالا في الذوق
ثم تذكرت اسم منال العالم والله وهو العالم انها هي السبب في هذا المنع
واليكم التفسير ايها الربع لقد اعتبرت ادارة الجريده ذكر اسم كتابها دعاية لها أي نوعا من الدعاية المجانيه لهذا اعترضت الادارة الماليه
وبهذا انجلى الأمر وظهر سبب عدم النشر
|
67- مع كل
بواسطة
العنقاء
22/7/2010 12:09:19 PM
مع كل السكر الذي تغلفه أستاذ أحمد بحلوياتك المصنعة
الا أن طعم المرارة يعلق بحلوقنا
اعلم ان مقالاتك ستظل تسبب الحموضة لمن يوجعه بطنه
ولكن هذا الصباح شعرت بألم فظيع في أعماقي
وحسرة تغتالني
فالكلمة الحرة الشريفة لا تستحق ان يكمم فوهها
لن أبتعد عن نبض قرائك استاذي الرائع
اذا اخبرتك أن حجم التعليقات التي تلي مقالاتك
لا تعبر عن الحجم الحقيقي لقرائك ابدا
اكان ذلك على الصحيفة الورقية
او الالكترونية او في موقعك
موقعك صار محجا للكثيرين
اما الجريدة فلا تزار الا من اجل الوفيات
مع هذا
اعرف ان للظلم غصة.....
|
68- كمان طبخة
بواسطة
معتز الحياري
22/7/2010 12:24:46 PM
أبو الزعبي الله يرضى عليك وبما انك شمالي
بدنا طبخة تشعاتشيل وطبخة مكمورة
|
69- عزيزي المحرر- اسحب التعليق
بواسطة
عمر العودات
22/7/2010 12:24:50 PM
هذه الكلمات كتبتها اليوم قصدت ما يلي:
اردن يا زنبقة الربيع
اردن يا من تعصرين دمي
بوجهك القاتم البائس
احبك منذ فجر التاريخ
وقبل التاريخ
احبك لانك التاريخ نفسه
احبك لانني والاحزان واشرعة السفينة
..............
عزيزي المحرر لماذا لا نرى حب الوطن من جهة اخرى؟
اسحب التعليق والا بجيك على الرمثا ومعي ولاد عمي
ـــــــــــــــــــ
المحرر :
ولا تغلب . حشرت إسم الأردن حتى تمرر رسالتك .
|
70- تدجين وتلحين حكومي
بواسطة
ام الجوج
22/7/2010 12:28:39 PM
يعني الجماعة في أبواب سكروا الباب عليك،يعني المقال بخرب وبدمر العلاقات المطبخية الخليجية الاردنية،شو بدك تفتح علينا ابواب مطابخ "الكبار" ويبلشوا يفقعوا فينا جرار الغاز وانابيبه،المهم طباخ السم بذوقه، ولا بد لكل قلم مدجن ولكل قلم يعزف الحان هز الذنب انو يجي يوم ويحكي يا ريتني اكلت من عوامتك يا زعبي ولا صرت بهالحالة من الضياع والضعف والحياة بلا هدف ... ويحكوا ملعون ابو المصاري ملعون .... وهيك بصحوا بالآخر على وضعهم المخزي امام جيل الصحوة الفكرية والاجتماعية القادم يوما..وتكون انت عرشت على الكل وبس
|
71- سبب منع النشر
بواسطة
عمر العودات
22/7/2010 12:31:28 PM
أجلس عند صديق "المعثرين" حسن ابو علي في كشكه - هذا هو سبب المنع لان المقال يمكن ان يكون دعاية واعلان لكشك ابو علي وبتالي ممكن ان يكون هنالك احتجاج من قبل الاكشاك الاخرى مثل كشك ابو سلامة للحلويات الساخنة - وكشك خضراء بنت اثنيا للمشروبات والحلويات المتجولة .
|
72- كركي بشتغل بعمان
بواسطة
كركي بشتغل بعمان
22/7/2010 12:48:47 PM
الى الاستاذ احمد ارجوا ان تزودني بطريقة افضل لصنع الراحه اخفض فيها مصاريفي ونفقاتي وازيد بها ايراداتي وذلك بسبب زيادة المديونيه بشكل كبير جدا مع العلم اني قمت بتخفيض الانفاق وزيادة الرسوم والضرائب المفروضة على اهل بيتي ولكن بلا جدوى وبالتالى فانني سأقوم بصنع الراحة وببيعها بسعر 5 قروش مضاف اليها 20 قرش بدل خدمات و 20 قرش بدل توصيل و 20 قرش بدل اخرى و 20 قرش بدل مش عارف شو و 20 قرش بدل مش عارف ايش و 20 قرش بدل مواقع +ضريبة مبيعات 16 % و بدل خدمات 10% ومربح 60% ... الرجاء ابداء النصيحة حول المشروع
|
73- السودان وسواليف
بواسطة
الــجــمــووح
22/7/2010 12:55:36 PM
مين قال كتبك حمام عمومي !!!!!!!!
كنت حاضرة على صفقة ادبية لبيع 500 كتاب سواليف ( يا رب ما حدا من ضريبة الدخل متابعنا الان ) وجميع هذه الكتب اشتراها طبيب مثقف سوداني ليتم تداولها بالسودان .
|
74- اسال عن المراة
بواسطة
هيثم
22/7/2010 12:58:57 PM
انا متاكد يا اخ احمد ان صاحبة الصون كرمة العلي اشتكت الى ابو وجه احمر وشعر شايب منك قد ما بتغطيك واكيد قالتله (لاميت بدي اظل اغطي بيه
|
75- براسي موال
بواسطة
دبل آر
22/7/2010 1:00:27 PM
بدي اغّير هالشغلة واتعلم فن الطبخ
ما حدا بده أكتب الا كــذب أو نفـــخ
بكتاب الحق المبين الله أقسم بالقلم
ثابت على المباديء وقلمي بصلخ صلخ ... (وبالمدني سلخ)
|
76- أجمل ما في سطور المقال
بواسطة
هبه العوامله
22/7/2010 1:42:24 PM
أستاذي أحمد وأنا من الحديثين في قراءة المقال اليومي لك سواء كان المنشور أو الممنوع من النشر ، أجد يا أستاذي أن أجمل ما في المقال ما يعلّق عليه، وسيأتي اليوم الذي تكتب فيه التعليقات بكتاب خاص يجمعك مع أصدقاءك المحبين أو.................. وأنا أبصم لك بأنه سيلاقي رواجا أكثر من كتب أخرى ، الروعة في كل هذه الخواطر امتزاجها مع لحن يئن وآخر يغرد على أمل أن تبقى شمسنا في الأفق عاليه ، ونجومنا في كحل الليالي برّاقة، نمتضغ الألم مع ابتسامه وأمل
تحياتي للجميع دون استثناء
|
77- شسمو
بواسطة
elena
22/7/2010 1:49:47 PM
انا الصراحة مو عارفة لهلا ليه المقال منع من النشر
بس قلبي مو مريحني من كلمة "شسمو" و "زيرو" !!
|
78- الاخ غالب شرايحه المحترم
بواسطة
ابو رامي
22/7/2010 2:25:20 PM
وانا مثلك قلبت المقال من فوق لتحت ومن تحت لفوق لعلي ارى تلميحا من هنا او دبوس من هناك ولكني لم اجد شيئا ولا اعتقد ان السبب هو دعاية لمنال العالم او لكشك ابو علي ولكن اظن انهم يعتقدون ان المعزب يمهد لتأليف كتاب عن الطبخ والنفخ وابتدأ سلسلة مقالات غذائيه كدعايه غير مباشره له وهذا الكلام لم يمر على قسم الاعلانات فاوصوا بحجب المقال
|
79- سد الحنك
بواسطة
طلال الخطاطبه
22/7/2010 2:28:38 PM
اشارت الأخت أم أحمد بتعليق رقم 9 الى أكلة سد الحنك على أنها أكلة مصرية والصحيح أن الأسم فقط مصري أما الأكلة فهي موجودة في كل الشعوب على ما أعتقد باعتبارها أكلة الفقراء ايام الجدب والقحط باعتبارها سهلة التحضير فليلة التكاليف وكما يسميها المصريون هي بس سد حنك.
نسميها بالأردن البسيسة ويسميها ألأخوة في سلطنة عمان بالعصيدة.
تتكون من الطحين مضافا البه الزيت أو السمن حسب درجة الطفر وتسخن على النار الة أن تتماسك.تؤكل بالهنا والشفاء وكل ما شربنا ماء بتنتفخ بالبطن زيادة وهيك بتكفي الوجبه اليوم بحالة.
|
80- سد الحنك 2
بواسطة
طلال الخطاطبه
22/7/2010 2:32:38 PM
انا شخصيا لم أذقها في حياتي رغم انهم مشهورة هنا. وقد عرفت طرقة صنعها من ماما نونا عندما طبختها ليحيى الفخراني بمسلسل يتربى بعزو.
زحتى لا حدا يسد حنكنا خلينا بعوامة الزعبي ليببسن أولاهما اني انا بحب الحلو مهما كان شكله والثاني احسن ما حد يقتر علينا أن نأكل " كول واشكر ربك واسكوووت "
صحتين وعافية على الجميع
|
81- سبب المنع..
بواسطة
عبد الله سمارة الزعبي
22/7/2010 2:56:49 PM
أني والله زي جميع الإخوة مش فاهم السبب ووضحت هاظ الإشي بالتعليق رقم 6..
لكن بعد أن تبين أن الجميع لم يفهم السبب أعدت القراءة فبان أن السطرين الأول والأخير فيهما كلام لاذع!
الأول ينتقد الجريدة عينها بالكلام عن تغيير المهنة!
والأخير ينتقد التضييق الممارس من قبل الشباب الله يخليهم..
تحياتي للجميع..
..............
عالهامش: باركولنا بكرة أول خطبة بعد منع دام من آخر جمعة في رمضان الماضي.. الماضي..
|
82- ممنوع من الحلو
بواسطة
طلال الخطاطبه
22/7/2010 2:57:04 PM
باعتقادي
واشك
ولو أن كل شكة حرام
أن من منع هذا المقال من النشر هو شخص ما بحب العوامة.
والدليل
أ
نه سمح بمقال الراحة.
يا ريت يا اشتاذ أحمد توخذ قائمة الحلويات اللي بحبها صاحب القلم الأحمر أو صاحب عبارة " هات غيرة" حتى ما تغلب حالك وأنت تكتب وهم يمنعوا.
كذلك لا باس من الكتابة عن التي ذكرتها لك بالأيميل لأنه في ناس مازلزا يتمسكون بالتراث ولا يفضلون تلك (الماخوذة) الجاهزة.
|
83- الى الاخ جحا
بواسطة
محمود
22/7/2010 2:59:47 PM
البنغالي هو صانع القهوة في الشركة,قهوة بطعم "اليع"الاصيل مصنوعة من"الكع"الصافي
اذا تم نشر مقال الاستاذ اشربها بكل رحابة صدر و اذا انمنع المقال من النشر اقوم بتعشيب راسو
لدرجة انو سألني اليوم:-هو زعبي ما في اكتب او ما في انشر,تلاتة يوم انت في اضرب
و وعدتو اذا بمنعو المقال الجاي الا ارفش فبطنو حتى لو زبطت القهوة معو
اخي المحرر: اسف على هذا التعليق
|
84- ههههههههههههههه
بواسطة
سهران معاك الليلة
22/7/2010 3:04:14 PM
حتى انا مش عارف من وين اعلق ولا على شو اعلق
بس الظاهر انه مش مرضي عنك من الجماعة ووضعك مش بالسليم هاليومين؟!
لكن ولا يهمك
بانتظار المقال القادم بلكي الواحد يعرف يوكل ويسكت ويعيش ويتاقلم مع هالضرايب والدفع اللي قبل الرفع
|
85- هبة العواملة
بواسطة
الماسة وحساسة
22/7/2010 3:11:33 PM
يسعد مساك
مقالات الزعبي رائعة وما بختلف عليها اتنين
واجمل ما في التعليقات انها تكتب باللهجة الاردنية
كنت في البداية اعاني من تفسير بعض الكلمات
لكن الان عندي مجموعة كبيرة من الكلمات ومعانيها
تحياتي لك وللجميع
|
86- الى طلال الخطاطبة
بواسطة
سهران معاك الليلة
22/7/2010 3:19:20 PM
شكرا على التوضيح بخصوص "سد الحنك" اللي تفضلت فيها ام احمد
صراحة اني فقعت ضحك على وصفك لمبدأ عمل هاي الاكلة "وكل ما شربنا ماء بتنتفخ بالبطن زيادة وهيك بتكفي الوجبه اليوم بحالة."
فعلا انها المضحك المبكي
|
87- إقرأ وكوووووووول,,
بواسطة
نشمية من استراليا
22/7/2010 3:27:59 PM
في البداية ,, اضم صوتي لــ دبل آر,, يعني قلبت المقال فوقاني تحتاني وعن اليمين والشمال,, ماشفت ما يستدعي منع نشره,, إلا,, إن الحكومة خايفة ع الشعب من السكري !!,,
سي أحمد,, اسمعني لأقول لك يا بيه,, اكتب كتاب وسميه (كووووووووول وإنت عم تقرأ) وشوف كيف ح يكون الإقبال عليه!! وجرب تكون صورة الغلاف شي أبعد ما يكون عن الثقافة!!
طبعا ً,, لا أقول أننا شعب غير مثقف إطلاقا ً ,, ع الأقل إحنا أرجى وأشوى من غيرنا !! بس إحنا شعب التهينا بلقمة العيش عن كل ما سواها,,
وكوووووووول وإنت عم تقرأ,, صحتين وعافية
|
88- الأخ طلال الخطاطبة تحية من الأعماق..
بواسطة
عبد الله سمارة الزعبي
22/7/2010 3:29:18 PM
أكيد بتسمع بالمثل القائل: "مشتهي العصيدة بأيام الحصيدة"..
والسبب هو أن العصيدة تعني الفريكة "الفريجة" في فصيح اللغة، وفي هذه الفترة تكون قد اشتدت واستوت على سوقها فلم يعد بالإمكان تفريكها..
أما العصيدة "الحلوى" فهي مختلفة قليلا عن "البسيسة"..
أنا أكلت "البسيسة" والتي يسميها بعض الناس "القلية" وأتقن صنعها أيضاً : )..
وأكلت العصيدة في المدينة المنورة على ساكنها الصلاة والسلام وهي أشبه ما تكون بالهريسة إلا أنها ألذ، وقد ورد أن النبي صلى الله عليه وسلم أكلها..
|
89- لم يمنع من النشر
بواسطة
شيء
22/7/2010 3:44:52 PM
المقال لم يمنع من النشر بل انهم "نشروه" بمنشار الجهل الذي لا يرحم وقطعوا كل شرايين وأوردة الكلمة الحرة وشطروا حرية التعبير الى نصفين نصف لهم والنصف الآخر محرم على غيرهم وذلك من مبدأ "من لم يكن معنا فهو ضدنا".. ثم بعد ذلك يدعون الناس للتوجه الى صناديق الإقتراع لانتخاب مجلس نزيه!! اذا كان الكاتب لا يستطيع التحدث حتى عن صنع العوامه وهو مجرد حديث فهل سيتركون للنائب حرية "العمل"؟!.. أعتقد ان سبب منع المقال من الظهور هو عبارة: "تحريك مغلي المآآآآء" التي وردت في المقال فهم يريدون "للقطيع" ان يظل ساكنا مهما قطعوا من لحمه.. تحية للأخ بيبو وشكرا على اهتمامك.
|
90- مرّة أخرى
بواسطة
بيبو
22/7/2010 5:08:24 PM
أعتقد أن الأمور كما تفضل العمّ أبو رامي ولا يوجد سبب لمنع المقال سوى أن أحمد الزعبي هو كاتبه حسب ما يتضحّ لنا.
إلى مانعي مقالات الزعبي أو (مستشاري منع) إن كنتم من المطّلعين على سواليف أرجو ذكر السّبب حتّى لا تزرعوا الشّكّ في مصداقية واحدةٍ من أكبر الصّحف وأكثرها عراقةً في الوطن العربيّ !
وما تفضّل به الأساتذة شرايحة والعودات قد يكون منطقيّاً إن لم تذكر أسماء كتب وأسماء شخصيّات ومحلّات تجاريّة في مقالات سابقة وهذا حصل مراراً وتكراراً قبل اليوم؛ فما السّبب إذاً !؟
|
91- موضوعيّة .. وخفّة ظلّ
بواسطة
بيبو
22/7/2010 5:13:35 PM
ألف شكرٍ للجمووح على موضوعيّة زرع الثّقة فيما أتت به، لن أكرّر عشان العين والضّريبة :)
و3000 شكرٍ لـ جحا ومحمود والعمّ طلال على خفّة ظلّ تعليقاتهم ...
|
92- الأخ ابو رامي المحترم
بواسطة
غالب شرايحه
22/7/2010 5:22:24 PM
اخي ابو رامي صدقا لم أجد سببا مقنعا لعدم نشر المقال ان لم يكن سببا دعائيا فان الكاتب الزعبي يكتب في أي مجال وهو ليس محللا سياسيا أو اقتصاديا أو ماليا أومتخصصا في الأدب بل يكتب في هموم الشعب وفي منتهى الأدب لامتصاص الغضب ورسم ابتسامة ملؤها المرح والحب على الوجوه العابسه والمتجهمه بوهن والتي لا تضحك للرغيف السخن
يوجد سبب مختمر في ذهني وأرجو أن يخيب ظني
لا اريد البوح به الآن لكن ان استمر المنع الى درجة القمع
فان الامور تصبح واضحة للعيان ولا تحتاج الى برهان والحدق بفهمها كمان ؟؟؟؟؟؟
|
93- سد الحنك
بواسطة
ام احمد
22/7/2010 5:44:15 PM
أشكر الأخ الخطاطبة على التوضيح . لكن ما قصدته من الرد مضمون الاسم، والله آلمني المقال من أوله إلى آخره ويحمل الأسى في باطن كل كلمة منه .
تحية لكل قلم نظيف طاهر . ولمّا مُنع المقال من النشر فمعنى هذا أنه أكثر تأثيراً وإثارة . والردود تبين ذلك .
وللأخ العودات الأردن دائماً الحضن الحنون ولا يوصف بمن يعصر الدم وإلى آخر الأبيات؟؟؟ إلعب غيرها وخليك مُحسن الظن .
|
94- إلى أبو العباس 65
بواسطة
الراعي الإلكتروني
22/7/2010 6:45:22 PM
ألف تحية لك يا كبير، فعلاً إنك تفهم وعميق
|
95- thats funny
بواسطة
SHOUG AL KHAZALEH
22/7/2010 7:38:12 PM
i dont know how do u get on these amazing i deas to talk about
i know
its so painful ..our social life is just about food
that all wt the jordanian think bout we just care about how to send our time with less paying money and more food
we dont think of how to fix our community
really its so harmful
if each one of us just thinks for a moment about social life
there would be something good
|
96- شيئ جميل
بواسطة
الاء جلهم
22/7/2010 7:46:46 PM
السلام عليكم اخ احمد
معلش لازم نتحمل الوضع .
بس ياريت تبطل تفكر بتغيير المهنه ...... لانو كتاباتك احسن من كل حلويات العالم وكل قناة فتافيت ومطبخ نوال العالم !!!!!!!!!!
على فكره اصلا كتاباتك حلويات إلنا في هاد الوضع المر
والله المستعان ؟؟؟؟؟؟؟؟؟؟؟؟؟؟
|
97- ليييييييش؟؟
بواسطة
الكركية
22/7/2010 8:34:59 PM
يعني مش عارفة ليش المقالة مش منشورة ما فيها لا حكومة ولا مايحزنون فعلاً زودوها لو اني مكانك يا أبو حميد كان قاتلت رئيس التحرير...ولا شو رأيك؟؟ و شو يا محرر ورجيني إذا غيرت بالتعليق اشي حاكم سايرين تخافوا على الشعب كمان و ما تحبوا ناس يجرح مشاعره...
|
98- ننتيقل الى القهوة
بواسطة
طلال الخطاطبة
22/7/2010 8:39:26 PM
تمشيا مع تعليمات الموقع ننتقل الى قهوة لنبارك لأخ عبد الله سمارة الزعبي بعودته خطيبا ً , فألى هناك
|
99- ارجوووووووووووووووووووك
بواسطة
الاء
22/7/2010 8:39:47 PM
اخي احمد ارجوك بكفي حكي عن الاكل,,,
ارجوك ارجع للمواضيع القديمه...
انت عبقري خلي قلمك دايما يكتب الاشي الصح...بكفينا اكل
|
100- الأخت ام أحمد
بواسطة
طلال الخطاطبه
22/7/2010 8:41:55 PM
كان واضحا جدا ما تقصيدن بتعليقك طبعا, ولكني فقط أحببت الدخول بسد الحنك لأن فكرتها أعجبتني رغم انني كا قلت لم أذقها.
بالمناسبة
ربما يكون من المفيد العوده لها ذهذه الأيام
تحياتي لك
وللأخ عبد الله الزعبي الذي ذاق العصيدة
شكرا لك
|
101- الى شوق الغزالة تعليق رقم 95
بواسطة
ابو العباس
22/7/2010 8:42:11 PM
جاي تنتقد الأردنيين ولغتك العربية ركيكة ومكسرة وما الها طعمه ، الأخطاء الإملائية واضحة ، التركيب الانشائي ضعيف ، القواعد ضعيف ، المنطق ضعيف وما دامك هيك مفروض تظل شايف وساكت تا تدبر حالك بلوحة مفاتيح فيها احرف عربية يمكن تقدر تفهمنا شو بدك بالعربي .
|
102- خلينا نحكي جد
بواسطة
العنقاء
22/7/2010 8:46:58 PM
بعد اعمال العقل
واتفكير بكل ما يحيط بنا
وبترجيح كفة المنطق في كل ما حصل خلال الاسبوع الماضي من منع مستمر للمقالات
ارى ونصيحة مني بدون مقابل
لا جمل ولا صحن عوامة
استاذ احمد الحسن الزعبي
اكتب ما يحلو لك وما يلامس الوجع
واتركك من رضاهم
لقد صار رضاهم غاية لا تدرك
لذا...........
ارجع حمي الحديدة
وما نشرولك اياه هناك
في الاف بيستنوك هون
|
103- للأسف
بواسطة
لينا
22/7/2010 8:53:20 PM
في تعليقي على مقالك السابق أيها الكاتب المتألق علّقت سخرية ومن باب الضحك فقط أن مقالك المقبل سيكون عن "العوامة" للأسف سخريتي كانت واقعاَ ألييييييماَ جداَ
سؤالي لماذاااااااااا؟؟!!
لماذا أصبحت الكلمة الحقّة في قضايانا سلاحا يُحارب وسيفا يجب كسره وتفتيته الى رماد
للأسف لم أستطع أن أضحك أو أبتسم مجرد ابتسام رغم محاولتي البائسة على هذا المقال لمجرّد قراءتي جملة منع من النشر .
أتمنى ان نرقى بحرياتنا التعبيرية بقدر ما ننادي ونحاول أن نرقى بحرية المرأة!!!!!!!!
|
104- وبعدين؟
بواسطة
فر فر
22/7/2010 9:37:25 PM
الله يمسيكم بأنوار النبي ........اول ما فتحت الجريدة دورت على مقالك ونا لقيته ..حكيت خلص هاي الامور مولعة مع الزعبي ...مع انك كنت واعدنا تكتب عن العوامة .......بس شكلها قصة العوامة ما مشيت عليهم هاي المرة.......والله الشعب فعلا صاير زي العوامة .....منيح اني قرأت المقال في سواليف اطمنت عليك شوي ..والله يستر من الجايات...المرة الجاي اكتب طريقة صنع فستق العبيد الحار اللي بيلهلب الحلق ..على شان ننخرس على المزبوط ..واللي اياهم يرتاحو وينبسطولهم اسبوع زمان .
|
105- الى المحرر
بواسطة
الكركية
22/7/2010 10:35:43 PM
سلام يا "زلمة" لعلمك فقط احنا الكركيين ما بنخاف غير من الله و يلي بده يصير يصير يعني اذا ما نشرت التعليق مثل ما هو شو كانوا رح يعملولي؟؟؟ يعملوه شو ما يعملوه رح أواجههم و أحكيلهم : وين حرية الرأي؟ لو أعطيتونا اياها فعلا ما كنا وصلنا لهالمواصيل...
ـــــــــــــــــــ
المحرر :
الأردنيون جميعا لا يخافون إلا الله . تحياتي
|
106- سهلة جدا
بواسطة
الجرادات الكرك
22/7/2010 10:39:23 PM
السبب واضح: امدح و جامل بالعنوان و احكي اللي ودك اياه في النص. ذكرتني بيقريب الي حاول ينشر تعليق على مقال و ما نشروه لانه في كلام صريح و بالآخر بهدل باستخدام كلمة "مرياع" نشروها. لأنهم ما عرفوا معناها. فكروها اسم حلويات!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
|
107- تعليق 95
بواسطة
عمان في القلب
22/7/2010 10:47:23 PM
صاحب التعليق 95 تحياتي لك
ان العربي بشكل عام وأهل بلاد الشام دونا عن غيرهم منأكثر الناس تفكيرا بالمجتمع والقضايا الاجتماعية، اذهب وجالس موظفينا في دوائرهم وانت تعرف ذلك
بالنسبة للطعام، قد يكون لدينا اطباق يستغرق اعدادها ساعات ولكن استهلاك الاردني من الطعام بالكاد يوازي ربع استهلاك الامريكي وادخل الى أسواقنا وأسواقهم وقارن بين حجم عبوات الكولا وأكياس الشبس ثم توجه الى مطاعمنا الشعبية وقارن حجم سندويشة الفلافل التي يتناولها الاردني بحجم سندويشة الهوت الدوغ الأمريكية
|
108- الأخ ابو العباس
بواسطة
عمان في القلب
22/7/2010 10:53:21 PM
تحياتي لك
ان الرجل حين تحدث سخر من شعبنا بضمير يضم فيه نفسه الينا انه لم يكن يقول "you" وانما كان يقول "we" وأظن أن ذلك وحده كاف لمنعنا من التحامل عليه بهذه القسوة على الرغم من اختلافنا معه
|
109- ابو العباس 2
بواسطة
عمان في القلب
22/7/2010 11:05:24 PM
الاخ أبو العباس ...
ألا ترى أن تعليقك الموجه لصاحب التعليق 95 لا يتفق والبند 6 من بنود وثيقة شروط النشر
|
110- ادعس و لا يهمك
بواسطة
صهيب الخزعلي - الامارات
23/7/2010 6:10:14 AM
روح يا ابن العم ادعس و لا يهمك اذا ما نشرولك المقال اني و الشباب راح ننشرلك اياه عالى الايميل , على الفيس بوك, ما عليك انت بدكيش جميلتهم
|
111- يا بى منك
بواسطة
موفق شديفات
23/7/2010 2:25:24 PM
استاذنا ومستخرج ابتساماتنا بالقوة بقوة مقالاتك وكتاباتك وسر ضحكاتنا عندما نتداول مقالاتك بين افراد العائلة وبين بعض الاصدقاء بالهاتف او حضوريا وفى كل مكان فى الفرح فى الترح يا ملاذى اليومى وانا اهرب طوعا الى موقع سواليف بعد منتصف الليل حين ياتى دورى على جهاز الكمبيوتر بعد معاناه مع ملعونة الحرسى وعفاريتها لو استبدلت المهنة والكتابة الى معلم حلويات لن تكون الحلويات الذ وازكا من ما تجود علينا به من العسل الطبيعى المقطوف على شكل احرف فى مقالاتك لا تتركنى حزين وهل يهون عليك حزنى ودمعى .يا بى منك
|
112- كريزة
بواسطة
موفق شديفات
23/7/2010 2:51:03 PM
امى بتسلم عليك وبتقلك وصفة الكريزة مش لقيتها وملعونة الحرسى ام عفاريتى تقول ليك ويش يا خى سويت حتى يمنعوك رجالة الله عوية مانعين انك تطبخ اسف تكتب نعود الى الكريزة مشان ربك نزلها موديل 2011 السميد برا والسكر جوا وحط لى على العيساوى
|
113- حتى بدون قطر
بواسطة
nasri taha
23/7/2010 3:42:56 PM
عزيزي احمد تحية معطرة لك من قلبي
اضحك كالمجنون بعد قراءة مقالاتك الخاصة باعداد الحلويات فهي تشبه الى حد كبير طريقة تشكيل الحكومات، لك من اسطنبول الف تحية
|
114- منطق اخر
بواسطة
اسامه الأعرج
23/7/2010 3:57:52 PM
استاذ احمد
مابعرف ليه عملت لي بآخر مقالين غصه مثل مابيحكي المثل صحيح لا تقسم ومقسوم لا توكل وكل لما تشبع
يعني المديونيه 14 مليار وحسب مابعرف بالقروش بطلعن أكثر من 27 ليره ونحن بحاجه إلى أكله ممكن اخترع اسمها ويصير مثلا سد الفم لأننا بحاجه الى هيك اكله وننتظر المزيد لأن الشمس لا تتغطى بغربال
ولا تنسي تغطيه يا كرمه العلي
|
115- مساء الخير للأخ عمان في القلب
بواسطة
ابو العباس
23/7/2010 4:54:34 PM
أجمل تحية مسائية وأشكرك على الملاحظة .
قص ولصق :
our social life is just about food
بصرف النظر عن التركيبة اللغوية الخاطئة لهذه الجملة ، كلمة just لوحدها تحصر مقال الكاتب وحياتنا الإجتماعية كلها بالحديث عن الأكل فقط .
الكاتب فاقعة مرارته من القهر على خنق مقالاته وحديثه عن الحلويات هو تعبير عن اختناقه من تضييق الخناق عليه بعد مقاله الممنوع من النشر (زجاج) ، ولو تأملنا كلماته في المقالين الأخيرين نستنتج انه تعرض لضغوطات من الرقابة الإعلامية ولجأ للتفشيش بالراحة والعوامة .
|
116- منسف
بواسطة
محمد ابو حسين
23/7/2010 5:34:47 PM
يا استاذ احمد الزعبي يا محترم انا بقول لو المقال التالي تحكي فيه عن وصفة المنسف باللحم و السمن البلدي و الجميد الكركي و كانهم زلام يمنعوه من النشر هههههههههههههههه
و الله غير تقلب عروسهم ميمعة
|
117- هدية للمعزب(منقول)
بواسطة
الماسة وحساسة
23/7/2010 6:07:03 PM
ألا أيها الليل الطويل ألا انجل ، أبشر بالصبح ، ( أليس الصبح بقريب ) . صبح يملؤك نورا وحبورا وسرورا .يامن أذهب لبه الهم :رويك ، فإن لك من أفق الليل فرجا ، ولك من السنن الثابتة الصادقة فسحة .يا من ملأت عينيك بالدمع :كفكف دموعك ، وأرح مقلتيك ، اهدأ فإن لك من خالق الوجود ولاية ، وعليك من لطفة رعاية ، اطمئن أيها العبد ، فقد فرغ من القضاء ، ووقع الاختيار ، وحصل اللطف ، وذهب ظمأ المشقة ، وابتلت عروق الجهد ، وثبت الأجر عند لا يخيب لديه السعي .اطمئن :فإنك تتعامل مع غالب على أمرة ، لطيف بعبادة
|
118- الى المحرر
بواسطة
الكركية
23/7/2010 8:43:21 PM
"الأردنيون جميعا لا يخافون إلا الله" مشان هيك ما بتنشروا المقالات الصريحة و التعليقات الجريئة بدون تغيير؟؟
|
119- ما قصرت
بواسطة
رمثاوي
23/7/2010 9:35:35 PM
راجع بياع العوامه الي غرب الجامع الكبير لاخذ المقادير الصحيحة مع العلم لانة نفق بكير امبارح
ونتمنا ان تكتب لنا عن طريقة صنع الفلافل المحشي
|
120- مرار طريق
بواسطة
مرار طريق
23/7/2010 9:42:48 PM
شكلك يا ابو الزعبي باقي كول لما كاتب المقال ............0000000
|
121- رائع يا استاذ احمد
بواسطة
منى الزعبي
23/7/2010 11:45:04 PM
رائع في كل كتاباتك يااستاذ احمد وبصراحة وكتاباتك تمس قلوب جميع الاردنين
وتعليقي غلى المقاله بانك ظلمتنا لاني والله كل سنه بنزل على كشك ابو على وبشتري كتبك الرائعة والمبدع يوسف غيشان
|
122- كل و أسكت
بواسطة
محمد المحمود
24/7/2010 12:00:04 AM
و الله أنا شايف أنه بعد شوي يا خوي بدك تبسط بسوق البحارة بسطة تبيع عليها أواعي داخلية و اذا بتحب ببسط ببسطة جرابات يجنبك و بصير جارك و بنصير نسولف عن ولا اشي.
يا خوي يا أحمد الله يعينك و يعطيك العافية و اهم اشي هالمقال تكتتبوا وين ما كان. بالرأي ولا على ورقة كيس اسمنت ولا بموقع سواليف المميز المهم يوصلنا.
|
123- وما نيل المطالب بالتمني
بواسطة
ابو العباس
24/7/2010 12:23:59 AM
تمنيت لو أنه هالمقال يتغير الليلة ، ما ظلش غير نسأل الكاتب عن لون العرباية اللي ببيع عليها فلافل وعوامة !! .
|
124- ليش منعناها من النشر
بواسطة
ابن الحكومة
24/7/2010 11:10:00 AM
لقد قمنا بمنع هذه المقالات من النشر لاسباب صحية وليس لاسباب مغرضة كما يروج لها البعض حبث ان الراحة والعوامة من الاسباب الرئيسية لمرض السكري الذي كت اجسام الاردنيين زتماما زي الملوخية ما تؤدي الى التهاب القولون فلذلك اي اكلة او حلويات ترتأي(غلط) الحكومة انها مضرة ستمنعها الا المنسف ربما يسمح فيه لغايات انسانيةلاصحاب الكروش
|
125- حفظ مسافة
بواسطة
آية علي
25/7/2010 7:28:03 PM
أنا بعتقد انو سبب منع النشر
هو بهدف حفظ المسافة مع احد المحطات العربية
بما انو أحد ابرز برامجها
تعرض للحسد
أو الغبطة الله اعلم
يعني ما بدنا ننام بين القبور ولا نشوف منامات وحشة
|
126- معهم جق
بواسطة
سالم الكردي
16/8/2010 4:36:15 AM
معهم حق يمنعوا هاالمقال من النشر. انت شوخصك بالعوامة؟ التخصص حلو ياأخي!!!! السيد الوالد كان حلواني شي؟لأ!! خلص ابن الحلواني حلواني وابن الفقير فقير وابن الوزير وزير وابن رئيس الو............ولابلاش احسن مايقولوا عدو الوطن!!!!
|
|
|
