|
عنّك جاي..!!
18/5/2010
 الأربعاء 19-5-2010
عندما تدخل الى محل "نوفيتيه" وتطلب أكثر من قطعة ملابس للإختيار،تقيس هذه وتبدل تلك..ثم تصل الى قناعة ان شيئا لم يعجبك، فإنك قبل ان تخرج - لا شعوريا- تحاول ان ترتّب القطع المبعثرة على طاولة البائع وتعيدها الى وضعها الطبيعي ، بالمقابل فإن الرجل سيبادرك حتماً بعبارة "عنّك جاي" لعدم ثقته بقدرتك على "التصفيط"...
**
وبنفس السياق يعاملك "البنشرجي"..اذا ما استليت "بربيش الهوا" ومضيت به نحو مركبتك فإنه سيلحقك ويقول لك"عنّك جاي"..كي لا يخسر نصف الدينار "بغشيشه" ولأنه يعرف انك غير اهلٍ "لتعيير العجال" كما يجب...
**
مثال مختلف ،عند دخولك الى سوبر ماركت لتشتري بعض الشوكلاته والشيبس لأولادك..لاحظ انك بمجرد تناولك كيس البلاستيك لتعبئته..فإن موظف المحل سيترك الصندوق ويتناول الكيس من يدك مرددأ"عنّك جاي"..ليس محبة بك، ولا لعدم ثقته باختيارك..ولكن خوفاً من ان تدحش "مصاصة" في جيبك على غفلة او ان تواري حبة"راس العبد" في بطانة الجاكيت...اذن كما تلاحظون فإن "عنّك جاي تقال بحالة انعدام الثقة بأنجاز العمل كما يجب، "او "بانعدام الثقة" بالمحاسبة حسب الاصول...
**
وبناء على ما ذكر ، بودي ان اقول للجنة تسعير المحروقات:عنكو جاي..اعطونا برميل النفط كما هو عالمياً بــ 70 او بــ80 دولار ..ونحن نصفيه براحتنا:اوكتان 90..اوكتان 95..اوكتان 20.. نغمّسه برغيف مشروح.. نلعن "أُكته" ..نحن احرار...اما ان نترك الوضع هكذا "تلولحي يا دالية"..صعب ..
لقد اقترب سعر التنكة من سعر البرميل..ولّ..بدها مخافة ألله ....!!!!!!
احمد حسن الزعبي
ahmedalzoubi@hotmail.com
|
1- عنك جاي
بواسطة
طلال الخطاطبه
19/5/2010 1:02:37 AM
وانا كمان بدي اقول لكل اللي في بالي عنكو جاي من زمان . بس بفكروا اني مش مركن عليهم وبتخرب بينا وبينهم.
عنك جاي
|
2- خض المي وهي مي
بواسطة
م . بلال الزعبي
19/5/2010 1:03:18 AM
كيف ستمص الحكومة دمي ودمك ودم الشعب المسكين
أحمد الزعبي بده يقول للجنة "عنكو جاي"
كرمة العلي "عنك جاي" انا بدي اغطيه الليله .... ما فيش فايدة
|
3- بخــ ..... شيش..
بواسطة
القروي المصخم " بالصاد"
19/5/2010 1:34:23 AM
والله يا عمي طلال الخطاطبة معنقر فوق لخاله أول واحد.. بطلعلك يا ابو محمد.. هاي كمان شويه بتصل للمقاله الصحيح اليوم مقالة الزعبي من الآخر.. وخايف نرجع لأيام زمان نصير نشتري الكاز بقنبنه خضرا.. أكيد الخطاطبة متذكرها لأنه قروي مثل حكايتي .. كيف يا خطاطبة .. بالعضل.. عملتك ختيار..بنرجع لسولافة " عنّك جاي" لأنها هاي مشكلتي اولادي معي لأني كنت أعاني منها مع أبوي.. يا أخي الحكومة بتتعامل معنا مثل الأب مع أولاده ما بتركن علينا.. فيها اشي؟؟ بس الزعبي عكسها . بعدين الزعبي غني بعطي البنشرجي نص نيرة بخشيش.
|
4- قال معادلة قال؟!!!
بواسطة
أبو إيثار
19/5/2010 2:53:09 AM
ولا زالت المعادلة التي يتم بها تسعير المشتقات النفطية في الأردن تحيّر كل جهابذة الاقتصاد، كما وأن حكومات مختلفة من العالم والمنطقة لا زالت تحاول شراء هذه المعادلة، التي لا زالت ناجحة رغم استخدامها لأكثر من 10 سنوات، ورغم الشفافية العالية التي تتعامل بها لجنة تسعير المحروقات.
بس بالك المقال بينشر ولا بينقص؟
|
5- دمت للوطن
بواسطة
اردني وافتخر
19/5/2010 3:02:24 AM
احمد الزعبي
يانبض المواطن ولسانه ويا رائحة الوطن وعنفوانه
دمت ودام قلمك ولا جف الحبر في شريانه
|
6- صدقت
بواسطة
تغريد
19/5/2010 3:25:40 AM
موجع ما وصلت اليه الحال في بلدنا الحبيب المقالة رائعة و ذكرتني باحد النهفات التي كتبها الاستاذ الزعبي لابو صقر حول البترول الاردني اي الشعب الاردني اللي صار بمثابة البترول للحكومة تعصر فيه و ما عنده مخلفات حتى و صديق للبيئة .
|
7- خلي عن الكومه
بواسطة
اردني
19/5/2010 3:26:34 AM
هي الحكومه لو تخلي عنها والله الناس بالف خير اي خلو عنكو البانزين و خلو عنكو المخالفات و الضرائب و مؤسسه تشجيع النصب قصدي الاستثمار كل اشي للحكومه و ما حدا بحاسبها والله انها دحشه الراتب بجيبتها ومش بس مصصاصه انا بعرف الي بشتري من سوبر ماركت ب عشر ليرات ما بدحش بجيبته اكثر من ليره اما انك تشتري ب عشره و تسرق عشرين والله الله ما بريدها والراتب بطل يكفي سرقات و ضرايب والله يعييييييييين الناااااااس ماكله روح الخل والحكومه لسا بتدحش بجيبت الكبار
|
8- نفطنا لينا وغالي علينا
بواسطة
الماسة وحاسة
19/5/2010 6:53:10 AM
اسعدالله صباحكم بكل الخير....
بصراحة استاذي.انا ما بهمني كتير انخفض سعر البرميل او ارتفع طالما غيري بفلل
السيارة بنزين شفت لوين الانانية.
بعدين لو سمحتلي عندي حل بسيط لمشكلة ارتفاع البنزين لرواد سواليف وهو
لو احصينا عدد المغتربين من الرواد الاعزاء بنلاقية عدد لا بأس فية.
بنطلب منهم يجمعوا ثمن الهدايا من عطور وبخور وما شابة ذلك. ويجيب كل واحد برميل
نفط.واحنا هون بنكرر على كيفنا.نفطنا ونحنا حرين فية.
اكيد عجبكم اقتراحي.
طبعا"المغتبربين ما بعبوا من نفطنا .ما شاء الله الجيبة عمرانة اللهم لا حسد
|
9- تصفية
بواسطة
شيء
19/5/2010 7:16:50 AM
يعني صفت الحياة "خض" و "تصفية" .. في الماضي كان خض الحليب لاستخراج مشتقاته.. واليوم على المواطن ان يقوم بخض النفط وتصفيته بيده للتوفير.. حتى لو فكر بشراء أواعي له وللعيال فانه يذهب لمحلات التصفية!.. وعندما يفكر ان يأكل يذهب الى بسطات التصفية!.. ولو فكر ان يشرب عليه بتصفية ماء الحنفية!.. ولو اراد ان يتكلم عليه ان يضع مصفاة على فمه لكي لا يؤذي "بيئة" المسؤولين!.. شو هالمواطن "الخام" اللي كل "جهة" نازلة تصفي فيه على طريقتها؟!.
|
10- قص
بواسطة
تغريد
19/5/2010 7:35:23 AM
أجمل عبارة هي التي "قصوها". رائعة كتابتك استاذي كما دائما.
|
11- نُكتة البنزين
بواسطة
هايل عطاالله الملكاوي
19/5/2010 7:35:36 AM
أسعد الله صباحك يا أمير الكتاب
هو الموضوع نُكته بنزين وليس تنكة بنزين يعني كل ما تصير النُكته قديمة وبايخة ومش مضحكة بيخترعوا نُكته جديدة وأسعار جديدة وطبعاً الناس بيفرطوا من الضحك على مبدأ (إن كثرت همومك غنيلها ), بس فعلاً عنكو جاي لأنه حتى النُكتة بتطلع منهم مش حلوة يعني باي.......خ......ة والله يكون في عون المواطن مادام المواطن في عون الحكومة واخيراً انا نفطي يستخرجو نفس قصدي نفسي يستخرجو نفط ونشوف كيف الوضع رح يكون . وشكراً
|
12- رايحه علينا
بواسطة
ابو رامي
19/5/2010 7:42:21 AM
ذكرني موضوع انعدام الثقه بالمحاسب بحكاية التاجر الذي كان يضع مكنسه قرب
صندوق الحساب ويضيف ثمنها على فاتوره كل زبون فاذا انتبه فان التاجر يعتذر بالخطأ وباللخمه واذا لم ينتبه فراحت عليه ولكن الفرق في موضوع تسعيره المحروقات فانها رايحه علينا في جميع الحالات سواء تابعنا الاسعار العالميه ام لم نتابع او اذا اعترضنا ام لم نعترض وراح ينحرق سنسفيل اكت جدودنا
|
13- قربه مخزوقه
بواسطة
سامر العمري\الصريح
19/5/2010 8:06:18 AM
وك ياحمد يا ميمتي والله انك بتنفخ بقربة مخزوقة وبتحلم كثير وك الحكومة الرشيدة اعزها الله الان متنكدة لانه البرميل نزل سعره بدهم اياه يطير اكثر واكثر
وك يا ميمتي روح اتفرج على سهل حوران ما في عرق قمح او عدس
وك بطلنا نقدر انجيب التركتور او البغلة تاعة دار فلاح من غلاء البنزين
غطيني يا ميثة الحسن
|
14- جيرة الله ما بتعبوا حالكو
بواسطة
REEM ALBAWADI
19/5/2010 8:13:34 AM
الله اصبح الوطن واهله بخير .يسلم دينك عالمقال.بس بالكو هي واقفه على لجنة البترول بس وباقي اللجان بعني وضعها مطمن اي والله المواطن نفسه اقول لكل اللجان جاي عنكو وجيرة الله ماتعبوا حالكو لانه بتنقال للاحترام كمان ونفسي اقول لكل الجان شششششيييي غاد والله اقرفنا حالنا من تسعيراتكو وقراراتكو وجتماعاتكو وشششششي غغغغغاد.للاخت ماسه اقتراحك على راسي بس الله اسلمهم اخوانا بالجمارك ما بدخلوه وبكبوه امام عيونك لانه بخافوا على السلامه العامه بدروش انه احنا مولعين من ارتفاع الجنوني للاسعار البنزيييييييييين
|
15- صباحكم ..سعيد ومشرق
بواسطة
بنفسج
19/5/2010 8:35:12 AM
عجبتني والله قصة عنك جاي .
ذكرتني بمصطلحين بيعطو نفس المعنى , لكثير من الاشياء غير الواضحه
هاظا ال اجاك , وحط بالخرج .
بس عنك جاي مثلا ما بسمعها لما يكون في عزومة والجلي اكوام .
لما يبدا التعزيل ما بيطلع حدا بصباحي ويقولي عنك جاي .
لما اطلع بالسيارة واحمل كل اغراضي ما حدا بيقولي عنك جاي . .بسمعها عند عد الدنانير والفراطه هه عنك جاي .
طيعا بالنسبة للبترول رح يرخص .. عدو جاي !
فركة كعب , كلها مية سنه وبتتعدل , نص الالف ..
وهلم جرا .
هيك
بنحل مشاكلنا بتهون , جيرة الله كاسة شاي تفضلوا جاي .
|
16- الغربة
بواسطة
منير
19/5/2010 8:39:43 AM
تحياتي لاحمد الزعبي نبض الشارع . انت مش عارف انه المغتربين قربوا يروحوا جاي ....... جاي جاي نرفع كل شي
|
17- مش متأكد
بواسطة
الزعبي فرحان
19/5/2010 8:42:55 AM
صباح الخير .. يا ابن العم
مقال من العيار الثقيل ...
اتمنا من اي مساول ان يرد على هل القضية
من الاخر ؟ فرق سعر البرميل للجيبة .. مصاريفهم كثير ههههه
|
18- شفافية
بواسطة
ابو ابراهيم
19/5/2010 8:52:45 AM
لا عجب ان يتم قصقصة المقال في جريدة الرأي لأنها (الجريدة) تتمتع بشفافية عالية كما هي لجنة تسعير المحروقات التي اخترعت معادلة يستحيل على جهابذة الطاقة والاقتصاد فك شيفرتها ولا حتى استخدامها كما ان المعادلة نفسها غير معلنة للجميع حتى ولو تم اعلانها فان متغيراتها ايضاً غير واضحة يعني (خبصة)... بالمحصلة كما قال الزعبي بدها مخافة الله وليحفظ الله قلمك النظيف يا زعبي .
|
19- فشة غل مرتبة
بواسطة
أردنية أنا
19/5/2010 9:00:04 AM
تسلم أستاذ أحمد على المقالة الحلوة
أقسم بربي انك فشيت غلي فيها
وارحمونااااااااا يا حكومة
|
20- وقال ليش بنحبك ؟؟؟!!!
بواسطة
الحجاج
19/5/2010 9:33:15 AM
سيدي العزيز ..
لا مجال للتعليق ...
كل يوم نحبك اكثر ، ونتعلق فيك اكثر واكثر ..
لآن ما تكتبه في كل مرة ، هو تماما ما نود ان نتكلم فيه ..
لا مجال لكتابة اي كلمة .. إلا الله يعطيك العافية ويقويك ..
|
21- قص الهوية في الانتخابات
بواسطة
سولفجي
19/5/2010 9:33:36 AM
هذا الخبر بزواريب الغد...."ربما يجري قص هوية الأحوال المدنية من النصف" في إجراء قد تلجأ إليه الحكومة لضمان عدم تكرار التصويت في الانتخابات النيابية المقبلة. معلومة أفضى بها نائب رئيس الوزراء د. رجائي المعشر لدى لقائه أمس رؤساء تحرير صحف "الدستور"، "الرأي"، "الجوردان تايمز"، "العرب اليوم"، "الغد"، بحضور وزير الدولة لشؤون الإعلام والاتصال د.نبيل الشريف.
ضروري يا استاذ احمد تكتب مقال عن هذه عن الفكرة العظيمة بقص الهوية... انا بقترح سجن كل واحد بنتخب لحد ما تخلص الانتخابات.. انت شو بتقترح؟؟!!
|
22- ما هي آلية التسعير ؟
بواسطة
غالب شرايحه
19/5/2010 9:39:28 AM
اخي احمد مقالك على المحك وكان على أبي يحيى ان يرفع المفك في وجه لجنة التسعبر احتجاجا على الاجحاف في القدير ثم يهدأ ويلف سيكارة هيشه ويرحب باللجنه ويقول ديونو جاي جيرة الله لتشربوا الشاي ثم يسألهم
ابنه المثقف شلاش بالله يا اخوان ممكن أعرف آلية اتخاذ القرار عند تحديد الأسعار للبنزين والكاز والسولار لأن الشراء يكون آجلا والسعر متذبذبا ؟
وياريت يكون فيه صندوق خاص توضع فيه فروقات الأسعار ترجعوا له عند العازه ويكون مثل بيضة القبان يحافظ على الاتزان في الحالات الطارئه لما تولع الأسعار شو رايكو ؟؟
|
23- مش فاهم شو قصة محرر الراي.
بواسطة
سلام
19/5/2010 9:46:49 AM
انا بس هسا اقتنعت انو زلمتنا تبع الراي بشيل جمل من المقال بس هيك ( يعني شغل منجقة) من غير سبب، وفق شعار ( إجا على بالي) ولا كيف ممكن يقنعني عطوفته انو الجملة الي لغاها من المقال خطيرة لدرجة انها بتهدد الامن القومي للبلد. مش فاهم، إذا في حد فاهم يفهمني.
|
24- ريم البوادي
بواسطة
الماسة وحساسة
19/5/2010 10:04:00 AM
ريم البوادي كلامك صحيح.
الجمارك لما بفتشوا الشاحنات بكبوا الديزل عالارض وبفكوا التنك وطبعا غير المخالفة.
كان عندنا شاحنات وهيك كانوا يعملوا في تهريب الديزل والبنزين
لكن انا بحكي لاخواننا المغتربين اللي معهم سيارات خليجية.هدول ما بتفتشوا بس بسألوهم معكم شي.طبعا" المغتربين بجاوبوا ببرأة لا .احنا جماعة مساكين وعايفين حالنا.
فبحزونا عليهم وما بفتشوهم.وان بكون هناك عالحدود بدعمهم وبقرأ ايات قرانية لهيك حالات.يعني بمروا زي النسمة.
حاسة تعليقي بنفع يكون مسلسل زي بقعة ضوء
المهم يوصل النفط للمعزب .اتفقنا
|
25- عنك جاي
بواسطة
طلال الخطاطبه
19/5/2010 10:16:54 AM
عنك حاي يا المصخمط بالسين هات هالقنينة عنك.أما سولافة اني اول واحد فهاي ابصر كيق زبطت.بس راح أظل قاعد جنب سواليف لحد ما ينزل المقال وأكتب أي شي بس على شان احجز الكرسي الأمامي.
سولافة عنك جاي لا تقف عند البترول عنك جاي تقولها الحكومة لكل المواضيع لأنه تعرف بالضبط ما يريده المواطن ولهذا نحن مرتاحون والحمد لله.وآخر عنك جاي هو قانو الانتخابات.حيث قالت لنا عنكو جاي.
الماسة الحساسة:المغتربون لا يمنون على أهلهلم بما يحضرون من هدايابس اذا بتضمني انه تنكة بانزين لكل عليه بتسد احنا جاهزين وهلا عمي .
|
26- النية مهمة
بواسطة
الماسةو وحساسة
19/5/2010 10:45:41 AM
الاستاذ طلال الخطاطبة
احنا شعب طيب واي شي برضينا.المهم النية.
جيب البنزين وما عليك .بس قول متى جاي حتى استنى عالحدود
|
27- ابدعت ...
بواسطة
جنوبي الهوى
19/5/2010 10:49:29 AM
ابدعت ابو عبدالله والله الحكومه ما بتفكر في الشعب ولا بتدري عنه
|
28- 50 سنه وبتهون
بواسطة
علي النصار
19/5/2010 10:55:25 AM
نلعن "أُكته" ..نحن احرار...اما ان نترك الوضع هكذا "تلولحي يا دالية"..صعب
شووووووو يعني ههههههه
غد بنصبح زي الخليج طول بالك بدنا نتج نفط من الصخر الزيتي
|
29- ابوشريك
بواسطة
حازم بريكة
19/5/2010 11:16:24 AM
تسلم ايدك ياابوزعبي على مقالك الرائع
وبالنسبة الي انا مسمي الحكومة (ابوشريك)لأنها مشاركاني في كل شي حتى في اكلي وفي راتبي المتواضع الي مش مكفيني بفرض ضريبة عليه
طبعا لازم يكون البنزين غالي عشان يعبو سيارات المسؤولين من مرسيدس و همر وBMWبدون مايخسرو اي شيء.ناهيك عن اولاد المسؤولين الي لازم ندرسهم بالجامعات الأمريكية والبريطانية ونطلع مصاريفهم كمان على حسابي وحسابك وحساب الشعب الغلبان
|
30- على سيرة جيب معك بنزين من الغربة
بواسطة
الراعي الصغير
19/5/2010 11:17:42 AM
والله على هاي السيرة
في احتمال كبير بدل ما اجي اجازة بسيارة او بالطائرة
شكلي راح اجي بـتـنك بنزين(صهريج) كبير لونه احضر
واجيب هداية للاهل والاصدقاء (وشو رايك يا عمي خطاطبة)
ولو مشروع البحرين جاهز ما بين العقبة والبحر الميت
كان جيب بحاملة نفط وجبت هدايا للشعب كامل.
واقول للشعب كله "عنك جاي"بس مافي نصيب
وبصير اوقف على دوار الرابع
وانادي ( عبي جاي..عبي جاي)
بدل من عنك جاي
|
31- جاي عنك
بواسطة
محمد يونس بني بكر
19/5/2010 11:52:59 AM
نحن قي قرية مرحبا بنقول ( جاي عنك ) .
الله يعطيك العافية يا زعبي . مقالك من الاخر وفي الصميم والله كأنه الحكومة مفكرة الناس ما بتسمع اخبار النفط العالمية والله صارو ا يستنوا النشرة الاقتصادية اكثر من النشرة الجوية .
|
32- تلولحي يا دالية
بواسطة
بــــنت الروسان
19/5/2010 12:33:28 PM
و إنت الصادق يا شيخ الشيوخ
الحكومة بتقول : ولكو عنكو جاي
إحنا بنسعر
و ما تهكلو هم إشي
يعطيك العافيه يا نشمي
و عنك جاي
رح أكتب مقال بالنيابة عنك
مش لإني ما بثق فيك
بس لإني حاب أريحك و الله
|
33- فالج لا تعالج
بواسطة
فاقد المصداقية
19/5/2010 12:51:03 PM
فالج لا تعالج. ألم يستسلم الشعب الأردني بعد.
|
34- عمي أستاذ طلال
بواسطة
بــــنت الروسان
19/5/2010 1:15:12 PM
صحيح و الله أول شي إنتبهت لإله هو إنك أول معلق
يا عمي عنك جاي وإحجزلي المقعد الأمامي
لأنه الواحد ما بيفضى و يصحصح شوي
ويشوف جدول يومه
بيلاقي 30 واحد سابقه بالتعليق
أي هات
عنك جاي !
|
35- الله يرحمك يا بطل
بواسطة
بــــنت الروسان
19/5/2010 1:20:04 PM
يلفت نظري أحد رواد سواليف الكرام
وهو الأخ جنوبي الهوى عندما يقول :
الله يرحمك يا صدام
فعلاً
تحياتي لك يا نشمي
و الله يرحمه لهالبطل
صدام حســـــين
الصامد
|
36- عنكو جاي
بواسطة
هارب
19/5/2010 1:25:02 PM
انا بقلهم عنكو جاي بحياتنا وعنكوا جاي بقروشاتنا وما جمعناه من عرق جبيننا عنكوا جاي خلونا بحالنا الله يخليكم عنا جاي
|
37- حقيقة شي بجلط
بواسطة
م.اسامة حابس العموش
19/5/2010 2:30:45 PM
واللة انك تحكي صحيح شكلها هاللجنة بس يرخص هالبرميل بكونوا نايمين وبس يرتفع بتلاقية مصحصح عالاخر يا ترى اعضاء اللجنة معهم سيارات ولا شو بركبوا
|
38- مبدع
بواسطة
الــجــمــووح
19/5/2010 2:46:55 PM
ايها المبدع ... هو عـُمـر بـثـمـن اللقـمـة .. والـحـذاء .
|
39- حبيب
بواسطة
محمد
19/5/2010 4:27:25 PM
يلعن اللي ما بحبك يا احلى قلم والله على شواربي يا زعبي
|
40- مساء الأربعاء
بواسطة
ابو العباس
19/5/2010 5:16:10 PM
بإسم المغتربين أعلن أن المقصود من رفع سعر البنزين مع بداية كل صيف هو (شفط) المغترب حتى آخر ريال سعودي في جيبه ، أما تفكير الحكومة باعادة رسوم الحدود فهو للتأكد من أن المغترب غادر الأردن (مشفوط) حسب الخطة .
يا ريت لو كان التعليق على الصورة الكاريكاتورية : بلا قافيه .
|
41- مواطن
بواسطة
مواطن
19/5/2010 6:14:27 PM
قبل اضرابات المعلمين تحدث عضو لجنة المعلمين مخاطبا وزير التربية قائلاً: "الى متى يراهن معالي الوزير على صمت المعلمين؟" وبعد هذه العبارة بأسابيع حدث ما رأينا من اعتصامات واضرابات للمعلمين. الان نقول للحكومة: "الى متى تراهن الحكومة على صمت المواطنين؟"
|
42- يطاطا
بواسطة
زيد السوالمه
19/5/2010 6:36:19 PM
ذات مرة دخلت محل خضار وبعد ان بدأت بأخذ البطاطا قال لي صاحب المحل عنك جاي وحطلي البطاطاالطالحة قبل الصالحة
فاذا الحكومة اعطتك رح تخرب بيتها لأنك رح تخسرها
فعنك جاي ما بتمشي معنا عمي
|
43- الله يرحمه
بواسطة
.زعلان
19/5/2010 10:09:30 PM
الله يرحمك يابطل الأمه يا صدام حسين
الي خذلناك وتفرجنا عليك وانت تذبح قربانا للأمه
اما بالنسبه لمقدمه المقال : والله كنت مفكر لما البنشرجي او البياع في السوبر ماركت يقوم عني ببعض الاعمال وما يخليني اعملها بإيدي,,, كنت مفكر ان هذا من ضمن تحسن الخدمات بالبلد زي الدول الثانيه ...وكل مره كنت انبسط وأقول هاي والله صايرين يحترمونا
اتاريه بكون مخونني ونا مش عارف ههههه الله يجازيكوا
|
44- عنكو جاي
بواسطة
لجين
20/5/2010 9:42:57 AM
عنكو جاي ... بدها مخافة الله
|
45- ولااا تكة,,
بواسطة
نشمية
21/5/2010 9:54:12 AM
والله يا خيو,, شكله لا حياءءءء لمن تنادي,,
يعني لو دورت ببرميل الخجل عندهم,,
ما ح تلاقي فيه ولااااااااا تكة !!!
بيقولوا: إللي بيخاف من الله ,, ما تخاف منه,,
إحتمال مشان هيك إحنا دااااايما ً خايفين,,
تحية احترام لقلمك السامي,,
|
46- هذه بضاعتكم ردت اليكم
بواسطة
eman
28/5/2010 10:03:45 AM
اخاف ان يحصل لك ما حصل مع سيدنا يعقوب عليه السلام عندما اوحى لأبنائه بحجة تضييعهم لسيدنا يوسف عليه السلام فيكون رد مسؤولي اعلامنا الموقرين عليك بنفس عنوان مقالتك الرائعة تلك التي عبرت عما يجول في ذهن كل مقهور من مواطني بلدنا المغتصب من فئة قليلة ممن يدعون انهم ابناؤه الوحيدون وعلى ذلك يتصرفون ويصولون ويجولون فيه دونما رادع ولا حياء او استحياء !
|
|
|
