|
حظي وعارفه!!
10/7/2010
الأحد 11-7-2010
ما شجعت فريقاً رياضيا ، أو حتى فريقاً سياسيا،وقررت ان اصبح من انصاره ،وآزرته من كل قلبي ودعوت له بالنصر المبين ..الا وهزم شر هزيمة..
أحياناً كثيرة افتح على قناة رياضية أشاهد فريقين من الدوري الألماني أو الايطالي مثلا ، لا اعرفهما ولست من المتحمسين لهما ،لكن من باب التسلية اتخذ قراري في التشجيع.. اشاهد النتيجة ،احدهما متقدّم على الآخر بهدفين مقابل لا شيء..فأقرر تشجيع الفائز ،وما ان اضع الوسادتين تحت كوعي، واحضر ابريق الشاي لأتابع متعة النصر ..حتى يتراجع الفريق الفائز ،وتضيع الكرة من أقدامه ، ويخسر في نهاية المباراة 4-2.
نادي الرمثا ايضا، كلما سمعت عن ادائه الرائع ، وقتاله في الملعب،وفرصته بإحراز اللقب ، اقرر أن أتابعه على المدرجات من باب المؤازرة والتمني له بالنصر ..لكن، ما أن افرش سجادتي تحتي ، واخرج من جيبي "كيس بزر شمس ابو العشرة "..حتى يتراجع لعبه ، و يتجمد رصيده ، وتضيع فرصته بأخذ اللقب، لا بل ويهدد بالهبوط احيانا.
في عام 2003 عندما اعلنت أمريكا الحرب على العراق وبدأنا نسمع تصريحات المسؤولين العراقيين المطمئنة قبل الحرب ، والتي تعد بدحر الجيش الأمريكي وتلقينه درسا لا ينسى..آزرته من كل قلبي، وذرفت الدموع آناء الليل، وعلّقت العلم العراقي على اسلاك الرموش، ودعوت له بالنصر المبين في كل سجدة.
وعند بدء الحرب ،ما ان وضعت الوسادتين تحت كوعي ، واحضرت ابريق الشاي لأتابع متعة النصر ..واذا بالدبابات الأمريكية تحوم في ساحة الفردوس..
في هذا المونديال قلت في نفسي لا بد من الاختباء وراء الأقوياء وتشجيع المنتصرين دوماً ، لأثأر على الأقل من كل هزائمي النفسية والفردية والشخصية والقومية والعروبية والحروبية ، ولأتذوق ولو مرة واحد طعم "الفوز" بالفروالة ، بدلاً من ان يبقى هذا الطعم غيبياً متخيلاً مثل فاكهة الجنة.
البرازيل ، المانيا، ايطاليا، هذه الفرق التي أشجعها بالترتيب..لا بل قد رجّح معظم المحللين الرياضيين ان يكون بطل العالم أحدها بلا منازع.."برضه ..بس حطيت" الوسادتين تحت كوعي وأحضرت ابريق الشاي لأتابع متعة النصر..حتى خرجت ايطاليا من الدور الأول،تبعتها البرازيل بصورة محزنة..
في هذه الأثناء كان المنتخب الألماني يبهر العالم..قلت: بقي الــ"مانشافت " والألمان حتماً لا يخيبون الأمآل.في مباراة الأربعاء الماضي ، أحضرت العدة المعتادة : ابريق الشاي والوسائد؛ لأتابع متعة "الدق الألماني"..وبالفعل ، قدم الشباب أسوأ مباراة في تاريخ الكرة الألمانية وكلما نظر احد اللاعبين الى الكاميرا أحسست انه يخاطبني قائلا: (منّك لله...).
اليوم شأني شان معظم الأردنيين سأشجع اسبانيا..لكن اراهنكم على حلق حاجبي الأيمن ان فازت..حظي وعارفه!!..
**
بالمناسبة بعد انتهاء المونديال ، أنوي تشجيع الحكومة من كل قلبي.
احمد حسن الزعبي
ahmedalzoubi@hotmail.com
|
1- من زمان
بواسطة
الماسة وحساسة
11/7/2010 12:33:46 AM
يسعد مساك استاذ احمد الزعبي
|
2- منّك لله...
بواسطة
دبل آر
11/7/2010 12:44:33 AM
الله ينوّر عليك يا زعبي.. هسّا ما تقول من زمان انك كاين تشجع البرازيل.. بدي اقول مال الجماعة روحوا بدري.. بالمناسبة أني بشجع البرازيل بس منك لله.. بتعرف من اليوم وطالع بدي أشجع الأخطبوب تبع ألمانيا لأنه هاظا هواته ما بتخطي.. لازم الحكومة تستوردلنا اكمن اخطبوط علشان يتنبأ لينا بالضرايب والأسعار الجايه.. وأنا معك بتشجيع الحكومة من اليوم وطالع بس ما ظنيت أنك تقطع بيها لا أنت ولا مية واحد غيرك...
|
3- بترجاك
بواسطة
ابو الخسبان
11/7/2010 12:49:48 AM
استاذ احمد بترجاك
مشان الله تفكك من اسبانيا وتشجع هولند مالها هولند بتجنن
لعيبة واورنج وحركات
ابو عبدالله اتمنى انك اقتنعت وبعدين ما اسبانيا فازت على المانيا
فعشان هاي الاسباب كلها اقولك فكر قبل ماتجيب ابريق الشاي والوسادة
واذا اصرت يا اخي اعطيها كاكاو ولا نص كافيه بس لازم تغير شيء
و حاب احكي بيت شعر للشاعر عبد الملك الزعبي بالقصيدة الي نشرها اليوم بعنوان عاد الخريف في زاوية بوح الادب
ما زلتُ انتظر الاجـل ارجوك عجّــل يا اجـلْ
ارجوك عجل يا اجل وفكك من اسبانيا
|
4- الحال من بعضه
بواسطة
القضاه
11/7/2010 12:50:09 AM
اذا فازت اسبانيا رح تحلق حاجبك لا تنسى؟؟؟!!!!!!!(*_*)
و اذا ع الحكومة انا بدأت أشجعها من الآن...........
|
5- كلو من ورى اخطبوط الحظ
بواسطة
TIMOOER 2L-ZO3BI
11/7/2010 12:50:58 AM
http://www.elaph.com/Web/Sports/2010/7/577986.html
|
6- طول بالك
بواسطة
الماسة وحساسة
11/7/2010 12:51:54 AM
استاذي الرائع.العلة مو في حظك لا
1.الوسادتين
2.ابريق الشاي
3.بزر شمس
4.التلفزيون
5.مو الحكومة
|
7- ههههه
بواسطة
احمد الغلاييني
11/7/2010 12:54:04 AM
ههههههه مشان الله شجع الحكومه من هلا ههههه اسمع اعطيك نص ليره وتشجع الضريبه ههههههه
والله انك انسان رائع ياصديقي تحياتي الك
|
8- يانصيب
بواسطة
ابو رامي
11/7/2010 12:57:18 AM
حقيقه بعد خروج الارجنتين والبرازيل وتراجع المانيا للدور الثالث بعد ان كانت صاعده كالصاروخ بالاربعات نقول هذا فطبول مدور ولا نستطيع التنبؤ فيه بشيء واما عن سوء الحظ فحدث ولا حرج فلو اشتريت كل اوراق اليانصيب الوطني وبيعت واحده لغيري فانها ستكون الرابحه بلا شك ومن حيث تشجيع الحكومه فان هذا لن يقدم او يؤخر مثل كلام الناس لانه ليس لها منافس في مونديال الحكومات واراهنك على رصيدي في بنك عوده بان هولندا هي الفائزه (ليس لي رصيد هناك)
|
9- بكره اسبانيا
بواسطة
معتز ابوقاعود
11/7/2010 1:00:15 AM
مسا الخير اشتاذ حسن يستر بيتك شجع اسبانيا مشان الي خلقك خلينا ننبسط بفوز هولندا وننتصر للالمان .ترا قاصدك ها
|
10- دخيلك لأ
بواسطة
د. عمر
11/7/2010 1:02:07 AM
دخيلك حج احمد روح شوفلك فريق ثاني شجعه خلي الاسبان بحالهم
|
11- صباحكم فل
بواسطة
ام احمد
11/7/2010 1:03:08 AM
اتخيل الأخت ماسة والماسة على أهبة الاستعداد ويديها فوفق لوحة المفاتيح بانتظار نزول المقال(تحية لاجتهادك )
وأنت أخي أحمد الحسن ما يحدث معك قاله لي ابني يعني لازم تتنافسوا مع الاخطبوط يعني الألمان ما جابوا إشي جديد كل شي عندنا منه .
يكفي أخي بأنك فزت بمحبة القراء الأفاضل . وبالنسبة لتشجيع الحكومة سأجعل أبني ينضم إليك حتى يزداد التركيز في التشجيع............
وصباحكم سكّرررررررررررر
|
12- رااائع و راااقي بدون منازع
بواسطة
irbed
11/7/2010 1:15:55 AM
عن جدّ انت شخص مش طبيعي ،بترجم احاسيس الناس بذكاء بطريقة السهل الممتنع ،بالزمانات قلت لو نوقف مع اسرائيل غير نكسرها ! رااااائع ،بس ارجع عالاردن بدّي اتعرف عليك شخصياً -اذا ما عندك مانع -معرفتك بتشرّف يا استاذ احمد يسعدك ربك شو بتفش الغلّ وانا بالغربه ،كل مقال بقرر انه ارقى من الّي قبله تا يجي الّي بعده بكون ارقى و ارقى-بصراحه انت راقي بفكرك و تواضعك .
|
13- HI
بواسطة
مخفي
11/7/2010 1:16:37 AM
يا زلمة الله يعطيك اللي ببالك على قد ما بتفش غليلنا...
الله يعطيك الف عافية..
|
14- عرف السبب
بواسطة
أبو إيثار
11/7/2010 1:17:25 AM
معناها أنا واياك سبب خروج الألمان
بس والله فكرتك غير شكل، عمرها ما أجت في بالي، سجل اسمي مع مشجعي الحكومة، وسنهتف معا للحكومة بعد تحضير الشاي، وأنا جايبلك معي بزر أحمر صغير. بس خايف الحكومة تفقسنا وتخالف العادة وتقوز! شو بدنا نساوي ساعتها؟!!!
|
15- الاخطبوط
بواسطة
سميح
11/7/2010 1:18:27 AM
بس المره هاي شكلها رح تزبط معك...لانوه الاخطبوط بول هيك اتوقع.:)
|
16- قزاز - حساس و مسقع
بواسطة
قزاز - حساس و مسقع
11/7/2010 1:25:50 AM
مقال من اعماق الروح تشكر ابو الزعبي
|
17- كيف تختار
بواسطة
صديقك
11/7/2010 1:44:23 AM
الاستاذ أحمد : أسعد الله اوقاتك.
هاي الشغلة كانت تصير معي بس لقيت الحل وهو قبل ان اختار اقرأ على الفريقين ......طه بنجي هو اللاذي كان ..... واختاره جرب اليوم مع اسبانيا وهولنده
|
18- ابريق الشاي والوسادتين
بواسطة
thaer attar
11/7/2010 1:47:42 AM
مش انت السبب يا استاذ .........
السبب في ابريق الشاي و الوسادتين هم النحس ههههههههه
|
19- Your an amazing guy
بواسطة
Abu Sohaib Sawalha USA
11/7/2010 1:49:48 AM
يسعد صباحك انت وجميع الاخوه والاخوات.استاذي الفاضل الطيرة شرك . على كل حال مشان الله لا تشجع المغتربين هنا في امريكا فقط للدعابه انت كلك خير، و ابتغوا الفضل عند حسان الوجوه، وانت ماشاء الله عليك تعال لعندي بشرط اذن ام العيال لجوزك احلى امريكيه.صباحك نرجس.
ـــــــــــــــــــ
المحرر :
نزعتها يا أبو صهيب . ومع ذلك تحياتي .
|
20- كلنا زيك
بواسطة
طلال الخطاطبه
11/7/2010 1:54:07 AM
صدقنا كلنا زينا زيك.الشيىء بالشيىء يذكر,اذكر عند عودة الديمقارطيه بالثمانينات قررت ومن باب أن صوتي حاسك ويرحج الكفة ومن باب ضخ الدماء الجديدة ومن باب أن من يجرب المجرب يكون عقله مخرب قررت في ذلك الوقت أن أحزم أمري وأحجب صوتي (قصدي ال 8 أصوات) عن كل المترشحين الذين سبق وكانوا وزراء واعطيت صوتي للوجوه الجديدة فسقطوا كلهم, وأجزم لو عرفوا بذلك لرفعوا دعوة علي بأنني سسبب سقوطهم أو أق شي قالولي منك لله.اللي عارف حاله حظه زي حظنا فلا يعلن عن تشجيع اي منتخب,ويعلن عن ذلك بعد الفوز خايف حدا منهم ينفلج.
|
21- Keep going
بواسطة
Moshtag
11/7/2010 2:11:51 AM
Please keep cheering for Spain because I want Netherland to win. And please stop cheering for Ramtha other wise my brother going to hit you.
|
22- **
بواسطة
ارجنتيني كح
11/7/2010 2:18:00 AM
صباجك قشطة ابو زعبي ....
طلعت الارجنتين
يعني لا أسف ع رخيص اذا راح غالي..
يلا اسبانيا مشان لاعبين البرشا
|
23- المنحوس منحوس
بواسطة
أحمد عبد النبي الحموري
11/7/2010 2:20:01 AM
ما دامك نويت تشجع الحكومه أكيد رايح تخسر كمان مرّه لأنه الحكومه دايماً ربحانه وخاوه ..لكاس العالم طلعو الأخطبوط الألماني ..أني بنصحك اتطلع البريعصي الأردني وخله يتوقع مين اللي بده يربح التعريفه!!!!!!
|
24- كانك بتحكي عني
بواسطة
من الكورة الابية
11/7/2010 2:58:02 AM
بتعرف انك بتحكي عني
|
25- يعني لازم الحومة بالنص
بواسطة
الراعي الصغير
11/7/2010 3:09:08 AM
مثل ما تقول انه نفسي اتذوق طعم النصر بنكهة الفروالة
وانا اقول مقالتك وعارفها لا زم الدخل الحومة بالنص من شان
تطفي طعم الجريب فروت على مقالتك عندما تدخل الحكومة بالمقال
|
26- شجع هولندا !!
بواسطة
ايمن الغنانيم
11/7/2010 5:27:58 AM
لدّ عي جاي !!!
هسع فهمت كيف فريق الرمثا الرياضي المبدع في الثمانينيات ما عاد له دور ولا يخوف حدا !! رغم انني شجعته من الثمانين للخمسة وتسعين !!
بلا حظوظ بلا سواليف تشجع هولندا وما عليك !!!
يعني معقول يا غايب عن الكرة تشجع اسبانيا الجميلة التي تبدع وتمتع العالم بكرتها وتتسبب بخسارتها للكاس !!
لد علي مرة ثانية : تترك لي اسبانيا وبرشلونة والرمثا ........ خليهم يفلحو الله يخليك
يبدو انك مواطن اردني تيبيكال
typical
( إن حظي كدقيق يوم شوك نثروه
ثم قالوا لحفاة يوم ريح اجمعوه )
|
27- هي المباراة الوحيدة
بواسطة
عبد الله سمارة الزعبي
11/7/2010 6:17:56 AM
مباراة ألمانيا الأخيرة هي الوحيدة التي تابعتها من كل هذا المونديال والسبب في عدم مشاهدتي للمونديال أنني قررت مقاطعته فوضعنا الحالي لا يسمح بتضييع أوقاتنا في هكذا أمور..
وما أن وضع إخوتي على المباراة وبدأوا بالتمجيد لإسبانيا حتى اتخذت قراري بتشجيع ألمانيا؛ للعلائق الرمثاوية الوشيجة مع الألمان، والثقة التامة بفوزهم 4-0..
وما زلت أنتظر بالطواحين أن تتحرك ولكن على ما يبدو أن زيت "الماكينات" قد نفد..
شكله مش لحالك يا ابن العم..
تحياتي للجميع وعقبال ما نشوف أثر التشجيع السياسي..
|
28- يا نسيم الصباح
بواسطة
الماسة وحساسة
11/7/2010 7:41:13 AM
صباح الخير يا وجهٍ تبسم من شعاعـه نـور ،
صباح الخير يا فجر ٍ ضوى هالكـون بأنـواره ..
صباح الورد يا عطر ٍ تفتح من شـذاه زهـور ،
صباح الورد يا روض ٍ مـلا هالقلـب بأزهـاره ..
صباح الخير للجميع.الاخت ام احمد.كل ما ذكرتية صحيح.والسبب اني سمعت من مصدر مو موثوق انه في جائزة للمعلق النشيط بسواليف.والذي يسابق الزمن .في الحصول على رقم 1.وانا والحمدلله اتوقع اني 10 مرات كنت الاولى .والكيبورد بشهد .
ولانه حظي وعارفة.الجائزة الي.
للعلم من بعدالساعة 11 ممنوع حد يحكي معي او يشغلني او حتى يناديني.
وسلامتكم
|
29- مش فاضيين
بواسطة
ابو رامي
11/7/2010 7:46:51 AM
يا اخوان نحن امه مشغوله بالعلم والاختراع والدراسات والبحث والبحش والنكش ليلا نهارا وليس لدينا وقت لمشاهدة المونديال كباقي المتفضيين في العالم واصلا
هذا الفطبول ما هو الا مؤامره عالميه لالهائكم واضاعة وقتكم الثمين عن عظائم الامور
|
30- حظ الحكومه قوي دايما
بواسطة
reem albawadi
11/7/2010 7:51:23 AM
الله اصبح الوطن واهله بخير استاذنا الكريم ارجوك غايه الرجاء حظ الحكومه لا تقرب عليه لانه حظك مش بهزم اسبانيا اوبخلي فريق خشاع سليتين افوز بالدوري او بخلي النفط ازنبع بالاردن وبخلي الصخر الزيتي ينطحن لحاله وينعصر ويصير بترول او بخلي الحكومه ترجع الضرايب للناس لكن لو شجعت الحكومه مش ممكن تنهزم لانه حظك وحظي وحظنا كلنامع الحكومه عارفبنه لا يمكن ان يتغلب عليها شو ما اوتينانحن من حظ اكيد الحكومه سوف تنال اضعاف مضاعفه منه . وترى حظي مشابه تماما لحظك امل اكون اول المشجعين معك للحكومه
|
31- الحكومة ستفوز
بواسطة
شيء
11/7/2010 7:58:30 AM
شجعت العراق ففازت أمريكا وشجعت البرازيل فخرجت من المونديال وستشجع الحكومة على أمل ان تخسر ولكن بما ان المتعوس متعوس فستفوز الحكومة كي تضيف كأس اللعبة الى خزانتها المليئة بالكؤوس ويضيف المواطن خيبة أمل جديدة الى خيباته التي لا تريد ان تنتهي .. لماذا لا نستغل فوز الحكومة الساحق والمتكرر في جميع مبارياتها ونرسل "فريقها" الى المونديال؟ حتما لن تتحمل باقي الفرق "غلوة" واحدة من هذا الفريق وسيعود بالكأس .. وصدق من قال ان "الكاس للحكومة".
|
32- عرفت السبب
بواسطة
خالد
11/7/2010 8:16:11 AM
هلأ عرفت السبب،
طلع موش الإخطبوط اللي بدهم يقلوه
طلعب السبب الوسادتين اللي بيحطهم الزعبي تحت كوعو
|
33- استمر
بواسطة
سرين
11/7/2010 8:28:28 AM
صباحك سعيد استاز أحمد، شجع الحكومة وانا معك رح أشجعها من كل قلبي متل ما شجعت الأرجنتين وخسرت...
بس لا تنسى الوسادتين وخلي كرمه العلي تحضر المباراة معك على شان إزا ثبت إنه "حظك وعارفه" تغطيك لأنه ساعتها "ما فيه فايده"
|
34- ممكن
بواسطة
زيد
11/7/2010 9:10:33 AM
سيدي الزعبي
كلامك طبق الواقع فنحن بلا حظ لاحكومة ولاحتى شعب للاسف اقولها
والله بلا حظ حتى خظي بالحب طلع كذب ونفاق
طيب ليش؟
لانو احنا مش صادقين مع حالنا . كيف بدك نصدق حكومتنا وحكومتنا بلا ضميييييييييييييييييييييييييييييييييييييييييييييييييييير
|
35- good morning
بواسطة
Abu Sohaib Sawalha USA
11/7/2010 9:25:11 AM
صباح الخير عهل الخير ،حقك علي والصلحه الك ولمحرر وام العيال،معلش من كثر ايام الغربه ٣٥٠ضرب عشرسنوات الواحد ما اكل جلتون ولا جعابير، وبشتغل ١٤الى ١٦ الى ١٨ ساعه بعض الايام الميزان الشقالي بختل على حال ارجو ان تبعث رقم تلفونك انت او المحرر على الايميل لانه فيه سالفه مهمه بدي احكيها معك .صباحكم مسك باذن الله.
|
36- المصلحة العامة
بواسطة
رمثاوي .... رمثاوي
11/7/2010 9:33:17 AM
جميا ان تجد ابجديات رياضية سياسية تنم عن درايةوخبرة ادعو دائما لك بالتقدم .... ولكن لي طلب لاتكن متشائم من الحكومة ...... العالم بأجمعه يعيش (؟؟؟؟؟؟) ارجو منك ان يكون لك صبر .......
|
37- بدون ابريق شاي
بواسطة
علي الحجاج
11/7/2010 9:35:09 AM
بدك اتشجع الحكومة ، فأذا لا داعي لابريق الشاي والوسادتين
خسرانه خسرانه
|
38- كلو منو
بواسطة
فارس
11/7/2010 10:17:23 AM
يا خوفي ابريق الشي هو اللي مخربها عليك,
على كل بس تشجع الحكومة, الله يرضى عليك تعمل نفس الخطوات, بلكي انغلبوا واحد صفر من نفسنا
|
39- حماتي
بواسطة
الأخطبوط
11/7/2010 10:24:44 AM
حبيبي أبو الزعبي .. بدي منك هالخدمة بالله عليك.. بدي منك تشجع حماتي... ابريق شاي مطروم لباب دينه على حسابي وبالمريمية مثل ما بدك.. وأحلى مخدتين لعيونك.. بس شجعلي أياها دخيلك..
|
40- رجاء
بواسطة
طلال الخطاطبه
11/7/2010 10:37:15 AM
رجاء بعد أربع سنوات عالعايش تشجع كل الفرق دفعة وحده بلكي خلصنا من المونديال بشقطة واحده.اليوم على خير بدي أشوف المباراة الوحيدة بالمونديال ذلك لأنني معزوم عالعشاء وبعد العشاء بدنا نشوف كورة نحن ومجموعة من الختياريه حتى لا نظهر أمام الجماعة المتقلطين أننا متأخرين.كذلك قال هيك بنظهر اننا أصصحاب مدرسة بالكورة بنحب نشوف المباراة النهائية فقط,المبارات الي راحوا مش من مستوانا.
المهم اقنعني المعزب بضرورة تشجيع اسبانيا,ومن باب اطعم الثم بتسحي العين بدي اشجع اسبانيا.هاسا اذا سقطت اسبانيا بتعرفوا ألسبب.
|
41- ااااخ بس
بواسطة
سنفور غضبان
11/7/2010 11:03:29 AM
يا خوف قلبي انك بتشجع الوطن
|
42- ههههههههههههه
بواسطة
Mustafa
11/7/2010 11:29:21 AM
وكلما نظر احد اللاعبين الى الكاميرا أحسست انه يخاطبني قائلا: (منّك لله...).
ههههههههههههههههههه قتلتني من الضحك على الصبح مع العلم اني متهاوش مع الخطيبة ومتهاوش مع مديري وعندي شغل ليوم الشغل ومع هيك فقعتني ضحك .... روح الله يبسطك زي ما ضحكتتني
|
43- حظي وحظك
بواسطة
العنقاء
11/7/2010 11:50:05 AM
حظي وحظك واللي ما له حظ لا يتعب ولا يشقى
ذكرتني بأبوي الله يرحمه وأموات المسلمين
كان لا يأمن علي ان اجلس معه في نفس الغرفى اثناء لعب الشدة
كلمته المعهودة
اطلعي من هون"هسع بتسمريني
ومعه حق
حتى لو نظرت الى اوراق الشدة التي في يده
حكم عليه بالخسارة
وما في ثلاث كروت على سوا
مثل ما صار فيك بهالمونديال صار معي
اي فريق اشجعه يطلع
بنص المونديال صرت لئيمة وشجعت امريكا وطلعت
رجعت لالمانيا وطلعت
اخوتي كانوا مع اسبانبا واني الوحيدة مع المانيا وطلعت
لما سمعوا اني بدي اشجع اسبانبا
قرروا ينوموني
|
44- إيدي بزنارك
بواسطة
أخخ
11/7/2010 12:15:43 PM
أستاذي مشااااااااااان الله شجع هولندا
إسبانيا أملي الوحيد بعد ما روحوا كل إلي شجعتهم
البرازيل - الأرجنتين - آخخخخخخ بس
|
45- كلو منك يا زعبي انتا وباول الاخطبوط
بواسطة
دنهـــــــــل ديــــــــزير
11/7/2010 1:16:09 PM
.... ضلينا مبسوطين على المانيا ولعبها من اول يوم لغاية مباراه اسبانبا وتقول فريق الطرة صار بطلو يعرفو يلعبو صارو عكسي اللعب .
على العموم شجع الحكومة الرفاعية بالرفع بلكي ضرب معك بريق شاي بقرفة
واليوم الفوز لهولندا وبنتجة 3*1 وعن سدر كنافة مين مراهن ؟
|
46- مباراة الشعب الاردني
بواسطة
عمر العودات
11/7/2010 1:30:35 PM
ننقل لكم في حي بث ومباشر مباراة الحكومة مع الشعب تلعب الكرة بقدم وزير التربية وتعليم طالع فيها طالع فيها الحكم يصفر بسبب خطاء الكتروني لكن الوزير طالع فيها بحولها لوزير الاعلام بحاو بحاول وزير الاعلام تذهب ركنية لصالح المعلمين
ترجع الكرة لوزير التربية والتعليم بضربها قوية قوووووووووووووووول لصالح الحكومة ... نعتذر عن نقل المبارة لاسباب داخلية عذرا
|
47- لالالالالالالالالالالالالالالالالالالالالالالالالا
بواسطة
From Madaba
11/7/2010 1:34:15 PM
داخل على الله و عليك .. يستر على حريمك ... و يوفقك دنيا وآخره ... ويخلصك ربي من الضريبة ... ويحرمك من الغلى و ... ينصرك على أعدائك بهالسحنة القدسية الملائكية المباركة ... إنك تترك اسبانيا بحالها .... هولندا أحلالك .. أحكيلك بهديك خط أورانج مشحون بخمس ليرات و مدفوع اشتراك لسنة ... اذا تركت اسبانيا .............................
|
48- Nseet Shagleh
بواسطة
From Madaba
11/7/2010 1:40:37 PM
و صحيح إذا بدك تشجع الحكومة .... ما عنك أصلا خيار ثاني ....
يا بتشجع الحمومة .. يا بتشجع الحكومة ..,,, وحده من هذول الثنتين !!!
وقتها بتبطل تحكي حظي وعارفة و العقدة بتنفك ....
وسلامتك .....................
|
49- أفضل معلق
بواسطة
هبــــــــــــه
11/7/2010 1:42:54 PM
تم اختيار عمر عوادات كأفضل معلق حكومي على أفضل مبارة ما بين الحكومة والشعب الا اننا نعتذر عن تققيم اللاعبين وذلك لأمور تقتضيها الضرورة ، مع الامل "أن يحكم الحكام(حكام المباراة وما تفهموا غلط) بقواعد اللعبة دون الخروج عنها و ان تنتهي المبارة نظيفة دون بطاقات صفراء أو حمراء.
غطيني يا كرمة العلي،
|
50- شو رأيك تشجع اسرائيل
بواسطة
جحا
11/7/2010 2:47:07 PM
تحية من الزاوية للزاوية
معزبنا العزيز اذا كان من تشجعه دائما خاسر فا شو رأيك تشجع دولة اسرائيل بلكي على الله خلصنا منها باسبوع زمن.
|
51- احلق
بواسطة
الكركية
11/7/2010 4:12:46 PM
و الله شكلك رح تحلق الحاجب يا عمي لأني متاكدة انه اسبانيا رح تفوز بالرغم من انه هولندا قوية لكن اسبانيا رح تفوز و ان شاء الله فوز ساحق والمباراة رح تكون حامية و رح يفوزوا يا 1 صفر يا 2 صفر و بتشوفوا
|
52- حاجب ونص هههه
بواسطة
تماضر مقدادي
11/7/2010 4:26:45 PM
ههههههه يااارب تفوز اسبانيا لاجل اشوفك بتمشي يمينك ولا لا ..؟؟
يالزعبي
لو بتشجع الحكومه ( حكومة قبض الارواح ) رح اظل ادغي عليك وعليها واقول شقع بقع يارب تقع الحكومة والي مساندها بشر اعمالهم
|
53- تحشيش
بواسطة
علاء
11/7/2010 4:28:50 PM
شكرا على مقالاتك الرائعة
|
54- معقووووول
بواسطة
جلال جيت
11/7/2010 4:40:33 PM
بجوز استاذ احمد الحق مش عليك بجوز ع ابريق الشاي
|
55- شجع الفريقين
بواسطة
نرمين خصاونة
11/7/2010 4:40:50 PM
يا ساتر...
أخي أحمد .. لا أظن أن حظك في التشجيع خائب وسيء.. بل على العكس تماما.. سوف ترى .. ستفوز اسبانيا .. وستعرف أن الحظ كثيرا ما يخيب ولكن في الآخر يبشر ..
يا رب اسبانيا تفوز لعيون أخونا أحمد...
..ولا أحكيلك ..؟؟
شجع الفريقين.. بس يا خوفي يفرط كأس العالم ..
|
56- Rai7o 7alko
بواسطة
Ordoni
11/7/2010 5:06:17 PM
Rai7o 7alko,
El 7koma bdon tshji3 faaaaaaaaashle, f mo m7tajin tshji3 el m3zzib.
,
|
57- من الآخر
بواسطة
اكرم نمر بدوية
11/7/2010 5:20:22 PM
استاذ احمد .. انت من الآخر
شوف شو صار بعقول الناس ... بتركوا المحللين الرياضيين وبردوا على اخطبوط !!
بس عندي طلب لو سمحت ... لو صار بفلسطين حرب مع اليهود شو رأيك تشجع اليهود ... بلكي خلصنا من قرفهم ما دام ما حدا قادرلهم
والك مني احلى باكيت ريفانين مع زيت خروع بالميرامية
|
58- الله يجازيك يا حظي
بواسطة
غالب شرايحه
11/7/2010 6:23:03 PM
اخي احمد أخالك جالسا فوق النتافه ونسمات العصريه تهب عليك هفهافه
ولسان حالك يقول : الله يجازيك يا حظي ما جدت لي من السنه بيوم
أو ان حظي كدقيق بين شوك نثروه
وقالوا لحفاة يوم ريح اجمعوه
لكنك من اليوم ستتخلص من النحس
وستأكل التبولة مع ورق الخس
لأن اسبانيا ستفوز بالكأس
وعندها لا يحتاج حاجبك للقص
وغدا ستقول هذا حصل معي بالأمس
لكن اياك ان تجلس على الوساده الخاليه
أو تشرب الشاي أبو المداليه
وان فعلت ستعود لك الحاله
|
59- التنس احلى
بواسطة
nadal
11/7/2010 7:30:23 PM
شجع نادال و رايح تحس بالنصر بشكل مش طبيعي
|
60- بالله عليك
بواسطة
انا
11/7/2010 7:38:16 PM
بالله عليك تسيب اسبانيا بحالها
اما الحكومة فبتركها لضميرك
|
61- حضّر نفسك للمفاجأة !!
بواسطة
بيبو
11/7/2010 8:28:39 PM
وحياة الأخطبوط باول يا أستاذ أحمد غير تفوز اسبانيا
أنا مشجّع ألماني متعصّب بس عندي اسبانيا بالمركز الثّاني وهولندا ثالثاً
ما عندي مشكلة في هالمونديال يتغيّر التّرتيب الفعلي للمنتخبات الثّلاثة بس حاب أطمّنك إنّك هاي المرّة رح تحطّ" الوسادتين تحت كوعك وتحضر ابريق الشاي عشان تتابع متعة النصر.
والله تعالى أعلم
|
62- خيار موفق
بواسطة
AIA
11/7/2010 8:39:43 PM
يعني ممكن تستمر بتشجيع الحكومة وتشجيع اسبانيا
بس يمكن لازم تجهز عدة الحلاقة
|
63- الا الحكومة
بواسطة
مصعب ملكاوي
11/7/2010 8:53:17 PM
مسا الخير
بالله يا استاذ احمد تبعد عن الحكومة لانها من غير هالواسطة ساخطيتنا
وعسوالفك هاي ابصر شو رح يصير *_^
|
64- بالله عليك
بواسطة
الزعبي
11/7/2010 9:06:54 PM
بالله عليك سيب اسبانيا وشجع هولاندا والحكومة الك ما حدا بشجعها غيرك
ماشي
|
65- طلب صغير
بواسطة
ابوشقر
11/7/2010 9:22:31 PM
ارجوك اتوسل اليك شجع الاعداااااااااااااااااااااااااااااااااءء
|
66- الى 59 نادال
بواسطة
لوليتا
11/7/2010 9:47:24 PM
والله معك حق ..
تابع التنس وشوف لعب الماتادور الاسباني نادال واشعر بطعم النصر الحقيقي :)
وسيبك من الكوره .. لا تروح تخسر اسبانيا يا زلمه :(
|
67- قسما بالله نفس الي بصير معي حرفيا
بواسطة
زعلان
11/7/2010 9:50:49 PM
الله اكبر وانا بقرأ المقال فكر انك بتكتب عني , ولكن ما أدراك في ما يدور بوجداني ان لم اطلع عليه حتى أحد,, بالحرف الواحد ,,ما يدور معي ..هكذا عندما اشجع فريق.. ولهذا السبب تركت التشجيع كله,,وهذا شعوري اذا خسر فريق كأنهم يقولي لي ارحم مشان الله لا تشجعنا..لدرجة اني صرت اشجع ظاهريا فرق غير التي اريدقلبيا , ولكن دون فائده تخسر الفرق التي احبها , واخيرا اتخذت قرار صعب وهو لن اتابع مباريات خلاص توبه, وما تابعت هذا المونديال فعلا...اما الحكومات فأشجعهادوما كي تخسر لكن يتعطل الحظ النكد سبحان الله وتفوز!
|
68- الدليل
بواسطة
زعلان
11/7/2010 11:06:31 PM
والدليل اني بطلت اشجع حد ولا حتى احضر مباريات ... اني الان بكتب التعليق في زمن المباراه النهائيه...وهي شغاله...وما بدي اتابعها .... لانو اساسا هزائم العرب بالمونديالات زهقتني الرياضه....واضف الى ذلك احتكار الجزيره للمونديال قرفني الرياضه كلها ....مع اني كنت مشجع ورياضي نشط
|
69- no wayyyyyyyyyyyyyyyyyyy
بواسطة
grfan w ya2san
11/7/2010 11:24:35 PM
مشان الله حد يجاوبني او اذا الاستاذ احمد فاضي يجاوبني ،ليش احنا الاردنين نحمل نفس الشعور -اقصد شعور النحس -شو نعمل ،اكثر المعلقين يحملون نفس شعورك والي ما علّق ادهى وامرّ ،وين المشكله احنا ما منحكم العقل و منحكم العاطفة ولاهي الحظّ؟جاوبوني باجيها يمين بتروح شمال وبعدين؟
|
70- إسرائيل
بواسطة
محمد ابو طريه
11/7/2010 11:48:49 PM
باللله عليك يا استاذ احمد إنك إتشجع بعد إنتهاء المنديال . شجع إسرائيل على كل إشي بتسوي ضد العرب والفلسطينيين ... بلكي عن طريقك نخلص من هلقصه ونرتاح ........ اخوي ابو حميد
|
71- احلق حاجبك
بواسطة
كوثر
12/7/2010 12:04:19 AM
بكرة من الفجر بدي اشتري الجريدة و بدي صورتك على الصفحة الاولى محلوق حاجبك اذنك صادق...
|
72- mabrook
بواسطة
Abu Sohaib Sawalha USA
12/7/2010 12:06:57 AM
مبروك ابو الزعبي ، كفاره شجع الحكومه
|
73- ^_^
بواسطة
خلينا عـ النقاط ......
12/7/2010 12:10:57 AM
ههه و هاي فازت اسبانيا يا عم
اشوف حظك تحسن
على هيك بعِّد عن الحكومة الله يخليك و لا تشجعها
|
74- لا تحلق حواجبك مسامحينك
بواسطة
أبو خشوم طفشة
12/7/2010 12:14:04 AM
قرابة؛؛ فازت إسبانيا
بس مسامحينك لا تحلق حاجبك؛؛؛؛؛؛؛؛؛
|
75- الف الف مبروك
بواسطة
مازن
12/7/2010 12:26:47 AM
الف الف مبروك ابو الزعبي واخيرا وليس اخرا زبطت معك وعلى طول انشاء الله بداية الخير تتويج اسبانيا وضلك شجع حبايبك ومابعد الضيق الاالفرج
|
76- Congratulations !!!!!!!
بواسطة
بيبو
12/7/2010 12:31:17 AM
ها ها ها
فارت اسبانيا ..
حظّك هالمرّة طلعت مش عارفه أستاذ أحمد
أرجو ألّا تفعلها وتحلق حاجبك الأيمن مش ناقصنا نشوف أبو اللبن :):):)
هاهاها
هاردلك لعشّاق منتخب الطّواحين البرتقاليّ والخير بالجايات
مبروووووك للجماهير العاشقة للفوريا لا روخا وعشّاق المدريديّ خاصّةً
|
77- يا عيني عليك يا ماتدور
بواسطة
اسبانية
12/7/2010 12:43:05 AM
مباااااارك يا استاذ عالفوز للماتدور وصحتين وعافية على الوجبة الحلوة عند هالمسا بنكهة النصر
بس لا تنسى راهنتنا على حلق حاجبك الايمن اذا فازت اسبانيا ....فنعيما سلف يا استاذ
|
78- اسبانيا
بواسطة
12/7/2010 1:07:41 AM
يالله احلق حاجبك
|
79- حظي وعارفه
بواسطة
الاء
12/7/2010 1:12:26 AM
الف مبروك استاذ احمد والله انا مثلك حظي وعارفه ومن الصبح ايدي على قلبي خايف على اسبانيا وكنت بدي احول على هولندا عشان تخسر بس قلبي ماطاوعني وزبطت معنا هالمرة الف مبرووووووووووووووووووووووووووووووووووووووووك
|
80- نعيما يا زعبي
بواسطة
دنهل ديزير
12/7/2010 9:31:13 AM
مهو الاخطبوط مع الاسبان والحكم معهم والارض معهم والجمهور معهم يعني مباراه اكثر من رائعة وبصراحة هولندا لعبت لكن نقصها الحظ .
نعيما يا زعبي
الاخطبوط اخو الشلن بدو طخ وقلي وشوي
|
81- فازت
بواسطة
قاعده
12/7/2010 10:54:17 AM
الاستاذ احمد الزعبي
الرجال بنمسك من لسانة و حضرتك بتنمسك من راس قلمك
وعد الحر دين
نحن بأنتظار صورتك بحاجب واحد بعد فوز اسبانيا
او " احكيلنا انك حلقت منصدق "
|
82- وعد الحر دين عليه
بواسطة
وجدي الادهم
12/7/2010 4:00:26 PM
الاخ الحبيب والعزيز والفالي احمد الزعبي والمحترم كمان
اولا انا معجب جدا جدا بكتاباتك واتحدى اذا انت كتبت مقال ولم اقره وحتى الممنوع من النشر
ثانيا انا اشجع اسبانيا بكل فخر لذا اطلب من حضرتك ارسال صورة شخصية لك ومحلوق بها حاجبك الايمن , ولازم تشكر اسبانيا انها فيرلتك حضك , عنواني موجود وانتظر صورتك .
ثالثا هذا الكلام ارجو ان لا يفسد الود واعتبره نكشة راس وارجو النشر وما تطنشنيش لو سمحت
وشكرا لك
|
83- قال حظ تعيس قال
بواسطة
نرمين خصاونة
12/7/2010 5:07:27 PM
شاااايف يا أخي أحمد .. ؟؟
فازت اسبانيا ..
|
84- على راسي حواجبك
بواسطة
هبه حياصات
12/7/2010 7:17:09 PM
يلا احلق حواجبك لا قصدي اليمين بس
|
85- الى 66 لوليتا
بواسطة
نادال
12/7/2010 11:42:27 PM
شكرا يوليتا............... و انا بس الاقي واحد بتابع التنس بحترمه كتييييييييير
|
86- غير رايك
بواسطة
ايمان
15/7/2010 10:58:33 AM
رجائي الحار لك ان لا تشجع حكوماتنا من اليوم وطالع ------------
لانها شكلها انعكست الامور معك بالآخر
|
|
|
