|
معلشّ
28/6/2010
الثلاثاء 29-6-2010
لو شيء لأرسطو طاليس "مؤسس علم المنطق" ان يعيش بيننا ومراقبة سياسات اداراتنا ..لاتخذ منذ يومه الأول زاوية في شارع الملك فيصل وباع عليها "جرابات نسواني ومزيلات عرق" وهجر علمه وقواعده ونظرياته وتبرأ من أتباعه ومحبيه الى يوم يبعثون...
الموسم المطري للعام 2008-2009 كان سيئاً جداً..ومع ذلك مرّ الصيف بسلام دون ازمات حقيقية ..الموسم المطري للعام 2009-2010كان ممتاز جدا..امتلأت السدود، ورويت الأرض ، وجرت الأودية ، و "ترعت" الخزانات ، وتدفقت العيون ، وزاد الضخ..ومتنا من العطش..
كيف لأرسطو طاليس أن يفهمها دون ان يقلب الطاولة علينا : في موسم الجفاف..نشرب ، وفي موسم الأمطار نعطش...
منذ بداية الصيف و"خزاني" لم يفرح بنصف متر، أغتسل مسداً كمن يتدهن بكريم الحروق، وامشّط شعري بالمكسنة الكهربائية ، وأغسل ملابسي على الندى مثل الانسان الأول.. مشهد "تنك الماء" الخاص بمصطفى فغاغا وهو يتهادى "ويطفطف" الماء من فوهته الفوقية ، اشهى من رؤية سيارة البوظة ،والبربيش الغليظ الملتوي بات عندي أهم من "بربيش الأرجيلة" وصوت ماتور السحب أحب الي من صوت "فضل شاكر"..
بحّ صوتي ،ونبت على لساني شعر طبيعي ، لكثرة ما راجعنا "سلطة المي " بضم السين .. الجواب واحد هذا نصيبكم ..تحملونا ..طيب أين ذهبت ماء السماء والأرض ،لماذا عشمتمونا طوال الشتاء بأرقام التخزين والسدود، 6 شهور وأنا أمسك "مسطرتي" وأقيس سدودنا سدا سداً، وازيل الطحالب عن تقارير الجرائد لنشرب ماء زلالاً..اين ذهب الماء..؟
قبل يومين قابلني شخص وطلب مني أن اكتب عن ازمة المياه في قريته ..لفت انتباهي ان على جبهته ثلاثة خطوط متوازية من العرق مثل وسم القبائل الافريقية .. قال لي : اذا اردت ان ترتوي جيدا عليك ان تكون من ذوي القربى "لموزّع الأدوار"..فالموظف الذي..يفتح "المحبس" يخصص يوماً لأهله ..ويوماً "لأنسبائه" ويوماً"لعدايله" ويوماً.."لشلة الطرنيب"..ويوماً "لسلف اخته"..ويوماً " لأهل كنته" ..واليوم الأخير لباقي الرعية.. فقلت له : بلاقيش حواليك بنت حلال مستورة..مش مهم تكون دارسة أو جميلة أو موظفة..المهم يكون أخوها "بسلطة المي".. واذا صار نصيب ، يا سيدي خير البر عاجله ، بنقرأ الفاتحه هون"ع المحبس"...
**
اذا كان توزيع مياه الشرب لا يتم بطريقة نزيهة وشفافة.. كيف لنا ان نثق بأن تكون الانتخابات نزيهة وشفافة!!
غطيني يا أرسطو طاليس ..وافرش بالعريشة..
احمد حسن الزعبي
ahmedalzoubi@hotmail.com
|
1- لمي مي والإنتخابات كرجة مي
بواسطة
أحمد عبد النبي الحموري
29/6/2010 12:01:07 AM
بدّي أقول كل واحد يحفر بير ..لكن الناس مهبرته والدنيا بطلت تشتي ... والنزاهة بتبخر مع تبخر مية السدود .. والإنتخابات بينها وبين النزاهة بلاد وعباد ..واحنا مش بحاجه أصلاً لمجلس نواب ..احنا بحاجه لحفيرة ابيار عالأبواب
|
2- like it
بواسطة
29/6/2010 12:01:54 AM
لحاف كرمة العلي بطل ينفع حتى منطق أرسطو كلو ما رح يغطي ولا يدفي
|
3- هيك زعلتني منك
بواسطة
دبل آر
29/6/2010 12:10:04 AM
بلاقيش حواليك بنت حلال مستورة..مش مهم تكون دارسة أو جميلة أو موظفة..المهم يكون أخوها "بسلطة المي".. الخ.. هاي آخرتها يا ابو عبدالله... له له له.. يا زلمة زعلتني منك..
|
4- المية بتسحل
بواسطة
العنقاء
29/6/2010 12:12:31 AM
من أولها ترى لا تركنوا على ما أقول
قرأت أن إحدى بنود معاهدة وادي عربة تنص
على ان الابار الارتوازية التي تخزن ماء الشتاء في سحم الكفارات
ليس لنا بها نصيب
بل تذهب الى غرب النهر
ويا ريت الى إخواننا الفلسطينيين بل الى غيرهم
عاد اذا الأمر هذا ينطبق بالمنطق على باقي ابارنا الارتوازية ما بعرف
ممكن هذا هو السبب في أزمة المياه التي لا تنتهي عندنا
حتى ماء الله من سمائه على أرضنا وفي ابارنا التي في جوف أرضنا "تسحل"
لا
وبعد هيك بيقولولنا مياهنا المستعادة
صحيح مستعادة
بس على شكل ماء مجاري تلقى في النهر
|
5- أو.............
بواسطة
العنقاء
29/6/2010 12:19:15 AM
هالمرة راح احكي اللي بنفسي
كل أزمة اقتصادية فيها مستفيد
كل أزمة نفط فيها مستفيد
كل أزمة غذاء فيها مستفيد
كل أزمة قهوة فيها مستفيد
كل ازمة مياه فيها مستفيد
والمستفيد من أزمة المياه هو مصطفى فغاغا ما غيره
هو وأمثاله
ومن يعملون تحت إمرته
استغلال للأوضاع البائسة للناس
والماء هو الحاجة الثانية للانسان بعد الهواء
احبس الماء عن المواطن
وافتحه على الصهاريج التي تبيع الماء
والصهريج حجم 3 متر ب 12 دينار
وإذا طلبت صهاريج البلدية
راح تموت من العطش وما بتوصلك
على فكرة
العروس ممكن يكون اخوها مصطفى فغاغا
|
6- بركات ورسن
بواسطة
ابو رامي
29/6/2010 12:47:22 AM
بصراحه تصلنا المياه يوما في الاسبوع صيفا شتاء من منتصف ليل الاثنين وحتى مساء الثلاثاء بغض النظر عن حالة الموسم الشتوي علما باني لا اعرف احدا من
سلطة المي ولربما كوننا في عمان الغربيه وليس في الرمثا قد يكون احد الاسباب
الوجيهه وكذلك قربنا فشخه من مقر رابطة الكتاب الاردنيين قد يعطينا بعض البركه
اما فيما ينعلق بارسطو فلديه الكثير من الاسباب ليتخلى عن علم المنطق ويبسّط
في زاويه على سقف السيل يبيع فيها الدخان المهرب ووصلات الكهرباء الصينيه معدومة الفولتيه وساعات جوفيال وتيسو المقلده
|
7- بمثل واحد
بواسطة
عمار بني حسن
29/6/2010 1:09:10 AM
يا طالب الدبس من ذيل النمس
و أيضاً ...
إن لم تكن ذئباً ولا عشرة على الشجرة .
|
8- ازمه
بواسطة
عماد البطاينه
29/6/2010 1:12:07 AM
عجبني تعليق العنقاء رقم 4
بس بدي اسالها عمري صار اكثر من 40 سنه
ولا ازمه استفدت منها معقول الي اسم؟
الحموري الله يجزيه الخير ودالي زنانير من اميركا
خاف الله هاظ هو نصيبي
عكل حال اللي بتنوعد بيه احسن من اللي بتوكله
موعودين بديمقراطيه ورفاهيه وحياه كريمه
وقمصان من عند الحموري
ولا لا يا خالي يا زعبي؟؟؟؟؟؟؟؟؟؟؟؟؟؟؟
|
9- عمااااان
بواسطة
متغرب
29/6/2010 1:12:59 AM
هذا سبب آخر يخلي الواحد يأجل النزلة السنة للشتاء
بحبك يا عمان و بحب هواك و بحب مياتك و رحلاتك بس مش لاقيهم
الهوا بالصيف معجج بالشيشة
و المية شحيحة
و الرحلات مزحومة
و آه يا بلد
|
10- عطشان
بواسطة
ابو الحسبان
29/6/2010 1:16:57 AM
انا من مواليد قريه تقع بين جرش المفرق وكنا مش سالين عن الحكومه لانو كان عندنا بير بس الحين انتقلنا على المدينة وسلمنا رقبتنا للحكومة والله لا يفرجك شو تساؤي الحكومه بالي تستلم رقبتو
الحين عندنا 4متر عالارض واربع متر عالسطوح تحسبا لاي حركة من الحكومه
كانت تصل المياه ضعيفة وكنا مفكرين حالنا اشطر من الحكومة نعبي تحت ونسحب بالماتور
رفعو الكهربا قلنا ..
اما بقطعوها بالمره انا عطشان وزعلان
الاخت عنقاء تعليقك جدا رائع
الاخ عبد الملك الزعبي مازالت ابداعتك الرائعة في زاوية بوح الادب تمتعنا
|
11- Please answer
بواسطة
Sonia
29/6/2010 1:19:34 AM
Who is Mustafa Fahgahg
|
12- كبييييير
بواسطة
حازم بريكة
29/6/2010 1:56:31 AM
والله انك كبييييييييييير ياابوزعبي
ومقالك كمان كبيييير
وقلمك كبييير
وتنك المي الي عندك كبييير
واحلى تحية للحكومة وسلام مربع لسلطة المي (بفتح السين)
ورقصني ياجدع
|
13- خض المي وهي مي
بواسطة
اردني و افتخر
29/6/2010 3:58:55 AM
مساء الخير على الجميع
الي فتره لم اعلق على مقالات كاتبنا الكبير لكن لفت انتباهي خذف السطر الذي يتحدث عن الانتخابات من النص الاصلي للمقال فاذا لازل الرقيب يخشى ان يتم التطرق للانتخابات من قريب او بعيد وذا كان وجهات النظر عليها رقابه ف الاولى ان نبقى عطشانين و ما بدنا مي لان حريه الراي و الفكر اهم من الخبزو الماء
الى متى !!!!!!!!!!!!!!!!!!!!!!!!!
|
14- اقتراح
بواسطة
شيء
29/6/2010 8:04:35 AM
اذا كان مجرد مسؤول عن "محبس مي" قد نزع كل ما عليه من لباس "الحياء" وارتدى لباسا "شفافا" ليظهر محاسن ومفاتن عورة ضميره في وضح النهار طلبا لإرضاء فغاغا وأمثاله فما الذي سيفعله مسؤول صناديق الأصوات داخل الغرف المغلقة؟ لابد انه سيتجرد من كل شيء حتى ورقة التوت سيستغني عنها كي تكون العملية ليست مجرد شفافة بل غاية في الوضوح!! هناك اقتراح بعد أن عز (المآآآآء البلدي) وهو ان يتم استيراد ماء "مجمد" للغلابا على غرار اللحوم والأسماك المجمدة وليس مهما ان يكتب عليه اسم الطريقة التي ذبح عليها المهم ان يكتب عليه عبارة: (للذين يذبحون على طريقة حكوماتهم).
|
15- المنطق وما ادراك ما المنطق
بواسطة
reem albawadi
29/6/2010 8:04:47 AM
الله اصبح الوطن واهله بخير المنطق بقول اشياء كثيره والمش منطق بقول اكثر فصاربينهم مباراه المنطق اقول احفر خزان مي الك ولعيالك وبتعتازش حدا الثاني لا تردش بجيبلك المي لعندك بلا تعب وجع راس لمنطق قالي انت دكتور بتوظف بشهادتك الثاني لا انا واسطتك تردش عالحجي المنطق. معدلك عالي وانت اردني رافع راسك بتدرس الي بدك اياه وبلاش الثاني قا لا اردني رافع ولا منزل بفلوسك بتدرس وين مابدك وصار بينهم حجي كثير ونا بينهم مسطول مش عارف ارد على مين والي فاز الثاني تعال يا طاليس ابيع جرابات معك اي هو بيمنطق بالبلد
|
16- التلاعب بتوزيع الماء يتبعه التلاعب بتوزيع التنكات
بواسطة
محمد شواهين
29/6/2010 8:25:05 AM
في العام الماضي لم يصل لحييّنا نقطة ماء وبعد شكاوي أخبرونا أنهم سيوزعون علينا الماء بالتنكات ,ولكن لم يصلنا أي تنك بينما جارنا الذي له قريب في سلطة المياه وصله 3 تنكات كبيرة في اسبوع ,وقس على هذا
|
17- أنا بقولكم وين المي
بواسطة
alma
29/6/2010 8:42:35 AM
المي , , , , , , , , , , , , ,مبيووووووووووووووووووووعة
وإبلاش كمان !!!
|
18- أي منطق هاد...؟؟!!!
بواسطة
سرين
29/6/2010 8:58:01 AM
أصلا لو يرجع أرسطو رح يحكيلك "منطق إيه إللي انته جاي تقول عليه إنته عارف أصلا معنى المنطق إيه" ورح يصير يبيع فول وبليلة بالشوارع ويحطهم بالورق يلي كتب عليه المنطق ولو بدنا نقيس الأمور كلها ع المنطق كان عدمنا أرسطو وموتناه مرة تانيهلأنه بالنسبة لحياتنا بكون كلامه كله غلط بغلط وإزا ضلت ع المي بتهون بس ما تكبر لأمور أكبر
لا تغطيني يا كرمة العلي في إلنا قرابة بسلطة المياه
|
19- المواطن المسحوق
بواسطة
حمزة تفاحة
29/6/2010 9:40:36 AM
الهدف من الترشيدات والبروشورات والدعايات وحملات التوعية التي تصدرها وزارة المياه والتي تتحدث عن ترشيد إستهلاك المياه ويتم توزيعها على المواطنين وعرضها على شاشات التلفاز أثناء الاستراحات بين كل مسلسل ومسلسل ، هي بالضرورة للفت نظر المواطن ، والحد من راحته في استهلاك (متر المي ) الذي أصبحت الحكومة (تهت) على المواطن وتتحكم به بسبب هذا المتر الشحيح !!
الحكومة متمثلة بوزارة المياه على استعداد لادخار ميزانيتها كاملة بل وانفاقها من أجل تعليم المواطن فن استهلاك المياه والتوفير والتقنين ، فليس من الضرور
|
20- اخ لو تصير هسلافة
بواسطة
عمر العودات
29/6/2010 10:00:49 AM
يا سيدي فيه عندي فكرة بتحل كل الازمات مش بس المي كمان والعسل والقشطة والفول يا سيدي بس نطبقها تخيل ان هنالك مجلس امناء لرئاسة الوزراء مهمته مناقشة عمل الحكومة ويكون رئيس الحكومة الناطق باسم المجلس وتكون قراراته بعيدة عن الشخصنة. كمان في جميع الوزارات يكون هنالك مجلس امناء فمثلا وزارة المياه والري يكون مجلس امناء مسؤول عن اي قرار والوزير بس عليه المتابعة والتصريح وهيك ما حدى بساوي الي بدياه في الحكومة . يجب ان يكون مجلس الامناء مكون حسب المناطق والاقاليم وكمان يكونو كبار بفهمو ا مصلحة الوطن
|
21- مبدع
بواسطة
حنين
29/6/2010 10:14:24 AM
اجمل ما في مقالاتك انك بتفتح قريحة المواطنين بافكار رائعه
والله احنا غلابى وبنرضى بالقيل
|
22- هنيالك يا استاذ رائد كريم الزعبي
بواسطة
اسامة كايد الحمزة
29/6/2010 10:32:45 AM
المحرر:
تعليقك خارج الموضوع . تحياتي
|
23- واسطات
بواسطة
وائل بطاينه
29/6/2010 10:42:48 AM
والله يا خالي يا زعبي كلها واسطات ومحسوبيات عنا.
اذ بتعرف حدا بدائره حكوميه هيك مشيت حالك ما بتعرف راحت عليك .
شو بدنا نعمل بعين الله بنتمنى انه يسود النظام بكل الدوائر الحكوميه وتبطل المحسوبيه وصدقني انه لحاف ارسطو طاليس مخرم بتموت من البرد وما بتتدفى .
|
24- هدوا اللعب يا اخوان
بواسطة
مواطن قنوع خنوع مسيح جوخ ومنطقي كمان
29/6/2010 10:48:40 AM
المهم هيوا الريق عندكوا ما نشف والمنطق بيقول اذا ما كنتوا قد المارد لا تمزحوا معوا
احنا لازم نوفر المي لاسيادنا بغسيلنا ونظافتنا واذا وصلت لشربنا كمان مش مهم خليهم يسبحوا ويظلوا مبوردين وملتهيين عنا والا تراهم ما بهمهم لو سبحوا ببركة دم المواطنين.
رأيي تهدو اللعب احسن وهيوا ارسطو اتحكم فيه زوجتة بالله عليكوا مالو فغاغا عالاقل بخليكوا تشربوا
|
25- من زمااااااااااااااااان يا ابو عبد الله
بواسطة
رمثاوي
29/6/2010 11:21:39 AM
مشان الله من زمان اكتب يا ابو عبد الله والله الناس بالرمثا استوت وانته منهم .. بس تأكد انه المشكلة مش بتوزيع الادوار .. هاي المشكلة ثانوية ، احنا مشكلتنا بالمي وين بتروح قبل ما تصل للرمثا ووين بودوها ؟ مرة بحكو انكسر الخط ومرة الكهربا انقطعت والمرة الجاية بحكولنا قضاء وقدر !! طيب سلطة المي ما عندها مولدات كهربا احتياطية ؟؟!!! معقول اللي بصير ؟ هسع الفقير بقدر يدفع 20 دينار ثمن تنك ميّ ؟؟ الشغلة بدها رحمة
|
26- قال نزاهة
بواسطة
ريما
29/6/2010 11:50:16 AM
الله الكريم ---- بس يمكن احنا ما بنستاهل
غطيني ببعض من النزاهة و الشفافية
وخلي الباقي على الله
|
27- مداخله جانبيه
بواسطة
ابو رامي
29/6/2010 11:54:48 AM
وحتى نكون متوازنين في التعليقات وذكر الحقائق فيجب ان اذكر ان هناك مواطنين يسرقون مياه الشرب لسقاية مزارعهم وطرشهم وبعضهم يكسر الانابيب لتهر المياه تجاه ارضهم وهؤلاء يحرمون غيرهم من مياه الشرب و كذلك هناك من يعبث
بعدادات المياه ولكن هذا كله لا يبرر حرمان المواطنين من المياه وتوزيعها بالعدل وحسب الدور عليهم وليس حسب مزاج مدير المحبس العتيد
|
28- اللهم اروي عطشهم
بواسطة
ابو العباس
29/6/2010 12:19:54 PM
مرحبا للجميع ،
السؤال هو مسؤولية من عندما يتلاعب موظف (محبس) الميه بالتوزيع ؟
هل هي مسؤولية (سمير الرفاعي) ؟
هل هي مسؤولية (وزير الميه) .
أو مسؤولية رئيس البلدية ؟
أو مسؤولية عدم إدارك موظف توزيع المياه بواجباته الأخلاقية ؟
أو هي قلة دين وقلة ضمير عند الموظف وعدم خوفه من الله ؟
من المسؤول ؟
اذا كان الموظف هو الفاسد وهو المسؤول عن فساده فإمسكوه في الشارع وغرقوه ببركة ميه .
أو بدكو تتحملوه على علاته .
|
29- الله يرحمنا برحمته
بواسطة
هبة
29/6/2010 12:31:13 PM
والله يا جماعة هالشعب عايش برحمة ربنا وبس و الحكومة جميلتها عحالها...الحمدلله على كل حال
|
30- من باب الانصاف
بواسطة
الراعي الصغير
29/6/2010 12:59:31 PM
ايام ما كنت في البلد
كان جارنا في راس الهرم الوظيفي في السلطة( بضم السين)
وكانت تيجنا المي يومين في الاسبوع ولم يكن في تخيز
ومن باب الصدفة ان موظف "الشبر" او المحبس صاحبنا وجارنا ورجال بخاف الله
بس اذكر مرة انقطعت المي عند صاحبنا وكان عرسه في هذيك الليلة واضطرينا
نتصل عليه وقلنالو "افتح الشبر ولا تكون دقر" خلي السهرة تمر على خير وتم فتح الشبر بس على منطقة ثانية مشان
|
31- الى تعليق رقم 10
بواسطة
عبد الملك الزعبي
29/6/2010 1:28:47 PM
تعليق جميل
دعني اقول شعرا ً
***************
في غربتي قلبي البريء يــُدانُ
"ومن الطبيعي" انني عطشان ُ
انتم هناكَ ... وما رأيتُ مواطنا ً
ً الا وصبرُ فؤاده ظمـــآن ُ
ما بالكم ... إني تعبت ُ بــِهــَمّــكمْ
اسعف صديقـَك يا "أباالحسبانُ "
**********
شكرا ... دعوة جديدة لمتابعة الكتابات في زاوية بوح الادب .. شكرا ابو عبد الله شكرا محرر ... شكرا زيــوت ...
|
32- المليح الي الله بيوفقه
بواسطة
كباكب رايحه المي
29/6/2010 1:46:20 PM
يا حرام والله كل المي رايحه هيك اذا فيه بير بدهم يوسعوه لوثوخ وكان كل يوم يكبو مية الف قالون منه لمده شهرين بهل الوادي مش حراااااااااااااااام عليهم
|
33- الأخ الصديق ابو رامي/تعليق 27
بواسطة
ابو العباس
29/6/2010 3:53:42 PM
مساء الخير شيخنا ابو رامي ، طرحت نقطة هامة جدا في الموضوع وما تقوله صحيح 100 % ويجب أن يؤخذ بالاعتبار ، حسب علمي المتواضع ان ما تقوله يحصل فعلا . تحياتي .
|
34- ؟!
بواسطة
29/6/2010 4:57:49 PM
وينت يا كرمة العلي بس ؟!
|
35- مريت امسي
بواسطة
الماسة وحساسة
29/6/2010 5:44:03 PM
يسعد مساك استاذ احمد الزعبي
ويسعد مساء الموجودين جميعا"
للأسف ما عندي مشاكل بالمياة.وما بتذكر انه انقطعت عندنا.
لكن الله يكون بعون اللي بتنقطع عندهم المي.لانه ما بنزلوا عالبركة يسبحوا.ولا يغسلوا سياراتهم باب البيت.ولا بسقوا ورد الجوري والياسمين.ولما بشربوا شاي ما بكون معة نعنع من حديقة البيت.
حقيقي مشكلة كبيرة.
نسيت احكيلكم انه خالي بسلطة المياة.ولهيك مدعومين.
|
36- هلكتنا
بواسطة
baslovv
29/6/2010 5:50:56 PM
يا رجل يا فاضل حرام عليك ارحمنا ميشان اللي خلقك يعني فقر وقلة كيف
سيبك وريح راسك من المصطلحات نزاهة امانة ثقة اللي راتبه مش مغطي خوازيقه في القطاعين غصبا عنه بده يفتح لقرايبة بلاش يعملوا فيه عكس التيار وتصير مرته الزلمة ويلعنوا اهله .. الفقر بخلي الواحد ين؟ مش يفتح محبس
|
37- ترى النعمة زوالة !!
بواسطة
نشمية
29/6/2010 6:41:36 PM
من زمان وإحنا بنسمع أخبار الشتوية : السدود مليانة والنعمة خير الله والموسم يبشر بالخير,, وأخبار الصيف تهكم وشكوى وتظلم وقلة مي,, فيه مثل : إللي بينكر نعمة الله,, الله بينكرها عليه,,
تحية احترام مليانة مي لعيون أبو العبد ولكل العطشانين,,
|
38- مو فاهمه
بواسطة
30/6/2010 9:39:22 AM
منشان الله حدا يحكيلي مين مصطفى فغاغا؟؟؟؟؟
|
|
|
.jpg)
